4
Geeshsha Shuchati Laaletidosona
1 Worqey phooleysa waanidi aggidee?
geeshsha worqay waanidi dammidee? Xoossa keethay gimbetida shuchay oge doonan laaletis.
2 Kase al7o worqa mela bonchetida Xiyoone nayti
ha77i biittafe medhetida oto gididosona.
3 Hari attoshin worakani ba mari dhanthawusu;
shin ta asay bazzon de7iya yanchoda, ba naytas iita gidis.
4 Saamo gaason yooga nayta inxarsay kottonora oyketis;
nayti kathi woossosona;
shin entaw immiya oonika baawa.
5 Kase mal7o katha xalaala meysati
ha77i oge doonan koshan wuridosona.
Kase liino ma7idi diccidaysati
ha77i bido bolla zin7idosona.
6 Ta asaa nagaray,
oodde kusheyka iyo bochonna,
qoponna shiretidi wodhida Soodome asa nagarape daro.
7 Yihuda halaqati shachafe aadhida geeshshi,
maathafe aadhida boothu.
Enta asatethay zo7o inqofe aadhida aarise;
enta medhoy sanpare al7o shucha mela.
8 Shin ha77i enta som7oy shaalape aadhidi kareexis;
asasi ogen enta be7idi erenna;
enta gogay meqethaara oyketidi mithada melis.
9 Miyaba dhayidi, koshan hayqidaysatape
olan hayqidaysati lo77o.
10 Ta asaa bolla yida dhayuwa gaason,
qadhetiya aayeti banta nayta doysidi midosona.
11 Godaa hanqo xuu7ay kumis; I ba suulliya sheniya tigis.
Yerusalaame baasuwa tama oythis.
12 Ha sa7a kawotape woyko kawotethatan de7iya asaape oonika
morkey Yerusalaame pengiyara gelana gidi ammanibena.
13 Shin haysi haniday iya nabetinne nagarasinne iya kahineti oothida naaquwasa,
xillota suuthaa iya giddon gussida gishosa.
14 Enti qooqe asada, oge tattafoosona;
enti suuthan tunida gisho
enta ma7uwa oonika bochanaw koyenna.
15 Hessa gisho, asay, “Kichite! hinte tuna gidiya gisho,
nuna bochofite!” yaagidi enta bolla waassidosona.
Enti baqatidi toylatiya wode,
kawotethatan de7iya asay,
“Hinte nuura haysan daanaw danda7eketa” yaagidosona.
16 Goday enta laallis; I entaba zaaridi qopenna;
enta kahineti bonchetokona;
enta cimati nashetookona.
17 Nu ayfey maado demmanaw xeellishe coo daaburis;
nuna ashshanaw danda7onna
kawotethatape maado naagida.
18 Asay nu gedaa kaalliya gisho,
nu katama ogera hemetanaw danda7ibooko.
Nu wursethay matis; nu laythay wuris;
nuus dhayo wodeyka gakis.
19 Nuna yedetheysati piradhiya arganthafe aadhidi eesotoosona;
enti nuna dere huuphera yedethidosona;
bazzon hokidi nuna naagidosona.
20 Goday tiyida kawoy, nu de7uwas shempoy,
enta xihiyan oyketis.
Nu iya kuya garsan uttidi,
kawotethata giddon daana gidi qopida.
21 Hinteno, Uxa biittan de7iya Edoome asaw,
ufaytite; hashshu giite.
Shin xuu7ay hinte bolla yaana;
hinte mathotidi kallo attana.
22 Hinteno, Xiyoone asaw, hinte seeray gidana;
I hizape hintena di7o biittan wothenna.
Shin Edoome asaw, hinte seeretana;
hinte nagarayka qoncana.