5
Kaaletheysi Beetelemepe Yaana
Hinteno, Yerusalaame asaw, hinte olanchota shiishite! Nu morketi nuna teqidosona; enti Isra7eele kaaletheysa gacuwa xam7an shocana hanoosona. Goday, “Efraatan de7iya Beeteleme katamaw, neeni Yihuda katamata giddon guutha; shin iyaw dendoy benipe doomidi, merinaw gididaysi, Isra7eele haaranaysi taw neepe keyana” yaagees.
Hessa gisho, iqethi oykida maccasiya na7aa yelana gakanaw, Goday Isra7eele morketas aathidi immana. Hessafe guye, di7etidi de7iya iya ishati simmidi, banta asaara walaketana. I Godaa minotethan yidi, Godaa ba Xoossaa suntha wolqan ba asaa heemmana. I sa7aa gaxa gakanaw gita gidiya gisho, enti sarotethan daana. I entaw sarotethi gidana.
Asoore biitta asati nu biitta oykiya wodenne nu miixata yedhidi geliya wode nuuni laapun naageysatanne hospun kaaletheyisata enta bolla denthana. Enti Namiruudey de7iya Asoore biitta olan xoonidi haarana. Asoore biitta asati nu biitta olidi oykiya wodenne nu zawa yedhiya wode I nuna enta kushepe ashshana. Attida Yayqooba zareti daro deriya giddon Goday kiitida xaasa melanne maata bolla wodhiya aka mela gidana. Enti ammanetidi naagey Godaape attishin, ase gidenna. Attida Yayqooba zareti kawotethata giddoninne daro asaa giddon, bazzon do7ata giddon gaammo melanne dorsa wude giddon gupi wodhiya wodala gaammo mela gidana. I yaara aadhiya wode yedherethesinne mentherethees; oonika ashshanaw danda7enna. Hinte kushey hintera eqeteyisata bolla dendana; hinte morketi ubbay dhayana.
10 Goday, “He gallas taani hinte parata hinte giddofe dhaysana; hinte para gaareta mentherethana. 11 Taani hinte biittan de7iya katamata dhaysana; hinte miixa ubbaa laallana. 12 Hinte marota taani dhaysana; hizape guye murunneysati hinte giddon dookona. 13 Taani hinte eeqa misiletanne hinte goyinnanaw essida shuchata hinte giddofe dhaysana; hizape guye hinte hinte kushen medhidaba goyinneketa. 14 Taani Asheera eeqa xoossata hinte giddofe shoddana; hinte katamata dhaysana. 15 Taw kiitetiboonna kawotethata bolla yiloninne hanqon halo keyana” yaagees.