27
Yihudi Suletidi Hayqis
(Mar 15:1; Luqa 23:1-3; Yoha 18:28-32)
1 Wonta guura kahine halaqatinne biitta cimati ubbay Yesuusa wodhisanaw maqetidosona.
2 Enti Yesuusa qachi efidi deriya haariya Philaxoosas aathidi immidosona.
3 He wode Yesuusa oythida Yihudi, Philaxoosi Yesuusa bolla pirdidaysa be7idi, qiirotidi, he hastamu bira santime kahine halaqatasinne deriya cimatas guye zaaris.
4 “Taani xillo asi hayqos aatha immada nagara oothas” yaagis.
Shin enti, “Hessi nu meto gidenna ne meto” yaagidosona.
5 Yihudi miishiya Xoossa Keethan yeggi aggidi enta matape bidi, suletidi hayqis.
6 Kahine halaqati miishiya ekidi, “Ha miishey suutha miishe gidiya gisho, nuuni Xoossa Keethaa miishiyara gatheysi woga gidenna” yaagidosona.
7 Hessafe guye, issife zoretidi, bete asi mooganaw mana biitta shammidosona.
8 Hessa gisho, he gadey hachi gakanaw suutha biitta geetetidi xeegetees.
9 Nabiya Ermiyaasi, “Isra7eele asay iyaw qanxanaw gammatida hastamu bira santime ekidosona.
10 Goday tana kiitidaysada mana biitta shammanaw immidosona” gidaysi he wode poletis.
Yesuusi Philaxoosa Sinthan
(Mar 15:2-5; Luqa 23:3-5; Yoha 18:33-38)
11 Yesuusi deriya haariya Philaxoosa sinthe shiiqin, Philaxoosi iyako, “Neeni Ayhude kawo?” yaagidi oychis.
Yesuusi zaaridi, “Ne gadasa” yaagis.
12 Kahine halaqatinne biitta cimati iya mootiya wode entaw aybi zaaroka immibeenna.
13 He wode Philaxoosi Yesuusako, “Haysati nena mootiya mootuwa ubbaa si7ikii?” yaagis.
14 Yesuusi hari attoshin, issi qaalaka zaaronna ixin, deriya haareysi daro malaaletis.
Yesuusi Hayqo Pirdetis
(Mar 15:6-15; Luqa 23:13-25; Yoha 18:39-40; 19:1-16)
15 Deriya haareysi laythan laythan Paasika Ba7aale bonchiya gallasan, asay koyiya issi asi qashope birshiya wogi de7ees.
16 He wode issi Barbaana Yesuusa geetetiya daro eretida iita asi qasho keethan de7ees.
17 Hessa gisho, daro asay shiiqidi de7ishin Philaxoosi, “Taani hintew Barbaana billoye woyko Yesuusa geetetiya Kiristoosa billo?” yaagidi asaa oychis.
18 I hessa giday enti qanaatidi Yesuusa oythidaysa eriya gishosa.
19 Philaxoosi pirda keethan uttidashin, iya machiya, “Taani hachi qamma amuhon iyabaa daro waayetashe aqida gisho, he xillo uraa bolla aybibaaka oothofa” yaagada kiittasu.
20 He wode kahine halaqati, “Barbaani bileto, Yesuusi hayqo” gidi Philaxoosa woossana mela asaa cimmidosona.
21 Philaxoosi zaaridi, “Taani enta nam7aafe hintew oona billana mela koyeetii?” yaagidi oychis.
Enti, “Barbaana billana mela koyoos” yaagidosona.
22 Philaxoosi, “Yaatin, Yesuusa geetetiya Kiristoosa waato?” yaagidi enta oychis.
Ubbay zaaridi, “Masqaliya bolla iya kaqa” yaagidosona.
23 Philaxoosi asaako, “Ayis? I ay iitabaa oothidee?” yaagidi oychis.
Shin asay kaseysafe aathidi, “Masqaliya bolla iya kaqa” gidi waassidosona.
24 Ooshshi denthethofe hara aybibaaka oothanaw danda7etonaysa Philaxoosi be7idi, haathe ekidi, “Ha uraa hayquwan taani de7ike. Hessa oothey hintena” yaagidi asaa sinthan ba kushiya meecetis.
25 Asa ubbay zaaridi, “Iya suuthaa gomey nunanne nu nayta gako” yaagidosona.
26 Yaatin, Philaxoosi Barbaana entaw billidi, Yesuusa lisson garaafidi, masqaliya bolla kaqetidi hayqana mela entaw aathidi immis.
Yesuusa Bolla Qelqisidosona
(Mar 15:16-20; Yoha 19:2-3)
27 Hessafe guye, Philaxoosa wotaadareti Yesuusa deriya haareysa soo eki efin, wotaadareti ubbay iya yuushuwan eqidosona.
28 Iya afilaa qaari ekidi zo7o afila mayzidosona.
29 Qassi aguntha kallacha giigisidi, iya huuphen wothidosona. Iya ushacha kushiyan mayre xam7a oythidi, iya sinthan gulbatidi, “Ayhude kawaw, mukulu laythi kawota!” yaagidi, iya bolla qelqisidosona.
30 Iya bolla cuttidosona. He mayre xam7aa ekidi, iya huuphen shocidosona.
31 Enti iya bolla qelqisidaape guye, zo7o afilaa iyape qaari ekidi, iya afilaa iya mayzidosona. Masqaliya bolla iya kaqanaw eki efidosona.
Yesuusi Kaqetis
(Mar 15:21-32; Luqa 23:25-43; Yoha 19:17-27)
32 Enti kare keyidi, issi Simoona geetetiya Qereena biitta asi demmidi, Yesuusa masqaliya wolqan toossidosona.
33 Golgota geetetiya bessi gakidosona. “Golgota” guussay “Guugge bessi” guussu.
34 Hessan enti ciiye walaketida woyne ushsha uyo gidi iyaw immidosona. Shin I hessa ganxi ekidi, uyonna ixis.
35 Enti masqaliya bolla iya kaqidaysafe guye, iya afilaa shaakidi, saama yeggidi ekidosona.
36 Hessafe guye, yan uttidi iya naagidosona.
37 Qassi, “Haysi Ayhude Kawa Yesuusa” giya mooto xuufiya iya huuphe son wothidosona.
38 Yesuusara he wode nam7u pangata issuwa iyape ushacha baggan, hankuwa iyape haddirsa baggara, masqaliya bolla kaqidosona.
39 Ogiyara aadhiya asay Yesuusa boridi, iya bolla cuttishe,
40 “Xoossa Keethaa laallada heedzu gallasa giddon keexeyso, nena ashsha. Neeni Xoossaa Na7a gidiko, ane masqaliya bollafe wodha” yaagidosona.
41 Hessadaka, kahine halaqati, higge astamaaretinne biitta cimati issife Yesuusa bolla qelqisidosona. Haysada yaagidosona:
42 “Harata ashshis, shin bana ashshanaw danda7ibeenna. I Isra7eele kawo gidiko, ane masqaliya bollafe ha77i wodho, nuka iya ammanana.
43 Xoossan I ammanetees, Xoossay iya ashshanaw koyko ane ashsho. Ayis giiko, I bana, ‘Taani Xoossaa Na7a’ gees” yaagidosona.
44 Qassi hari attoshin, iyara masqaliya bolla kaqetida pangatika hessada gidi iya bolla qelqisidosona.
Yesuusa Hayquwa
(Mar 15:33-41; Luqa 23:44-49; Yoha 19:28-30)
45 Usupun saatepe bidi, uddufun saate gakanaw biitta ubbay dhumis.
46 Uddufun saate gidiya wode Yesuusi, “Elohe, Elohe, lama sabaqtanii?” gidi gita waaso waassis. “Elohe, Elohe, lama sabaqtanii?” geysa birshethay “Ta Xoossaw, ta Xoossaw, tana ayis aggadii?” guussu.
47 Hessan eqida asaape issoti issoti hessa si7idi, “Ha uray Eeliyaasa xeegees” yaagidosona.
48 Iira entafe issoy woxi bidi, isponje ekidi, caala woyne ushsha kunthis. Hessa mayre xam7a xeeran wothidi ushshanaw iya doonako shiishis.
49 Shin hankoti, “Naaga, Eeliyaasi iya ashshanaw yaaneko ane be7oos” yaagidosona.
50 Yesuusi nam7antho gita waaso waassidi, hayqi aggis.
51 He saaten xoossa keethan kaqetida magaraajoy qommofe duge gakanaw nam7u keyidi, peedheti wodhis. Biittay qaaxis, zaallayka phalqetis.
52 Duufoti dooyetin Xoossaa asatape daroti hayqope dendidosona.
53 Enti duufope keyidi, Yesuusi hayqope dendidaape guye, geeshsha katamaa bidosona; yan enti daro asaas bentidosona.
54 Mato halaqaynne iyara Yesuusa naagiya wotaadareti biittay qaaxidaysanne hessan hanidaba be7ida wode daro yayyidi “Tuma haysi Xoossaa Na7aa” yaagidosona.
55 Hessan daro maccasati, Galilape doomidi Yesuusa haggaazishe kaallidaysati haahon eqidi xeelloosona.
56 Enta giddon Magdela Mayraama, Yayqoobanne Yoosefa aayiya Mayraamanne Zabdiyoosa machiya de7oosona.
Yesuusi Moogetis
(Mar 15:42-47; Luqa 23:50-56; Yoha 19:38-42)
57 Sa7ay omarsiya wode Yoosefa geetetiya issi dure aday, Armaate katamape yis. I ba huuphenka Yesuusa kaalliya asi.
58 Yoosefi Philaxoosako bidi, Yesuusa aha ekanaw woossis. Philaxoosi ahay Yoosefas imetana mela kiittis.
59 Yesuusa aha ekidi, geeshsha moogo afilan xaaxis.
60 Baw moogetanaw shuchafe woocida ooratha gongolon iya aha wothis. Qassi he gongoluwa doonan gita shuchaa gondorsi wothidi, aggidi bis.
61 Magdela Mayraamanne hanko Mayraama he gongoluwako simmidi uttidosona.
62 Wontethe Sambaata gallas, kahine halaqatinne Farsaaweti Philaxoosako yidi, haysada yaagidosona:
63 “Godaw, ha wordanchoy paxa de7ishe, ‘Taani heedzu gallasape guye, hayqope dendana’ yaagidaysi nuus hassayetis.
64 Hessa gisho, I moogetida gongoluwa heedzu gallas gakanaw, minthi naagana mela kiittarki. Hessi hanonna ixiko, iya tamaareti bidi iya aha kaysi dhaysidi, ‘Hayqope dendis’ yaagidi asaas odiko nam7antho balesoy koyroysafe ubba haa iitana” yaagidosona.
65 Philaxoosi entako, “Hintew naageysati de7oosona; bidi hintew danda7etida mela naagisite” yaagis.
66 Hessa gisho, enti bidi duufoy boshetonna mela shuchaa bolla maatame wothidi wotaadaretan naagisidosona.