Phawuloosi Filphisiyuusa Asaas
Xaafida Kiita
Gaatha Qofa
Phawuloosi Filphisiyuusa asaas xaafida kiitay xaafetiday, Roome kawotethan, Maqedoone biittan, Filphisiyuusa kataman de7iya woosa keethasa. Ha kiitay xaafetiday, Phawuloosi qasho keethan de7iya wode hara ammaniya oosanchoti iya ixida wodenne Filphisiyuusa woosa keethan dendida wordo timirtiya gaason iya wozanay daro azzanida wode (1:21; 2:17; 3:10). Gidoshin, Phawuloosi Yesuus Kiristoosa minthidi ammaniya gisho ha kiitan qoncidi bentey, ufaysinne kumetha ammanetethi. Filphisiyuusan de7iya daro asay Roomepe di7etidi yida asi. Enti Roome biittas mishetoosonanne biitta loythidi naagoosona. Entafe issoti issoti Yesuusa ammanida gisho, banta biitta asan goodetidosona. He gooday enta bolla metonne manqotethi ehis (Hawa 16:20-21).
Phawuloosi ha kiita xaafida gaasoy iya metuwa wode iya maaddanaw ammaniya asay imota iyaw yeddida gishonne iyaw woossida gisho, enta galatanaasa. Iya bollanne enta bolla dumma dumma metoy gakidaba gidikoka enti minetana melanne kumethi ammanetidi daana mela enta minthethees. Ceeqonne otoro aggidi, Yesuus Kiristoosa ashketethan kumana mela minthidi enta akeekisees.
Enti Yesuus Kiristoosan gididi demmida de7oy Xoossa aadho keehatethaafe pultidabanne ammanon ekidabape attishin Ayhudeta woga naagidi ekidaba gidonaysa enta akeekisees. Yesuus Kiristoosan de7iya ubbaas Xoossay immiya saruwanne ufaysa entaw xaafees.
Ha kiitay ufaysi, ammanetethi, issifetethinne ammanon minnidi duussu qoncisidi bessees. Wursethan Phawuloosi Xoossa ammaniya asay siiqon daana melanne Kiristoosa qofatho daana mela enta zorees (2:2; 4:2-3).
Maxaafa Ayfe Qofata
Gelo qofa (1:1-11)
Phawuloosi hanidi de7iya de7uwa (1:12-30)
Ashketetha duussa leemiso (2:1-18)
Ximotiyoosasinne Ephafraditusa (2:19-30)
Morketapenne iitatape naagetethi (3:1—4:9)
Phawuloosi Filphisiyuusa asaa galatees (4:10-20)
Sarothonne anjo (4:21-23)
1
1 Kiristoos Yesuusara issifida gisho, Xoossaba gidida, Filphisiyuusa kataman de7iya woosa keethaa cimatasinne daaqoneta ubbaas. Yesuus Kiristoosa aylle gidida, Phawuloosapenne Ximotiyoosape kiitetida kiitaa.
2 Nu Aawa Xoossaafenne Godaa Yesuus Kiristoosape aadho keehatethaynne sarotethay hintew gido.
Phawuloosa Galata Woosa
3 Taani hintena qopiya wode ubban, ta Xoossaa galatayis.
4 Taani hinte ubbaas Xoossaa woossiya wode ufaysan woossayis.
5 Hinte koyro gallasape ha77i gakanaw, Wongela markateysan taara issife gididi, tana maaddida gisho, Xoossaa galatayis.
6 Hinte giddon lo77o ooso doomida Xoossay, Kiristoos Yesuusi simmiya gallasay gakanaw, polanaysa erayis.
7 Hinte ubba wode ta wozanan de7eeta. Taani ubba wodeka hessada qopanaw bessees. Ha77i taani qashon de7ashenne qashetanaape sinthe Wongela naagoninne Wongela mintha eson Xoossay taw qaadida qaada hinteka taara shaaketideta.
8 Taani hintena ubbaa Kiristoos Yesuusa siiquwan ay mela laamotiyako Xoossay taw marka.
9 Hinte siiqoy tuma eratetharanne akeekara issife guji guji diccana mela Xoossaa woossayis.
10 Hessan hinte lo77oba shaakidi, dooreyisata, Kiristoosi simmiya gallasan geeshshatanne boretonayisata gidana.
11 Hinte de7oy Xoossaa bonchuwasinne galatas Yesuus Kiristoosa baggara bentiya xillotethaa ayfiyan kumidi ayfana.
Phawuloosa Qashoy Wongela Dalgisis
12 Ta ishato, tana gakida ubbay Wongelay dalgana mela tuma maaddidaysa hinte erana mela koyayis.
13 Taani Kiristoosa gisho qashetidaysa, kawo gadho naageysatinne haysan de7iya harati ubbay eroosona.
14 Ta qashuwa gaason nu ishatape daroti Godan keehi ammanetidosona. Hessa gisho, Xoossaa qaala yashshi bayna kasepe minnidi odana mela minotethi demmidosona.
15 Gidoshin, issoti issoti qanaateninne palaman Kiristoosaba odoosona, shin harati suure wozanape odoosona.
16 Suure wozanape odeysati, Xoossay taw Wongela naagana mela hadara immidaysa eriya gisho, siiqon odoosona.
17 Shin tana qanaateysati ta qashuwa bolla hara meto ehanaba entaw daanin bantana dosidi Kiristoosaba odoosonape attishin, tuma wozanape odokona.
18 Hessi aykoka metenna. Tuma ogen gidin woyko wordo ogen gidin he ubban Kiristoosi sabbaketees. Tana hessi ufaysees. Qassi harabay tana ufaysiyabay,
19 taani hinte woosaninne Yesuus Kiristoosa Ayyaana maaduwan attanaysa eriya gisho tana ufaysees.
20 Ta gita amoynne ufaysan naagiya naagoy ta yeellatonna attanaysa. Shin ubba wode ootheysada, ha77ika taani paxa de7in woyko hayqin yayyonna ta kumetha asatethan Kiristoosi bonchetana gada minotethan odayis.
21 Ta de7ikoka Kiristoosa xalaalas de7ayis; qassi ta hayqikoka taw aadhida wodhe.
22 Shin ta paxa de7iko ayfey de7iya ooso oothana. Shin paxa de7eysafenne hayqope awusa dooraneko taw eretenna.
23 Taani ha nam7atape awusa dooraneko un7etas. Ha de7uwape shaaketada Kiristoosara issife daanaw amottayis; Kiristoosara issife de7eysi ubbaafe aadhida lo77o.
24 Shin taani hinte gisho paxa de7eysi hintew daro koshshiyaba.
25 Hessa taani geeshshada erayis; taani, hinte ammanon diccanaadanne ufaytanaada hintera paxa daana.
26 Hessa gisho, taani hinteko simmada yaa wode, Kiristoos Yesuusara hinte de7iya de7uwan tanan de7iya ceeqetethay hintew darana.
27 Ubbaafe aathidi, hinte Kiristoosa Wongelas boncho ehiya de7o de7ite. Ta hintena be7in woyko be7onna ixin, hinte issi qofan minni eqidi, harati Wongelan ammanana mela issi wozanan gididi issife baaxeteysa ta si7ana.
28 Hinte morketas yayyofite. Enti hintera eqetiyaba gidiko hessi hintew atotethas, entaw dhayos Xoossaafe gidida malla.
29 Kiristoosas oothiya qaaday hintew imetiday, hinte iya ammanana mela xalaala gidonashin hinte iya gisho meto ekana melasa.
30 Hessa gisho, hinte ta waayiya kase be7ideta; ha77ika ta waayeteysa si7eeta. Hinteka ta waayiya mela waayeteta.