17
1 Ooshshi de7iya bessan de7iya gita gibiraape
saroynne wopi de7iya bessan uytha poqoy lo77o.
2 Cinca aylley pathonna ba godaa na7aa haarees;
iya ishatara issife laata shaaketees.
3 Worqinne biri taman paaceteysada;
Goday asa wozana paacees.
4 Iita asi iita haasaya si7ees;
wordanchoy wordo haasaya hayzees.
5 Manqota bolla qelqisiya asi enta medhida Xoossaa cayees;
hara asi gakiya meton ufaytiya asi seerettonna attenna.
6 Na7a na7i cima asas kallacha;
aawati banta naytas boncho.
7 Lo77o odi eeya asas giigenna;
hessadaka wordo odi ayseysas giigenna.
8 Wodhaafe immeysas wodhaafey bita mela;
I biya bessa ubbay iyaw injetees.
9 Qoho genthiya uray siiqo koyees;
shin oda zaaridi zaaridi woociya uray,
ammanetiya laggeta shaakees.
10 Eeyay xeetu toho lisson shocin ereysafe;
akeeki de7iya asas coo hanqoy era immees.
11 Iita asi ubba wode geella;
qadhey bayna asi iya bolla kiitetana.
12 Eeyara iya eeyatethan gahetanaape
marati eketida maahera gahetethi lo77o.
13 Lo77o oothidaysas iita kushe zaariya
uraa soope iitabay kichenna.
14 Ooshshi doomishe haatha dhawa mentheysa mela;
hessa gisho ooshshi doomanaape koyrottada palama agga.
15 Nagaranchuwa xillisoynne
xilluwa bolla pirdoy,
nam7ayka Goday ixiya ooso.
16 Cincatethi demmanaw amoy bayna de7ishin,
eeya kushen de7iya miishey ay iya maaddii?
17 Laggey ubba wodeka lagge;
ishi meto wode maaddanaw yeletees.
18 Akeeki bayna asi eronna uraa
acuwa qanxanaw waase gidees.
19 Ooshshu dosiya asi nagara dosees;
ubba wode ceeqetiya asi ba bolla dhayo xeegees.
20 Wobe qofi de7iya asi lo77oba demmenna;
ba inxarsan cimmiya asi meton gelees.
21 Eeyaa na7a yelida aawi azzanees;
eeya na7a aawas ufaysi deenna.
22 Ufaytiya wozani asas lo77o dhale;
shin meqida wozani asas wolqa dhaysees.
23 Iita asi pirda geellayanaw
geeman wodhaafe ekees.
24 Akeeka asi cincatethi ba sinthafe haassenna;
shin eeya asa ayfey sa7a gaxa yuuyees.
25 Eaya na7i ba aawa azzanthees;
ba aayiwuka camisees.
26 Xillo asi seeroy bessenna;
suure asi shocoy lo77o gidenna.
27 Guutha qaala haasaya asi erancho;
wopa ayyaani de7iya asi akeekancho.
28 Eeya asi si77i giiko cinca daanees;
ba doona dooyonna ixiko erancho daanees.