20
1 Mathoya ushshi eeyanne ooshancho oothees;
ushshan baletiya asi cinca gidanaw danda7enna.
2 Kawo hanqoy gaammo gudetha mela;
iya yiloyiya asi ba shempuwa bolla pirdees.
3 Palamape haakeysi boncho;
shin eeya asi ooyetanaw ellesees.
4 Azalla goshshanchoy wode naagidi goyenna;
kathi cakiya wode I woossanaw koyees;
shin aybaka demmenna.
5 Asa wozana halchoy ciimmo haatha mela;
shin wozanaama asi duuqidi kessees.
6 Daro asati banta lo77otetha odoosona;
shin tuma ammanetiya asi demmanay oonee?
7 Xillo asi borey bayna de7o de7ees;
iya kaalliya iya nayti anjetidaysata.
8 Kawoy pirdanaw ba araatan uttiya wode,
iita ubbaa ba ayfen harqidi kessees.
9 “Ta wozanay geeshshi; tanan nagari baawa”
gaanaw danda7iya asi daanesha?
10 Goday wordo mizaanenne
gina gidonna maka miishen go7eteyisata ixees.
11 Na7i geeshshinne suure gideysi
I oothiya ooson eretees.
12 Si7iya haythinne xeelliya ayfe,
Goday medhis.
13 Dhiskon ne wode wursiko ne manqana;
minnada oothiko ne kathi kallana.
14 Shammiya asi, “Qohees! Qohees!” yaagees;
shin bidaape guye, “Gelan shammas” yaagidi ceeqetees.
15 Worqey kumis; al7o shuchika bentees;
shin eri kumida inxarsi ubbaafe aadhida alleeqo.
16 Eronna asas waase geliya uraa ma7uwa qaari ekite;
imatha asas waase geliya uraa ma7o oykite.
17 Wordon demmida kathi mal7ees;
shin aqidi pee7ishe doonan aceda hanees.
18 Zore ekada ne qofaa qacha;
zore ekonna de7ashe ola boopa.
19 Zigiriya asi xuura genthenna;
hessa gisho, coo haasaya asape haaka.
20 Ba aawa woyko ba aayiw baaddiya asa,
de7o xompey sakana dhuman to7ana.
21 Koyrora eeson shiiqida shaloy
wursethan anjetenna.
22 Nena qohida uraa qohada zaarana goopa;
Godan ammaneta; I nena ashshana.
23 Goday nam7u qommo mizaane ixees;
wordo mizaaney iya ufaysenna.
24 Asay baana ogiya Goday kaalethees;
yaatin, asi ba de7on baana ogiya
waatidi akeekanaw danda7ii?
25 Eeson, “Haysa taani Xoossas immas” guussinne
guyepe qiirotethi asas xihe.
26 Cinca kawoy geellata shaakidi erees;
I enta qadhetonna seerees.
27 Asa ayyaani Godaas xompe;
iya gaatha asatethaa ubbaa pilgidi xeellees.
28 Siiqoynne ammanetethi kawa naagoosona;
iya araatay tuma pirdan minnees.
29 Yalagata bonchoy enta wolqaa;
cimata bonchoy enta puulunthaa.
30 Mino seeri iitatethi shoddees;
wadhoy iita wozana laammees.