Mazmure Maxaafa
Gaatha Qofa
Mazmure maxaafay, Isra7eele asa woosanne galata mazmureta shiishidi oykis. Dumma dumma asati adussa wode giddon ha mazmureta xaafidosona. Isra7eele asay ha mazmureta banta goyinno wodetan go7etoosona. Guyepe Isra7eele asay banta Geeshsha maxaafa giddon gelsidosona.
Ha mazmureti daro qommo. Galatanne woosa mazmureta, goyinno mazmureta, Xoossay maaddana mela, naagana malanne saro wothana mela buzo de7osinne biitta ubbaas woossiya woosata, nagara maarotas woossiya woosatanne harata gathidi oykida mazmure. Ha mazmuretape issoti issoti issi ura wozanan si7etida mishata qoncisosona; harati qassi Xoossa asa ubbay koyaabanne asa ubbaas si7etiya hanotata bessiya mazmure.
Yesuusi tamaarsishe mazmure maxaafape ekis; Ooratha Caaqo maxaafa xaafetika mazmure maxaafape go7etidosona. Woosa keethi eqida wodepe doomin, mazmure maxaafay goyinno wode ammaniya asay go7etiya eretida maxaafa.
Maxaafa Ayfe Qofata
Koyro maxaafa (1—41)
Nam7antho maxaafa (42—72)
Heedzantho maxaafa (73—89)
Oyddantho maxaafa (90—106)
Ichashantho maxaafa (107—150)
Koyro Maxaafa
1
(Maz 1—41)
Nam7u Ogeta
1 Iitata zoriyan boonnay,
nagaranchota ogen eqonnay,
qelqiseyisata shiiqon uttonnay,
I anjetidaysa.
2 Shin I Godaa higgiyan ufaytees;
iya higgiya gallasinne qamma qopees.
3 I goggiya haatha xaphon toketidi,
woden woden ayfe immiya,
iya haythay qolettonna mitha mela.
I oothiya ubbay iyaw poletees.
4 Shin iitati hessa mela gidokona;
carkoy pitidi efiya suulla mela.
5 Iitati xillo pirda bessan eqokona;
nagaranchoti xillota duulatan bentokona.
6 Goday xillota ogiya erees;
shin iitata ogey dhayana.