14
Yihuda Kawa Asa
1 Abiyi hayqidi ba mayzata gakis; I Dawita kataman moogetis. Iya bessan iya na7ay Asi kawotis. I kawotida wode biittay tammu laythi wopu gidi de7is.
2 Asi Godaa ba Xoossaa sinthan lo77obaanne suureba oothis.
3 Asi allaga xoossatas yarshiya bessatanne dhoqa goyinno bessata dhaysis. Goyinnanaw shuchafe oosetida tuussata mentherethis. Asheera geetetiya Xoossa misileta qanxerethidi yeggis.
4 Yihuda asay Godaa banta aawata Xoossaa koyana mela, iya higgiyanne iya wogaa naagana mela Asi kiittis.
5 Dhoqa goyinno bessatanne ixaane cuyisiya bessata Yihuda katamatape dhaysida gisho iya kawotetha laythan biittay wopu gidi de7is.
6 Kawoy Asi Yihuda katamatas miixata keexis. Goday iya shempisida gisho biittay shempis; iya laythan iyara oonika oletibeenna.
7 Asi Yihuda asaako, “Ane nuuni ha katamata essoos; enta yuushon miixata keexoos; adussa shako, pengetanne gordeta giigisoos. Nuuni Godaa nu Xoossaa koyida gisho biittay ha77ika nubaa. Nuuni iya koyida; I nuus ubba baggara shempo immis” yaagis. Hessa gisho, enti katamata keexidi polidosona.
8 Asas Yihuda kochaafe wogga gondalletanne toorata dancida heedzu xeetu mukulu olanchoti de7oosona. Biniyaame kochaafe guutha gondalleta dancidanne dongen dukeysati nam7u xeetanne hospun tammu mukulu olanchoti de7oosona. Hessati ubbay mino olanchota.
9 Zaraha geetetiya issi Tophe addey issi miloone olanchotanne heedzu xeetu para gaareta ekidi Yihuda olanaw yidi Marisa gakis.
10 Asi iyara oletanaw keyidi ba olanchota Marisa matan de7iya Xafaata zangaaran salpisis.
11 Asi Godaa ba Xoossaa haysada yaagidi woossis; “Abeeti Godaw, wolqi bayna olanchota wolqaama olanchotape ashshey ne meli baawa. Abeeti Godaw, nu Xoossaw, nuuni nenan ammanetidi, ha wolqaama olanchotara oletanaw ne sunthan yida gisho ne nuna maadda. Abeeti Godaw, ne nu Xoossaa; nena asi xoonenna” yaagis.
12 Goday Tophe olanchota Asa sinthaninne Yihuda olanchota sinthan shocin Tophe olanchoti baqatidosona.
13 Asinne iyara de7iya asay enta Geraara gakanaw yedethidosona. Tophe olanchotape daroy hayqida gisho enti simmidi minnanawunne oletanaw danda7ibookona. Hessada hanidi, Tophe olanchoti Godaaninne iya olanchotan xoonetidosona. Kawa Asa olanchoti daro di7o di77idosona.
14 He heeran de7iya asay Goday oothidaba be7idi daro dagammis. Asa olanchoti Geraara yuushuwan de7iya katamata ubbaa bonqidi dhaysidosona.
15 Qassi mehe moothata olidi, daro dorsaanne gimaleta di77idi, Yerusalaame simmidosona.