31
Hizqiyaasi Goyinno Woga Oorathis
1 Ba7aaley poletida wode he bessan de7iya Isra7eele ubbay Yihuda katamata bidi eeqa shuchata tincherethidosona; Asheera eeqa misileta qanxerethidosona. Yihudan, Biniyaamen Efreemaninne Minaase biittan de7iya dhoqa goyinno bessatanne yarsho bessata laallidosona. Enti he ubbaa dhaysidaape guye Isra7eele asa ubbay banta katamaanne banta soo soo simmidosona.
2 Hizqiyaasi kahinetanne Leeweta enta ooso maaran cugan cugan shaakidi essis. Enti xuussa yarshonne issifetetha yarsho Godaas yarshana melanne Xoossa keetha pengen Godaa galatananne sabbana mela oothis.
3 Godaa higgiyan xaafetidaysada wontanne omarsi xuussa yarshonne Sambaatan, ageena xeeroninne hara ba7aale gallasatan shiiqiya yarshuwas koshshiya meheta kawoy baape immees.
4 Godaa higgiyan xaafetidaysada kahinetinne Leeweti banta kumetha wodiya Godaa oosos peeshshana mela entaw bessiyaba immana mela Yerusalaame asaa kawoy kiittis.
5 Isra7eele asay kawa kiitaa si7ida wode kathaafe, woyne ushshafe, zaytiyape, eessafenne gaden kaxidabaape bayraa Godaas immidosona; bantaw de7iyaba ubbaafe asraata kessidosona.
6 Yihuda katamatan de7iya Isra7eele asaynne Yihuda asay banta mehetape, dorsatape asraata immidosona; Godaa, banta Xoossaas, dummayidi wothidaba ehidi dooridosona.
7 Enti heedzantho ageenan eho doomidi laapuntha ageenan polidosona.
8 Hizqiyaasinne halaqati dooretidaysa yidi be7ida wode enti Godaanne Godaa asi gidida Isra7eele anjidosona.
9 Hizqiyaasi dooretida imotaba kahinetanne Leeweta oychis.
10 Saadoqa yara gidida kahine halaqay Azaariyasi, “Banta imuwa Xoossa keethi eho doomin nu midi kallida. Goday ba asaa anjida gisho daro palahis” yaagis.
11 Hizqiyaasi Xoossa keethan minja kifileta giigisana mela kiittin asay giigisidosona.
12 Asraata, bayrabanne dummatida imotata ammanetethan kifileta gelsidosona. Leewe gidida Konaaney minja keetha bolla waanna gididi shuumetis. Iya ishay Same7i iyaw nam7antho gididi shuumetis.
13 Kawoy Hizqiyaasinne kahine halaqay Azaariyasi shuumin Konaanepenne Same7ape garsara oothiya Leeweti, Yi7eela, Azaaza, Nahaata, Asaheela, Yarmoota, Yozabaata, Eli7eela, Yismaaka, Mahaatanne Banaya.
14 Doloha bagga pengiya naageysata halaqay Leewey, Yimina na7ay, Qorey, asay dosan Xoossas ehida imuwa ekanawunne gishanaw shuumetis.
15 Kahineti de7iya katamatan gitape guuthu gakanaw de7iya banta ishatas ammanetidi, enta oosuwada oosuwada shaakidi immana mela Edeni, Miniyamini, Iyyasuy, Shama7ey, Amaareynne Sakani Qorepe garsara shuumetidosona.
16 Banta cugan cugan banta oosuwa gallas gallas Xoossa keethan ootheysatas laythi, heedzanne iyape bolla gidida adde ubbaas enta gishuwa shaakidi immidosona.
17 Banta aawata soo asan asan taybetida kahinetasinne laythi, laatamanne iyape bolla gidida Leewetas banta oosuwada oosuwada banta cugan cugan de7eysatas gishidosona.
18 Enti ammanetidi bantana geeshshida gisho enti banta yeletaa maaran taybetiya wode banta naytaranne machetara issife xaafetidosona.
19 Banta katamata yuushon de7iya hentha gadetan woyko hara katamatan de7iya kahine gidida Aarona sheeshas, enta giddon de7iya adde ubbaasinne Leeweta yeleta mazgaben xaafetidaysatas kathi gishanaw shuumetidosona.
20 Kawoy Hizqiyaasi Godaa ba Xoossaa sinthan lo77o, suurenne tuma gididaba Yihuda biitta ubban oothis.
21 Hizqiyaasi Xoossa keethas oothida ooso ubban, Xoossa higgiyanne wogaa naagidi Xoossaa ba kumetha wozanan koyida gisho iyaw ubbay injetis.