Phawuloosi Roome Asaas
Xaafida Kiita
Gaatha Qofa
Hawaariya Phawuloosa kiitay Roome asaas xaafetiday, Phawuloosi Roomen de7iya woosa keetha be7anaw qopida gisho, I biya wode enti giigidi naagana mela oothanaasa. Phawuloosa qofay Roomen de7iya ammaneysatara guutha wode oothidaape guye, enti iya maaddin Ispeene baanaasa. Roome kiitan ammanoba I eridaysa, ammaniya asay he timirtiya ooson peeshana mela qoncisidi xaafis.
Phawuloosi Roomen de7iya ammaniya asaa koyro sarothi simmidi, kaallidi entaw woosseysa odees. Iya kiittas gul7a qofay, “Wongelan Xoossa xillotethay qoncis; he xillotethay koyrope wursethi gakanaw ammanon qoncis” gidi odees (1:17).
Hessafe guye, he qofa dalgisidi xaafees. Ayhudeta gidin Ayhude gidonna ase gidin, ubbay nagari haarin de7ida gisho, enti Xoossara sigetanaw koshshees. Asay Xoossara sigetanaw danda7ey Yesuus Kiristoosa ammanonna. Enti Xoossara medhiya ooratha gahetetha ayfey, ooratha de7o gideysa Phawuloosi dalgisidi odees. Ammaniya asi Xoossara saro de7ees; qassi Xoossa Ayyaana baggara nagarapenne hayqo wolqafe kessi ekees. Shempo 5-8 gakanaw Phawuloosi Xoossa higgeynne ammaniya asa de7on oothiya Xoossa Ayyaana wolqa qofay aybeko odees. Hessafe kaallidi, Phawuloosi, “Xoossay asa na7as qopida qofa giddon Ayhudetinne Ayhude gidonna asay waanidi issife waaxetanaw danda7ii?” giya oyshaas zaaro immanaw baaxetis.
Qassi Ayhudeti Yesuusa ekonna ixiday Xoossa qofa gideysa odees. Hessi haniday Yesuus Kiristoosa baggara qoncisida aadho keehatetha giddon asa zare ubba haphana melasa. Gidoshin, Ayhudeti Yesuusa ekana wodey yaanaysa Phawuloosi ammanees. Wursethan Phawuloosi ammano de7o waanidi daanaw bessiyako odees. Xoossas oothanaba, ammaniya asati banta biittasinne banta giddon issoy issuwas aawatethan oothanabaanne kahaa gaason medhetiya oyshetaba qoncisidi odees.
Maxaafa Ayfe Qofata
Gelo qofa (1:1-15)
Roome kiita huuphe qofa (1:16-17)
Asa na7as atotethi koshshees (1:18—3:20)
Xoossi ase ashshiya oge (3:21—4:25)
Kiristoosan bentiya ooratha de7o (5:1—8:39)
Xoossi Isra7eeles qopiya qofa (9:1—11:36)
Ammaniya asa duussa (12:1—15:13)
Kuusha qofanne sarotho (15:14—16:27)
1
1 Yesuus Kiristoosa aylle gidida, hawaare gidana mela xeegetidaysafenne Xoossaa Wongela sabbakana mela dooretida Phawuloosi kiitida kiitaa.
2 Xoossay daro wodepe sinthe ba nabeta baggara immana yaagida Xoossaa Wongelay Geeshsha Maxaafatan xaafetis.
3 He Wongelay ashon Dawita sheeshape yeletida, Xoossaa Na7aa, nu Godaa Yesuus Kiristoosaba.
4 Qassi I ba geeshsha Ayyaanan hayqope dendidi, Xoossaa Na7aa gideysa gita wolqan bessis.
5 Iya baggara Ayhude gidonna asa ubbay, ammanidi kiitetana mela Kiristoosa sunthaa gisho, Xoossay aadho keehatethinne hawaaretetha maata nuus immis.
6 Yesuus Kiristoosas gidana mela xeegetida asatape baggati hintena.
7 Roomen de7iya, Xoossay siiqeysatasinne iya geeshsha dere gidana mela dooridaysatas.
Xoossaa nu Aawapenne Godaa Yesuus Kiristoosape aadho keehatethaynne sarotethay hintew gido.
Galata Woosa
8 Ubbaafe koyrottada, hinte ammanoy biitta ubban si7etida gisho, Yesuus Kiristoosa baggara hinte gisho ta Xoossaa galatayis.
9 Taani iya Na7aa wongelaba kumetha wozanan odiya Xoossay, taani ta woosan ubba wode hintena qopeysas I marka.
10 Wursethan, Xoossaa shene gidiko, taani hinteko baanaw ogey taw injetana mela ubba wode woossayis.
11 Taani hintew Ayyaana imuwa shaakanawunne hintena be7anaw laamotayis.
12 Hessika, taani hinte ammanuwan, qassi hinte ta ammanuwan minettana melasa.
13 Ta ishato, taani Ayhude gidonna asaape ayfe demmidaysada, hintefeka ayfe demmanaw hinteko baanaw qopas, shin digetas.
14 Tamaarida asaasinne tamaariboonna asaas qassi cincatasinne eeyatas taw acoy de7ees.
15 Hessa gisho, Roomen de7iya hintewuka wongela odanaw amottayis.
Wongeli Xoossa Wolqa
16 Iya ammaniya ubbaa, koyrottidi Ayhudeta, kaallidi Ayhude gidonnayisata ashshanaw Wongelay Xoossaa wolqaa gidiya gisho, ta Wongelan yeellatike.
17 Xilloy ammanon de7on daana geetetidi Geeshsha Maxaafan xaafetis. Wongelan Xoossaa xillotethay qoncis; koyrope wursethi gakanaw, asay xilley ammanonna.
Asa Iitatethi
18 Tumay eretonna mela banta iita ooson kammiya asaa bollanne nagara ubbaa bolla, Xoossaa hanqoy salope wodhees.
19 Xoossay entaw qoncanaw bessiyaba qoncisida gisho, enti Xoossaba eroosona.
20 Alamey medhetoosape doomidi, asaas bentonna Xoossaa kandoy, hessika iya merinaa wolqaynne Xoossatethay iya medhetethan qoncidi de7iya gisho, asay banta iitatethaas gaasoyabay baawa.
21 Enti Xoossaa erishe, iya bonchibookonanne galatibookona. Enta qofay maaddonnaba gidis; enta akeekona wozanay dhumis.
22 Enti bantana cincata goosona, shin eeyata.
23 Enti hayqonna Xoossaa goyinnanaysa aggidi, hayqiya asa medhon, kafota medhon, do7ata medhoninne ulora gooshetiyabata daanisidi oothida misileta goyinnidosona.
24 Hessa gisho, enti issoy issuwara borsoba oothidi, banta asatethaa kawushana mela Xoossay enta wozanay amotiya tuna oosos enta yeggi aggis.
25 Hessi haniday enti Xoossaa tumaa wordon laammida gishonne medhida Xoossaa aggidi, medhetethi goyinnida gishosa. Xoossay merinaw galatetidaysa. Amin7i.
26 Hessa gisho, Xoossay entana enta borso amuwas yeggi aggis. Enta maccasay bantaw bessiya addera gahetethi aggidi, bessonnaba hanidi maccasi maccasara gahetidosona.
27 Hessadaka, addeti bantaw bessiya maccasara gahetethi aggidi, addey addera gahetidosona. Addeti issoy issuwara amon xuugetidi, borsoba oothidosona. Banta oothida nagaraas bessiya pirdaa ekidosona.
28 Enti Xoossaa erishe, hari attoshin iyabaa qopanaw koyonna ixida gisho, bessonnaba oothana mela Xoossay entana pathonna qofas aathidi immis.
29 Entan geellatethi, iitatethi, yiiqey, geney, qanaatey, shempo wodhoy, palami, cimoynne iita amoy kumis. Enti zigireyisata,
30 asa sunthi iisseyisata, Xoossaa ixeyisata, cayeyisata, otoreyisata, ceeqeteyisata, iitabaa oothanaw koyeysatanne banta aayesinne aawas kiitetonayisata,
31 akeekonayisata, caaqo mentheyisata, siiqoy baynayisata, qadhey baynayisata.
32 Hayisata mela ootheysatas hayqoy bessees giya Xoossaa higgiya erishe, haysata oothosona. Enti bantaw ooso xalaala gidonashin, oothiya harataka nashshoosona.