12
De7o Yarsho
1 Hiza, ta ishato, hinte, hinte asatethaa Xoossaa ufaysiya, de7onne geeshsha yarsho oothidi, immana mela taani hintena Xoossaa maarotethan woossayis. Xoossaa hinte goyinnanaw bessiya tuma ogey hessa.
2 Lo77o, ufayseysanne polo gidida Xoossaa sheniya hinte shaaki eranaw hinte qofan laametitepe attishin, ha alamiya daanopite.
3 Xoossay hinte issuwas issuwas immida ammanuwa mela wozanaama asada qopite. Qopanaw besseysafe aathidi hintena dummayidi, otoron qopofite gada taw imetida aadho keehatethan hintew odayis.
4 Nu issi asatethaa giddon dumma dumma kifileti de7oosona; he dumma dumma kifiletas dumma dumma oosoy de7ees.
5 Hessada, nuuni daro asi gidikoka, Kiristoosan issi asatethi gidida. Nuuni issi asatethi gididi dumma dumma kifileti issoy issuwara oyketida.
6 Nuus imetida aadho keehatethan dumma dumma imotati de7oosona. Nu imoy tinbit odo gidiko, nuus de7iya ammanuwa mela odanaw bessees.
7 Nu imoy harata maade gidiko, he oosuwan minnanaw bessees; tamaarso gidiko, he tamaarsuwan minnanaw bessees.
8 Nu imoy harata minthetho gidiko, minnidi minthethanaw bessees. Nu imoy nuus de7iyabaape haratas imo gidiko, wozanape immanaw bessees. Nu imoy ayso gidiko, minnidi aysanaw bessees. Nu imoy haratas keeho gidiko, ufaysan keehanaw bessees.
9 Hinte siiqoy qoodhepe qommon gidanaw bessenna. Iitaba ixite; lo77oba minthidi oykite.
10 Issoy issuwara ishada siiqetite; issoy issuwa bonchite.
11 Azallofite; hinte ayyaanan minnidi, Godaas oothite.
12 Xoossay immida ufaysan ufaytite; metuwa danda7ite; ubba wode Xoossaa woossite.
13 Ammaniya geeshshata koshshiyaban maaddite; imathata mokite.
14 Hintena goodeyisata anjite; anjitepe attishin, baaddofite.
15 Ufayteysatara ufaytite; yeekeysatara yeekite.
16 Issoy issuwara issi qofan de7ite. Otoro qofaa aggidi, hintena kawushidi, kawusha ooso oothite. Hinte hintena cinca gidi qopofite.
17 Oonika hintew iitabaa oothiko, he uraas iita zaaropite. Asa ubbaa sinthan nashisiya lo77o ooso oothite.
18 Asa ubbaara saron daanaw hintew danda7etiya ubbaa oothite.
19 Ta ishato, hinte, hinte huuphen asas halo keyopite. Xoossay halo kessana mela iyaw aggaagite. Geeshsha Maxaafan,
“Taani halo kessana;
taani kushe zaarana”
yaagees Goday, geetetidi xaafetis.
20 Shin Geeshsha Maxaafan,
“Ne morkey koshatiko muza;
I saamotiko ushsha.
Neeni hessa oothiko iya huuphen
yeella tama bonqo qolaasa”
geetetidi xaafetis.
21 Iitaa lo77on xoonape attishin, iitan xoonetofa.