16
Xoossa Hanqoy Kumida Xuu7ata
1 Hessafe guye, Xoossa keethafe laapun kiitanchotako, “Bidi Xoossaa hanquwa laapun xuu7atape sa7an gussite” yaagidi, odiya wolqaama qaala si7as.
2 Koyro kiitanchoy bidi, ba xuu7an de7eysa sa7an gussin, do7aa mallay de7eyisata bollanne iya misiliya goyinnidaysata bolla iitanne zaamiya madunthi keyis.
3 Nam7antho kiitanchoy ba xuu7an de7eysa abban gussin, abbay hayqida asa suuthi daanis. Qassi abban de7iya medhetetha ubbay hayqis.
4 Heedzantho kiitanchoy ba xuu7an de7eysa shaafataninne pulto haathatan gussin, haathati suuthi gididosona.
5 Hessafe guye, haatha bolla maati de7iya kiitanchoy haysada yaagishin si7as.
“Ha77ika benika de7iya geeshshaw,
haysada ne pirdida gisho neeni xillo.
6 Enti geeshshata suuthaanne nabeta suuthaa gussida gisho,
enti suuthu uyana mela oothadasa.
Enti bantaw bessiyaba ekidosona”
yaagis.
7 Yarsho bessaafe,
“Godaw, Ubbaafe Wolqaama Xoossaw,
ne pirday tumanne xillo”
giya qaala si7as.
8 Oyddantho kiitanchoy ba xuu7an de7eysa awa bolla gussin, away ba seelan asaa xuuggana mela awas wolqi imetis.
9 Asay wolqaama seelan xuugetidi, he boshata bolla maati de7iya Xoossaa sunthaa baaddidosona; banta nagaraape simmidi Xoossaa bonchibookona.
10 Ichashantho kiitanchoy ba xuu7an de7eysa do7aa araata bolla gussin, he do7aa kawotethay dhumis. Asay un7aa gisho, banta inxarsaa saxoosona.
11 Qassi asay un7aa gishonne madunthaa gisho, salo Xoossaa baaddidosona; banta oothida nagaraape simmibokona.
12 Usupuntho kiitanchoy ba xuu7an de7eysa gita Efraxiisa shaafan gussin, doloha baggafe yaana kawotas ogey giigana mela haathay melis.
13 Hessafe guye, shodhe daaniya heedzu tuna ayyaanati dawiya doonape, do7aa doonapenne wordo nabiya doonape keyishin be7as.
14 Enti malaatata oothiya tuna ayyaanata. He heedzu tuna ayyaanati Ubbaafe Wolqaama Xoossaa gita gallasan hananaw de7iya olas shiishanaw alame kawota ubbaako baana.
15 “Heko, ta kaysoda yaana! Asa sinthan kallotonaadanne yeellatonnaada barkidi, ba ma7uwa naagiya uray anjetidaysa!” yaagis.
16 He tuna ayyaanati kawota Ibraawetho doonan Armagedoone geetetiya bessan shiishidosona.
17 Laapuntha kiitanchoy ba xuu7an de7eysa carko bolla gussin, xoossa keethan de7iya araatape, “Poletis” giya wolqaama qaalay yis.
18 Hessafe wol7anthi wol7amis; daday dhuuqis, biittay qaaxis. Asi sa7an medhetoosape biitti hessa mela qaaxo qaaxibeenna. Hessi ubbaafe aadhida qaaxo.
19 Gita katamay heedza keyidi shaaketis; biitta ubban de7iya katamati dhaydosona. Xoossay gita katamaa Babiloone qopidi, ba iita hanqo woyne ushshay kumida xuu7aa iw immis.
20 Yuushoy abban teqetida biittati dhaydosona; deretika bentibookona.
21 Asaa bolla oytamanne ichashu kilo giraame mela deexiya wolqaama shachi salope bukis. Boshay daro iita gidiya gisho asay shacha bosha gisho Xoossaa baaddidosona.