5
Dorsanne Xaatha Maxaafa
1 Hessafe guye, araata bolla uttidaysa ushacha kushen giddoranne karera xaafetida laapun maatamen gordetida xaatha maxaafaa be7as.
2 Issi mino kiitanchoy ba qaala dhoqu oothidi, “Maatamiya billanawunne maxaafaa dooyanaw bessey oonee?” yaagidi awaajishin be7as.
3 Shin salon gidin sa7an woyko sa7ape garsan gidin he xaatha maxaafaa billanawunne gidduwa be7anaw danda7ey oonika bentibeenna.
4 Xaatha maxaafaa billanawunne iya gidduwa be7anaw bessiya asi dhayida gisho ta daro yeekas.
5 Yaatin, cimatape issoy taako, “Yeekofa! Heko, Yihuda koche gidiya gaammoy, Dawita sheeshay, laapun maatameta billanawunne maxaafaa dooyanaw danda7is” yaagis.
6 Hessafe guye, shuketida Dorsay araatas, oyddu de7on de7iya medhetethatasinne cimatas giddon, eqidaysa be7as. Iyaw laapun kacetinne laapun ayfeti de7oosona. Hessati sa7a ubbaa kiitetida Xoossaa laapun ayyaanata.
7 He Dorsay bidi, araata bolla uttidaysa ushacha kushepe xaatha maxaafaa ekis.
8 I he xaatha maxaafaa ekida wode, de7on de7iya oyddu medhetethatinne laatamanne oyddu cimati Dorsa sinthan kundidosona. Enti issoy issoy diithinne geeshshata woosa gidida ixaaney kumida worqa shaate oykidosona.
9 Enti,
“Xaatha maxaafaa ekanaw,
maatameta billanaw new bessees.
Ayis giiko, neeni shuketadasa;
koche ubbaafe, dumma dumma doonape,
yaratapenne kawotethata ubbaafe
ne suuthan Xoossaas wozadasa.
10 Enti iya Xoossaa Aawas oothana mela
entana kahine kawotethi oothadasa.
Entika biitta ubbaa haarana”
yaagidi ooratha mazmure yexidosona.
11 Ta be7iya wode mukulu toho mukulunne tammu mukulu toho tammu mukulu gidiya kiitanchota girsaa si7as. Entika araata, oyddu de7on de7iya medhetethatanne, cimata yuushuwan eqidosona.
12 He kiitanchoti dhoqu gida qaalan,
“Shuketida Dorsay wolqaa, duretethi,
cincatethinne minotethi,
boncho, sabanne galataa ekanaw bessees”
yaagidosona.
13 Hessafe guye, sa7an, salon, sa7ape garsaninne abba giddon de7iya medhetethi ubbay,
“Araata bolla uttidaysasinne Dorsaas,
galatay, bonchoy, sabinne wolqi,
meri merinaw gido”
yaagidi yexishin si7as.
14 Oyddu de7on de7iya medhetethati, “Amin7i” yaagidosona; qassi cimati gufannidi goyinnidosona.