17
Dawitanne Gooliyada
1 Filisxeemeti banta olanchota Yihudan de7iya Sooko geetetiya bessan olas shiishidosona. Enti Sokopenne Azeeqape giddon de7iya Efees-Damima geetetiya bessan shiiqidi uttidosona.
2 Saa7olinne Isra7eeleti Ela zangaaran shiiqidi, Filisxeemetara oletanaw keyidosona.
3 Filisxeeme olanchoti issi bagga zuma bolla salpin, Isra7eeleti hanko bagga zuman salpidosona; zangaaray entaw giddon de7ees.
4 Gaate kataman de7iya Gooliyada geetetiya issi toora qara addey Filisxeemeti dunkaanida gutaape keyis; iya geesay usupun wadhanne takadho.
5 I ishatammanne laapun kilo giraame deexiya naase birata xurure ma7is; qassi naase birata barneexa ba huuphen wothis.
6 Naase birata gambaale ba tohon aathis; ba hashiyan naase birata toora tookis.
7 Iya toora toomay wandaraashe mela orde; iya toora ayfey laapun kilo giraame deexees; iya gondalliya tookiya issi addey iya sinthan hemetees.
8 Gooliyadi eqidi ba qaala dhoqu oothidi, “Isra7eele olanchota bolla haysada yaagidi gayrees; hinte waanana gidi olas keydetii? Taani Filisxeeme asi; hinte qassi Saa7ola aylleta gideketii? Ane hinte giddofe issi asi doorite; he addey taako duge wodho.
9 He addey taara oletidi tana wodhiko, nuuni hinte aylle gidana; shin taani iya xoonada wodhiko hinte nu aylle gidananne nuus haaretana” yaagis.
10 Qassika he Filisxeeme addey, “Taani hachi Isra7eele olanchota mandayis; taw issi asi immite; ane nam7ay oletana” yaagis.
11 Saa7olinne Isra7eeleti Filisxeeme addiya qaala si7idi dagammidosona, daro yayyidosona.
12 Dawiti Yihuda biittan Beetelemen de7iya Efraata addiya Isseye na7a. Isseyes hospun adde nayti de7oosona; Saa7ola kawotetha laythan Isseyey daro laythi de7ida cima.
13 Isseye heedzu bayra adde nayti Saa7ola kaallidi olaa bidosona. Enta sunthay:- bayray Eliyaaba; kaaloy Amnadaabe; heedzanthoy Saama.
14 Dawiti nayta ubbaafe kaalo; bayra heedzu nayti Saa7ola kaallidosona.
15 Shin Dawiti ba aawa dorsata heemmanaw Saa7ola matape Beeteleme simeretees.
16 He Filisxeeme addey oytamu gallas wontanne omarsi yidi Isra7eeleta mandees.
17 Issi gallas Isseyey ba na7aa Dawita haysada yaagis; “Ha caacetida tiyape laatamu kilo giraamenne ha tammu uythata ekada ne ishatas efada ne ishati dunkaanida gutaa elle gatha.
18 Ha tammu nuka pila enta shaalaqas efa; ne ishati waani de7iyako be7ada, enti saro de7eysas malaata entafe ekada ya.
19 Kawoy Saa7oli, ne ishatinne Isra7eele asa ubbay Filisxeemetara oletishe Ela Zangaaran de7oosona” yaagis.
20 Dawiti guura dendidi dorsata hara asi henthidi, Isseyey kiittidaba caani ekidi bis. Isra7eele olanchoti banta qaala dhoqu oothidi gayrishe olas keyishin Dawiti gakis.
21 Isra7eeletinne Filisxeemeti issoy issuwako simmidi salpidosona.
22 Dawiti ba ehidaba shinqe naageysa kushen wothidi, olaa salpiya giddo woxi bidi, ba ishata sarothis.
23 Dawiti ba ishatara haasayishin, Gaatepe yida toora qaray, Filisxeeme Gooliyadi ba salpiyafe gaxa keyidi kaseysada Isra7eeleta mandishin Dawiti si7is.
24 Isra7eele asa ubbay he addiya be7ida wode daro yayyidi baqatidosona.
25 Isra7eele asay issoy issuwako, “Ha keyiya addiya be7idetii? I tuma Isra7eele mandanaw keyis. Ha addiya wodhiya uraas kawoy Saa7oli daro shalo immana; ba na7iwuka iyaw immana; iya aawa keethaa asay Isra7eelen kawo giira giirenna” yaagidosona.
26 Dawiti ba matan eqida asaa, “Ha Filisxeeme addiya wodhidi, ha yeellaa Isra7eelepe denthiya uraas aybe oosetanay? Ha qaxaretiboona Filisxeemey de7o Xoossaa olanchota mandey I oonee?” yaagidi oychis.
27 Enti, “Ha addiya wodhiya uraas haysi haysi oosetana” yaagidi kaseysada zaaridosona.
28 Dawiti asaara odeteysa iya bayra ishay Eliyaabi si7idi, Dawita bolla shene eexis. “Neeni ha bessaa ayis yadii? He guutha dorsata bazzon ooddes yeggadii? Ne otoruwanne ne wozanaa iitatethaa ta erayis; neeni olaa be7anaw yadasa” yaagis.
29 Dawiti, “Taani ha77i ay oothadina? Hari attoshin odetanawuka danda7ikina?” yaagis.
30 Dawiti ba ishaa aggidi, hara asaako simmidi, kaseysada oychin asay iyaw kaseysada zaaridosona.
31 Dawiti odidaysa si7ida asay Saa7olas odin, Saa7oli Dawita xeegisis.
32 Dawiti Saa7olako, “Ha addiya gaason oodde wozanika til7ofo; taani ne aylley bada, ha Filisxeeme addiyara oletana” yaagis.
33 Saa7oli Dawitako, “Neeni na7a; I ba na7atethafe doomidi ola meezetidi diccida gisho, ha Filisxeeme addiyara neeni oletanaw danda7aka” yaagis.
34 Shin Dawiti, “Taani, ne aylley ta aawa dorsata heemmiya wode gaammoy woyko garmafeeley keyidi dorse oykiya wode,
35 iya kaalla bada iya doonape wotha ekayis. Taako simmiya wode qoodhiya cuullada wodhayis.
36 Taani ne aylley gaammonne garmafeele wodhas; ha qaxaretiboona Filisxeeme addey de7o Xoossaa olanchota guuthida gisho I entafe issuwada hanana.
37 Gaammofenne garmafeelepe tana ashshida Goday, ha Filisxeeme addiya kushepe tana ashshana” yaagis.
Saa7oli Dawitako, “Ba, Goday neera gido” yaagis.
38 Saa7oli ba ma7uwa Dawita mayzis; Dawita huuphen naase birata barneexa wothis; naase birata xururiya Dawita mayzis.
39 Dawiti ba ola ma7uwa bolla mashsha dancidi hemetidi be7is. Shin hessa mela ma7o ma7idi eronna gisho hemetanaw danda7ibeenna.
Hessa gisho, Dawiti Saa7olako, “Taani haysa mela ma7o ma7ada meezetaboonna gisho haysara baanaw danda7ike” yaagidi ola ma7uwa qaaris.
40 Dawiti ba hentha xam7a oykidi, shaafape ichashu mulumuqe shuchu doori ekidi, ba hentha qarxiitan yeggidi, ba yambarsha oykidi, Goolyadako shiiqis.
41 Gooliyadi ba gondalliya tookiya addiyara issife hemetishe Dawitako matis.
42 I Dawita tishshi oothi xeellidi, Dawiti aarise, mala lo77onne na7a gideysa be7idi kadhis.
43 I Dawitako, “Neeni xam7a oykada taako yaanaw tana kana gadii?” yaagis. Ba xoossata sunthan Dawita baaddis.
44 Kaallidi Dawitako, “Haaya; taani ne ashuwa salo kafotasinne sa7a do7atas immana” yaagis.
45 Dawiti, “Neeni mashsha, tooranne gumba oykada taako yaasa; shin taani Ubbaafe Wolqaama Godaa sunthan, neeni guuthida Isra7eele olanchota Xoossaa sunthan ne bolla yayis.
46 Hachi Goday nena ta kushen aathidi immana; taani nena shocana; ne qoodhiya muuca holana. Filisxeeme olanchota aha salo kafotasinne sa7a do7atas hachi immana. He wode Isra7eelen Xoossi de7eysa sa7an de7iya asa ubbay erana.
47 Goday ba asaa ashshanaw toora woyko mashshe koyonnaysa haysan shiiqida asa ubbay erana. Olay Godaaba gidiya gisho, I hintena ubbaa nu kushen aathidi immana” yaagis.
48 Filisxeeme addey dendidi, Dawitara olaa gahetanaw shiiqida wode Dawiti iyara gahetanaw ola demba woxidi bis.
49 Dawiti ba qarxiitan kushe yeddidi, issi shuchu eki yambaridi, Filisxeeme addiya som7uwan caddis. Shuchay iya som7uwa lukidi gelis; yaatin, addey ba som7uwara sa7an kundis.
50 Dawiti Filisxeeme addiya yambarshaninne shuchan xoonis. Dawiti ba kushen mashshi bayna Filisxeeme addiya caddidi wodhis.
51 Dawiti woxi bidi, iya bolla keyi eqidi, iya wodhidi, Filisxeeme addiya mashshaa shoohuwape shoddidi, iya qoodhiya muuci yeggis.
Filisxeemeti banta toora qaray hayqidaysa be7ida wode baqatidosona.
52 Isra7eele asaynne Yihuda asay dendidi gereerishe, Filisxeemeta Gaatenne Eqroona pengeta gakanaw yedethidosona. Filisxeeme asaa ahay Gaatenne Eqroona gakanaw Sha7irayma efiya ogiya ubban kundis.
53 Isra7eele asay Filisxeemeta yedethi simmidi, enti dunkaanida gutaa bonqidosona.
54 Dawiti Filisxeeme addiya huuphiya Yerusalaame ehis; shin Filisxeeme addiya ola miishiya ba dunkaaniya giddon wothis.
55 Dawiti Filisxeeme addiyara oletanaw bishin, Saa7oli be7idi, tora mocona Abeneera, “Ha na7ay oodde na7ee?” yaagidi oychis.
Abeneeri zaaridi, “Kawaw, tuma ne asho taani iya erike” yaagis.
56 Kawoy zaaridi, “Ha na7ay oodde na7eko ane oycha” yaagis.
57 Dawiti Filisxeeme addiya wodhidi simmida wode Abeneeri iya Saa7ola sinthe ehis. He wode Dawiti muucida Filisxeeme addiya huuphiya ba kushen oykidi utisis.
58 Saa7oli, “Ta na7aw, ne oodde na7ee?” yaagidi oychis.
Dawiti zaaridi, “Taani Beetelemen de7iya ne oosanchuwa, Isseye na7a” yaagis.