17
1 Hessafe guye, Akxoofeli, “Hachi qamma taani tammanne nam7u mukulu asata doorada Dawita yedethada oykana.
2 I daaburidi wolqa dhayidi de7ishin taani iya bolla wodhana. Taani iya daganthana; yan iyara de7iya asa ubbay baqatiya wode taani kawa xalaala shocana.
3 Yaatada taani asa ubbaa neeko zaarana. Neeni issi asa xalaala wodhanaw koyaasa; hanko asay saro attana” yaagis.
4 Akxoofela zorey Abeseloomenne Isra7eele cimata ubbaa ufaysis.
5 Abeseloomey, “Qassi Arkaya kocha Kuussa xeegite; I giyaba ane si7oos” yaagis.
6 Kuussi iyako yida wode Abeseloomey, “Akxoofeli zorida zorey haysa; nuuni I giyaba oothanaw bessii? Bessonnaba gidiko, ne qofay aybee?” yaagis.
7 Kuusi, “Akxoofeli zorida zorey ha wodiyan lo77o gidenna.
8 Ne aawaynne ne aawa asati mino olanchota gideysanne ba marata bonqetida maahe mela yashsheyisata gideysa neeni eraasa. Ne aaway ola meezetida asi; I qamma ba olanchotara aqena.
9 I hannoode gongolo giddon woyko hara bessan qosetidi uttis. I hinte cugata koyrottidi qohiko, hessa si7ida oonika, ‘Abeseloome kaallidi bida asay shocetidosona’ yaagana.
10 Ne aaway toora qara gideysanne iyara de7iya asay mino gideysa Isra7eele asa ubbay eriya gisho, hari attoshin gaammoda minota wozanay til7ana.
11 “Shin taani nena zorey haysa; abba gaxan de7iya shafe mela darida, Daanepe Barsaabe gakanaw de7iya Isra7eele ubbaa neeko shiisha; yaatada neeni enta olas kaaletha.
12 Nuuni iya demmida bessa awunka shocana; aki sa7an wodhiyada nuuni iya bolla wodhana. Iya gidin woyko iyara de7iya asaa gidin issoyka paxa attenna.
13 I katamaa gelikoka, Isra7eele asa ubbay wodoro ehidi, katamaa giddon issi shuchi aggonna he katamaa goochidi zangaaran yeggana” yaagis.
14 Abeseloomeynne Isra7eele asa ubbay, “Arkaya kocha Kuussa zorey Akxoofela zoriyape lo77o” yaagidosona. Goday Abeseloome bolla iitabaa ehanaw qopidi gisho Akxoofela zoriya ekonnaada oothis.
15 Kuussi kahineta Saadoqanne Abyataara, “Akxoofeli Abeseloomenne Isra7eele cimata haysa haysa gidi zoris; taanika enta haysa haysa gada zoras.
16 Ha77i Dawitako eeson kiittidi, ‘Bazzon de7iya shaafa gaxan hachi qamma aqopa; hefinthi pinna kicha! Hessi hanonna ixiko, kawoynne iyara de7iya asa ubbay dhayana’ yaagidi odite” yaagis.
17 Yoonataaninne Akimaasi qoncen katamaa gelishin enta asi be7onna mela Aynogeela geetetiya bessan uttidi naagoosona. Issi macca aylliya yada entaw odin, enti bidi kawa Dawitas odoosona.
18 Shin issi panthay enta be7idi Abeseloomes odis. Hessa gisho, enti nam7ay he bessaafe eeson kichidi Biraqima kataman issi addiya soo gakidosona. He addiya soo matan haatha olli de7ees; enti he ollan gelidosona.
19 He addiya machiya oonika eronnaada ollaa doona kammada iya bolla kathi miccasu.
20 Abeseloome aylleti addiya soo yidi machiw, “Akmaasinne Yoonataani awun de7oona?” yaagidi oychidosona.
Machiya, “Enti shaafa pinnidi bidosona” yaagasu. Enti koyin, bentonna ixin, Yerusalaame simmidosona.
21 He asati bidaape guye, nam7u asati ollafe keyidi, kawa Dawitas odanaw bidosona. Dawitako, “Akxoofeli hinte bolla haysa haysa oothana gidi zori wothida gisho eeson dendidi, shaafa pinnite” yaagidosona.
22 Dawitinne iyara de7iya asa ubbay Yordaanose pinnidi bidosona. Sa7i wontiya wode ubbay pinnidi wuridosona.
23 Akxoofeli ba zorey eketiboonaysa erida wode ba hariya kooridi ba de7iya katamaa bis. Akxoofeli ba soo giigisidi suletidi, hayqidi ba aawa duufon moogetis.
24 Abeseloomeynne iyara de7iya asa ubbay Yordaanose pinniya wode Dawiti Mahanayma katamaa gakis.
25 Abeseloomey ba olanchota bolla Iyo7aaba bessan Amasaya shuumis. Amasayi Isra7eele addiya Yotora na7a. Yotori Na7oosa na7iw, Iyo7aaba aayiw Xaruya michiw Abigiya ekis.
26 Isra7eeletinne Abeseloomey Galada biittan dunkaanidosona.
27 Dawiti Mahanayma katamaa gakiya wode Amoone biittan Raabape yida Na7oosa na7ay Shoobi, Lodobaara katamape yida Ami7eela na7ay Makirinne Orogalma katamape yida Galada addey Barziley,
28 hiixiyabata, keretanne shaateta ehidosona. Qassi enti giste, banga, dhiille, shaashshi, qom7olonne misire,
29 eessi, pila, meqa maathinne dorse Dawitinne iya asay maana mela ekidi yidosona. Hessa enti ehiday, “Asay bazzon koshatis, daaburis, saamotis” gidi qopida gishosa.