11
1 Neno, Libaanose,
tami ne zigata maana mela,
ne pengeta dooya!
2 Neno xiiddaw, zigay kundida gisho,
boncho mithati dhayida gisho, yii gada yeeka!
Hinteno Baasane wolato,
he siketida woray man7etida gisho, yii gidi yeekite.
3 Enta lo77o hentha bessay dhayida gisho,
Henthanchota zelelsa si7ite;
Yordaanose woray dhayida gisho,
Gaammoti gudeysa si7ite.
Nam7u Henthanchota
4 Goday ta Xoossay taako haysada yaagis: “Shukettanaw de7iya dorsa wudiya heemma.
5 Enta shammeysati shukoosona; shin seerettokona. Bayzeysati, ‘Nuuni duretida; Goday galatetto’ yaagosona; hari attoshin, enta henthanchoti entaw qadhetokona” yaagis.
6 Goday haysada yaagees: “Taani hizape guye ha biittan de7iya asaas qadhetike. Taani issi issi ase iya shooruwasinne iya kawas aathada immana. Enti biitta dhaysana; taani issi asika enta kushiyape ashshike” yaagees.
7 Hessa gisho, taani shukettanaw de7iya dorsata, aathada qassi wudiya giddon un7etidaysata heemmeysa gidas. Yaatada dorsata heemmanaw nam7u xam7ata ekada, issuwa “Dosetidaysa” gada xeegas; nam7anthuwa “Issifetethi” gada xeegas.
8 Taani issi ageenan heedzu henthanchota dhaysas. Enta hanotethay taw danda7etenna; entika tana ixidosona.
9 Yaata simmada ta dorsatako, “Taani hintena nam7antho heemmike; hayqeysi hayqo; dhayeysi dhayo; attidaysati issoy issuwa mo” yaagas.
10 Hessafe guye, taani “Dosetidaysa” geetetiya xam7a ekada menthas. Hessa ta oothiday kawotethatara gelida caaqoy duuxidaysa bessanaasa.
11 He gallas caaqoy me77is; he wode dorse shammeysatinne bayzaysati tana be7idi, hessi Godaa qaala gideysa eridosona.
12 Taani, “Hinte dosiko ta damooziya immite; ixas giiko aggaagite” yaagas. Yaatin enti taw hastamu bira santime immidosona.
13 Goday taako, “Enti immida boncho miishiya efada xoossa keethan de7iya otuwan yegga” yaagis. Taani he miishiya efada xoossa keethan de7iya otuwan yeggas.
14 Hessafe guye, taani Yihudasinne Isra7eeles giddon de7iya ishatethay dhayidaysa bessanaw “Issifetethi” geetetiya ta nam7antho xam7aa menthas.
15 Qassika Goday tana, “Nam7antho bada pathonna henthanchota miishiya eka.
16 Taani ha biittan issi henthancho denthana. I qohetida dorsata maaddenna; laaletida dorsata shiishenna; meqida dorsata koolenna; paxa de7eyisata heemmenna. Shin I hessa aggidi, modhota shukidi mees; enta koliziya dhoggees.
17 Dorsa wudiya yeggi dhayida he pathonna henthanchota ayye! Iya qesiyanne iya ushacha ayfiya bolla mashshi wodho. Iya ushacha kushey silo; iya ushacha ayfey qooqo” yaagis.