मरकुस रचित यीशु मसीह का सुसमाचार
मरकुस रचित यीशु मसीह को सुसमाचार
पहिचान
मरकुस का अनुसार गास्पोल नवा नीयम की चार किताब मे से एक हइ जो यीशु का जीवन को वर्णन करस हइ मसीह. ओमे से हर कोय खे “सुसमाचार” बोल्यो जास हइ, जेको अर्थ हइ “अच्छी खबर” वे यीशु का बाद लिखी गइ थी मत्ती, मरकुस, लुका अरु यहून्ना का वजेसे मरनो. मरकुस का अनुसार सुसमाचार चार मे सबसे छोटो हइ सुसमाचार. यो भी मान्यो जास हइ कि सब सुसमाचार सबसे पैयले 65-70 साल का बीच लिख्या गया था यीशु मसीह को जन्म का बाद. कोइ विधवानहोन को माननो हइ कि यो रोम मे कोय उद्देश्य से गयो थो वहा रोमन ख्रिशचन खे प्रोत्साहित करणु.
मरकुस जो यहून्ना मरकुस का नाम से भी जान्यो जास हइ, प्रेरित पौलुस अरु बरनबास को साथी थो लेकिन ओकी प्रतीष्ठा थी जब उनने मीशनरी जत्रा खे त्यागी दियो ते वे आहत हुया प्रेरित 13:13. बाद मे मरकुस ने फिर से जत्रा कि बरनबास प्रेरित 15:37-391 पतरस 5:13. हलाकि मरकुस यीशु का जीवन को चश्मदीत गवा नी थो, विधवानहोन को माननो हइ कि मरकुस ने पतरस का बारे मे भोत कुछ दर्ज कऱ्यो हइ गवाही अरु यही मरकुस का अनुसार सुसमाचार को आधार हइ. सुसमाचार मे, मरकुस ध्यान खे केद्रित करस हइ शिष्यत्व अरु आखरी टेम मे यीशु कि शिक्षा.
रुप-रेखा
1. मरकुस कि बात को पैछान अध्याय मे देस हइ.1:1-13
2. फिर मरकुस अध्याय मे यीशु का मत्रय को वर्णन करस हइ जब उ गलील मे थो.1:14—8:21
3. येका बाद उ यीशु का यरुशलेम जत्रा का बारे मे बतास हइ 8:22—10:52
4. मरकुस ने यरुशलेम मे यीशु का टेम का बारे मे लिखी खे अपनी बात खतम करी, जोमे ओको मरनो अरु पुनरुत्थान भी शामील हइ. 11:1—16:8
1
बपतिस्मा देन आलो यहून्ना को प्रचार
(मत्ती 3:1-12; लूका 3:1-18; यहून्ना 1:19-28)
1 परमेश्वर को बेटो यीशु मसीह को सुसमाचार की सुरुवात.
2 जसो कि यशायाह भविष्यव्दक्ता की किताब मे लिख्यो हइ
“परमेश्वर ने बोल्यो, मी तरा आगे अपनो दूत,
भेजुस हइ, उ तरा लिये रस्ता तैयार कर्हे.
3 सुनसान जंगल मे एक पुकारनआला को
आवाज सुनइ दि रो हइ कि प्रभु कि रस्ता तैयार कर,
अरु ओकी रस्ता सीधी करणु!”
4 येका लिये यहून्ना सुनसान जंगल मे बपतिस्मा अरु शिक्षा हुया दुन्याहोन से बोल्यो, अपना पाप से दुर ऱ्हे अरु माफ का लिये. “मन फिराव को बपतिस्मा ले अरु परमेश्वर तुमारा पाप खे माफ कर्हे.”
5 पुरा यहूदीयाहोन प्रदेस, अरु यरुशलेम शहर का सब र्हेनआला नीकलीखे यहुन्ना का पास गया, अरु उनने अपना पाप खे मनय खे यरदन नद्दी मे ओकासे बपतिस्मा लियो.
6 यहून्ना उट का बाल का कपडा पेनीखे अरु अपनी कम्मर मे चामडा को पट्टो बाध्यो र्हेतो थो, अरु टोटर अरु जंगल को मोहरुस खातो थो.
7 अरु उ यो प्रचार करतो थो “मरा बाद उ आनआलो हइ, जो मरासे भोत बडो हइ. मी यो योग्य भी नी की झुकी खे ओका जुता की तन्नी खोली सकु.
8 मेने तो तुमखे पानी से बपतिस्मा दियो, पन उ तुमखे पवित्र आत्मा से बपतिस्मा दिये.”
यीशु को बपतिस्मा
(मत्ती 3:13—4:11; लूका 3:21,22; 4:1-13)
9 उन दिन मे, यीशु ने नासरत नगर से गलील प्रदेस मे अयखे, यरदन नदी मे, यहून्ना से बपतिस्मा लीयो.
10 अरु जब उ पाणी से नीकलीखे उपर आयो ते तुरुत ओने बद्दल खे खुलतो अरु पवित्र आत्मा खे कबूतर का रुप मे अपना उपर उतरता देख्यो.
प्रभु यीशु की परिक्षा
11 अरु यो स्वर्ग से एक आवाज सुन्यो “तू मरो लाड को बेटो हइ, तरा से मी भोत खुश हइ.”
12 तब पवित्र आत्मा ने ओखे तुरुत सुनसान जगा का तरफ भेज्यो.
13 अरु सुनसान जगा मे चालीस दिन अरु चालीस रात तक सैतान ने ओकी परीक्षा करी. अरु उ जंगली जनवरहोन का साथ र्हियो. अरु स्वर्गदूत ओकी सेवा करता र्हिया.
यीशु का सेवकहोन खे बुलायो जानो
(मत्ती 4:12-17; लूका 4:14,15)
14 यहून्ना खे बन्दीघर मे डाल्या जान का बाद यीशु ने गलील प्रदेस मे अयखे परमेश्वर का राज को सुसमाचार प्रचार कर्यो.
15 अरु बोल्यो “टेम पूरो हुयो हइ, अरु परमेश्वर को राज नजीक अय गो हइ, अपना पाप से मन फिरानु अरु सुसमाचार पर विश्वास करणु.”
16 जब यीशु गलील की नदी का किनारा जातो हुये ओने दो भैइ शमौन अरु ओको भैइ अन्द्रियास खे नदी मे जाल डालते देख्यो, क्युकी वे मछिआला था.
17 यीशु ने उनका से बोल्यो, मरा पिछे आ मी तुम खे परमेश्वर का राज मे लानो सीखायु.
18 वे तुरुत जाल, छोडी खे ओका पिछे चली गया
19 अरु कुछ आगे अयखे ओने जब्दी का दो बेटा याकूब, अरु ओको भैइ यहून्ना खे, डोंगा पर जाल खे सुधारते देख्यो.
20 जब यीशु ने उनखे देख्यो, अरु तुरुत उनखे बुलायो वे अपना बाप जब्दी खे मजूरहोन का साथ डोंगा पर छोडी खे यीशु का पिछे चलि गया.
बुरी आत्मा ग्रस्त इन्सान
21 यीशु अरु वोका चेला कफरनहूम शहर मे आया, अरु उ अराम का दिन मे यहूदीयाहोन का आराधनालय मे जय खे उपदेस देन लग्यो.
22 अरु दुन्या ओकी शिक्षा से अचम हुया, क्युकी उ उनखे धर्म शास्त्री का जसो नी, पन अधिकार से उपदेस देतो थो.
23 उ टेम मे उनको आराधनालय मे, एक इन्सान थो. जोमे एक बुरी आत्मा थी.
24 ओने चिल्लय खे बोल्यो, हे नासरत नगर को यीशु, हमखे तरा से काम? का तू हम खे खतम करण आयो हइ? मी तोखे जानुस हइ तू कोण हइ, तू परमेश्वर को पवित्र जन हइ.
25 यीशु ने ओखे धमकय खे बोल्यो, चुप र्हे अरु ओमे से नीकली जा,
26 तब बुरी आत्मा ओखे मुरगडी खे अरु बडा आवाज से चिल्लय खे ओमे से नीकली गइ.
27 येका पर सब अचम करता हुये आपस मे वाद विवाद करण लग्या, या, बात हइ? यो तो कोय नवो उपदेस हइ,“उ अधिकार का साथ बुरी आत्माहोन खे भी आज्ञा देस हइ, अरु वे ओकी आज्ञा मानस हइ.”
28 यो तरह गलील अरु ओका आस पास का हर सब प्रदेश मे यीशु को नाम जल्दी ही फैली गो.
यीशु ने भोत सा बिमार होन खे अच्छो कर्यो
(मत्ती 8:14-17; लूका 4:38-41)
29 यीशु आराधनालय मे से नीकलीखे याकूब अरु यहून्ना को साथ शमौन अरु अन्द्रियास का घर मे आयो.
30 अरु शमौन की सासु बुखार मे पडी थी, अरु उनने तुरुत ओका बारे मे ओकासे बोल्यो.
31 तब ओने पास जैइखे ओको हात पकडी खे ओखे उठायो. अरु ओको बुखार उतरी गयो, अरु वा उनकी सेवा करण लगी.
32 शाम का टेम जब सुरज डूबी गयो ते दुन्या सब बीमारहोन खे अरु उनमे जोमे बुरीआत्माहोन थी, यीशु का पास लानु.
33 अरु पुरा नगर का सब दुन्या दरवाजा का बाहेर जमा हुया.
34 यीशु ने भोतझण खे अलग प्रकार की बिमार से छुड्या हुया था, उनखे अच्छो कर्यो, अरु भोत सी बुरीआत्माहोन खे नीकाली. अरु बुरीआत्माहोन खे बोलन नी दियो, क्युकी वे ओखे पहचानता था यो कोन आय.
गलील मे यीशु को प्रचार
(लूका 4:42-44)
35 फजर खे दिन नीकलना से भोत पैयले यीशु उठीखे नीकली गयो, अरु एक सुनसान जंगल कि जगा मे गयो अरु व्हा प्रार्थना करण लग्यो.
36 तब शमौन अरु ओका साथी ओखे ढुढन लग्या.
37 अरु जब उ मील्यो, ते ओकासे बोल्यो. सब दुन्या तोखे ढूडी रा हइ.
38 पन यीशु ने उनका से बोल्यो, “आ. हम अरु कही आस पास का गाव मे जाये, कि मी व्हा भी प्रचार कर्यु, क्युकी मी येकालिये ही आयो हइ.”
39 अरु उ पुरा गलील मे यहूदीयाहोन का आराधनालय मे जय जैयखे प्रचार करतो अरु बुरीआत्माहोन खे नीकलतो र्हियो.
कोढ का रोगी खे अच्छो करणो
40 अरु एक कोढ को रोगी यीशु का पास अयखे, ओकासे मदत मागी, अरु ओका सामने घुटना टेकीखे, ओकासे बोल्यो, “अगर तू चाह्ये ते मेखे अच्छो करी सकस हइ.”
41 यीशु ने ओका पर दया खैइ खे हात बडायो, अरु ओखे पकडी खे बोल्यो, “मी चाहुस हइ, तू अच्छो हुइ जा.”
42 अरु तुरुत ओकी कोढ सुधरते चली गइ, अरु उ अच्छो हुइ गयो.
43 तब यीशु ने ओखे कडी चेतावनी दिखे तुरुत बिदा कर्यो.
44 अरु ओकासे बोल्यो, “सुन, कोय से मत बोलनु, पन जैइखे अपना आप खे महायाजक खे बता, अरु अपना अच्छो होन का बारे मे जो कुछ मूसा ने ठैरायो हइ ओखे दान चेडा, कि उन पर गवाह हुये.”
45 पन उ इन्सान बाहेर जैइखे या बात को भोत प्रचार करण अरु ह्या तक फैलान लग्यो, कि यीशु फिर खुल्लमखुल्ला नगर मे नी जैइ सक्यो, पर बाहेर सुनसान जगा मे र्हियो. अरु चारी तरफ से दुन्या यीशु का पास आता र्हिया.