24
ಯೇಸು ಪುನರುತ್ಥಾನ್
(ಮತ್ತಾಯ್ 28:1-10; ಮಾರ್ಕ್ 16:1-8; ಯೊಹಾನ್ 20:1-10)
1 ತೀ ಬ್ಯಾಯ್ಕಾ ಮಾನ್ಸ ಸಬ್ಬತ್ ದಿಸಾತ್ ಕ್ಯಾಯ್‌ದ್ಯಾಚೆಗತ್ ಇಶ್ರಾಂತಿ ಗಿಹುನ್ ಆಯಿತ್ವಾರಿ ಸಕಾಳ್ಚ ಆಜು಼ನ್ ಕಾಳೊಕ್ ಆಸ್ಥಾನಾಸ್ ಆಪ್ನು ತಯಾರ್ ಕೆಲ್ಯಾಲ ವಾಸಾಚ಼ ತ್ಯಾಲ್ ಗಿಹುನ್ ಮಸುರ್ಡಿಪ ಆಲ್ಯಾ.
2 ತವಾ ಮಸುರ್ಡಿವ ಜಾಕ್‍ಲ್ಯಾಲಾ ದೊಂಢಾ ತಿಥ್ನಿ ಡಖಲ್ಯಾಲಾ ಬಗುನ್.
3 ಮಸುರ್ಡಿತ್ ಜಾ಼ವುನ್ ಬಕ್ತಾನಾ ಪ್ರಭು ಯೇಸುಚ಼ ಮಡ ದಿಸ್ಲ ನಾಹಿ.
4 ಹೆ ಗುಶ್ಟಿತ್ ತ್ಯನಾ ಗಡಗಬಡ್ ಜಾ಼ಲಿ ತವಾ ಚ಼ಕ್ಮಕ್ ತ್ಯಾಲ ಕಪ್ಡ ಗಾಲ್ಹುನ್ ದೊಗ ಗಡಿ ಗಾಪ್ನ ತ್ಯಂಚಿಪ ಉಬ ರಾಹಿಲ.
5 ತೀ ಬ್ಯಾಯ್ಕಾ ಮಾನ್ಸ ಭಿಹುನ್ ಆಪ್ಲಿ ತೊಂಡ ಖಾಲ್ ಕರುನ್ ಆಸ್ಥಾನಾ ತೇ ಗಡಿ ತ್ಯನಾ, “ಮರುನ್ ಜಿ಼ತ್ತಾ ಜಾ಼ಲ್ಯಾಲ್ಯಾಲಾ ಸೊದಾಚ಼ ಕ್ಯಾ?
6 ತ್ಯೊ ಹಿತ್ತ ನಾಹಿ ಉಟ್‌ಲ್ಯಾ ತ್ಯೊ ಆಜು಼ನ್ ಗಲಿಲಾಯಾತ್ ಆಸ್ಥಾನಾ ತುಮಾನಾ ಸಾಂಗ್‍ಲ್ಯಾಲ ಯಾದ್ ಕರಾ?
7 ಮಾನ್ಸಾಚಾ಼ ಲ್ಯೊಕ್ ಪಾಪಿ ಮಾನ್ಸಾಂಚಾ ಹಾತಾತ್ ದಿವುನ್ ಶಿಲ್ಬೆವ ಗಾಲ್ಹುನ್ ತಿನ್ವೆ ದಿಸಿ ಉಠುನ್ ಯನಾರ್” ಮನ್ಹುನ್ ಸಾಂಗ್ಲ.
8 ತವಾ ತ್ಯಾ ಬಾಯಿಲ್ ಮಾನ್ಸಾನಾ ತೇ ಸಬಾತ್ ಯದತ್ ಆಲ
9 ಆನಿ ಮಸುರ್ಡಿಪ್ನಿ ಮಾಗಾರ‍್ಯಾ ಜಾ಼ವುನ್ ತಿ ಖಬರ್ ಆಕ್ರಾ ಜಾ಼ನ್ ಶಿಶಾನಾ ಆನಿ ಬಾಕಿ ಸಗ್‍ಳ್ಯಾನಾ ಸಾಂಗ್ಲ.
10 ತೀ ಬ್ಯಾಯ್ಕಾ ಮಾನ್ಸ ಕೊನ್ ಕೊನ್ ಮಂಜೆ ಮಗ್ದಲಾಚಿ ಮರಿಯಾ, ಯೊಹಾನಿ, ಯಾಕೊಬಾಚಿ ಆಯಿ ಮರಿಯಾ ಹ್ಯಾಚ್ ಹ್ಯಂಚೆ ಸಂಗ ಆಸ್‍ಲ್ಯಾಲ್ಯಾ ದಿಸರ‍್ಯಾ ಬ್ಯಾಯ್ಕಾ ಮಾನ್ಸಾಂಚಾನಿ ಸಾಹಿತ್ ಶಿಶಾನಾ ತೀ ಖಬರ್ ಸಾಂಗ್ಲಿ.
11 ತ್ಯಂಚಾನಿ ಖರ ದರ್ಲ ನಾಹಿ; ತೇ ಸಬಾತ್ ತ್ಯನಾ ಮಸ್ಕರಿ ಆಸ ವಾಟ್ಲ.
12 ಫನ್ ಪೇತ್ರಾ ಉಠುನ್ ಮಸುರ್ಡಿಪ ಪಳತ್ ಜಾ಼ವುನ್ ವಾಕುನ್ ಬಗುನ್ ಮಡ್ಯಾಲಾ ಬ್ಯಾಂದ್‌ಲ್ಯಾಲಾ ಕಪ್ಡಾ ತ್ಯವ್ಡಾಸ್ ಬಗುನ್ ಚಾ಼ಲ್ಯಾಲೆ ಖಬರಿಲಾ ಆಪ್‌ಲ್ಯಾತ್ ಗಾಬ್ರುನ್ ನಿಗುನ್ ಗೆಲಾ.
ಎಮ್ಮಾಹುಚೆ ವಾಟವ
(ಮಾರ್ಕ್ 16:12-13)
13 ತೇಸ್ ದಿಸಿ ಯೇಸುಚೆ ಮಾಗ್ನಿ ಜಾ಼ತ್ಯಾಲ್ಯಾತ್ಲ ದೊಗ ಜಾ಼ನ್ ಯೆರುಸಲೇಮಿತ್ ಸಾತ್ ಮೈಲ್ ದುರ್ ಆಸ್‍ಲ್ಯಾಲೆ ಎಮ್ಮಾಹು ಮಂಥ್ಯಾಲ್ಯಾ ಖೆಡ್ಯಾಸ್ ಜಾ಼ಯಿತ.
14 ಚಾ಼ಲ್ಯಾಲ್ಯಾ ಹ್ಯಾ ಸಗ್‍ಳ್ಯಾ ಕಾಮಾ ಬದಲ್ ಬೊಲತ
15 ತ್ಯಂಚಾ ಬೊಲ್‍ನ್ಯಾತ್ ಇಚಾರ್ ಕರ್ತಾನಾ ಯೇಸು ಆಪ್ನುಸ್ ಜ಼ವಳ್ ಯವುನ್ ತ್ಯಂಚೆ ಸಂಗ ಗೆಲಾ
16 ಫನ್ ತ್ಯಂಚಾನಿ ಯೇಸುಲಾ ವಳಕ್ಲಾ ನಾಹಿ,
17 ಯೇಸುನಿ ತ್ಯನಾ, “ತುಮಿ ಯಕಾಮಾಕಾಲಾ ವಾಟನಿ ಜಾ಼ತಾನಾ ಕ್ಯಾ ಬೊಲತಾಸಾ?
ತವಾ ತೆ ಬೆಜಾರ್ ಕರುನ್ ಉಬ ರಾಯ್ಲ.
18 ತ್ಯಂಚಾತ್ ಕ್ಲೆಯೊಪ್ ಮಂಥ್ಯಾಲಾ ಯಕ್ಲಾ ತ್ಯಲಾ, “ಯೆರುಸಲೇಮಿತ್ ಆಲ್ಯಾಲ್ಯಾ ದುಸ್ರಿಕ್‍ಲ್ಯಾ ಸಗ್‍ಳ್ಯಾನಾ ಹ್ಯಾ ದಿಸಾತ್ ತ್ಯಾತ್ ಚಾ಼ಲ್ಯಾಲ್ಯಾ ಖಬರಿ ಠಾವ್ಯಾ ಹಾತ್ತಾ ಆನಿ ತುಲಾ ತ್ಯವ್ಡಸ್ ಠಾವ ನಾಹಿ ಕ್ಯಾ” ಮನ್ಹುನ್ ಇಚಾರ್ಲ.
19 ತವಾ ಯೇಸುನಿ ತ್ಯನಾ,
“ಕ್ಯಾ ಖಬರ್? ಮನ್ಹುನ್ ಇಚಾರ್ಲ ತ್ಯಲಾ ತೇ, “ನಜ಼ರೇತಿಚಾ ಯೇಸುಚಿ ಖಬರ್ ತ್ಯೊ ದೇವಾಚೆ ಮೊರ‍್ಹ ಆನಿ ಮಾನ್ಸಾಂಚೆ ಮೊರ‍್ಹ ಬಳಾಲಾ ಆನಿ ಬೊಲ್‍ನ್ಯಾಲಾ ಬರಾ ಪ್ರವಾದಿ ಹುತ್ತಾ ಆನಿ ತ್ಯನಿ ಸಾಂಗ್‌ಲ್ಯಾಚೆಗತ್ ಕೆಲ್ಯಾ.
20 ತ್ಯಲಾ ದೊನವ್ಯಾ ಯಾಜಕಾಂಚಾನಿ ಆಮ್ಚಾ ಅಧಿಕಾರಿಂಚಾನಿ ಮರ‍್ನಾಚಿ ಶಿಕ್ಶೆ ದಿವುನ್ ತ್ಯಲಾ ಶಿಲ್ಬೆವ ಗ್ಯಾತ್ಲಾ.
21 ಆಮಿ ತರಿ ಇಸ್ರಾಯಲ್ ಲೊಕಾನಾ ಶೊಡ್ನಾರಾ ತ್ಯೊಸ್ ಮನ್ಹುನ್ ಸಮಜು಼ನ್ ಗೆತಲ್ಯಾ ತ್ಯವ್ಡಸ್ ತ್ಯ ಕಾಮ್ ವ್ಹವುನ್ ಆಜ಼್ ತೀನ್ ದಿಸ್ ಜಾ಼ಲ.
22 ಫನ್ ಆಮ್ಚಾತ್ಲಿ ಥುಡಿ ಬ್ಯಾಯ್ಕಾ ಮಾನ್ಸ ಉಜಾ಼ಡ್ತಾನಾ ಮಸುರ್ಡಿಪ ಜಾ಼ವುನ್
23 ತ್ಯಚ಼ ಮಡ ತಿಥ ದಿಸ ನಸ್ಥಾನಾ ತಿಥ್ನಿ ಯವುನ್ ಆಪ್‌ಲ್ಯಾಲಾ ದೇವ್ದುತಾಂಚ಼ ದರ್ಶಾನ್ ಜಾ಼ಲ ಆನಿ ತ್ಯೊ ಜ಼ಗಲ್ಯಾ ಮನ್ಹುನ್ ತ್ಯಂಚಾನಿ ಸಾಂಗ್‍ಲ್ಯಾ ಮನ್ಹುನ್ ಸಾಂಗುನ್ ಆಮಾನಾ.
24 ಆಮ್ಚಿ ಸಂಗ ಆಸ್‍ಲ್ಯಾಲಿ ಥುಡಿ ಮಸುರ್ಡಿಪ ಜಾ಼ವುನ್ ತ್ಯಾ ಬಾಯಿಲ್ ಮಾನ್ಸಾನಿ ಸಾಂಗ್‍ಲ್ಯಾ ಶಾರ್ಕ ಬಗ್ಲ; ಮಸುರ್ಡಿ ಮುಕ್ಳಿ ಹುತ್ತಿ. ತ್ಯಲಾ ಮತರ್ ಬಗ್ಲಾನಾಹಿ ಮನ್ಹುನ್ ಸಾಂಗ್ಲ.
25 ತವಾ ಯೇಸು ತ್ಯನಾ, “ಆರ ಆಕಲ್ ಸಾಂಡ್ಯಾನು ಪ್ರವಾದಿಂಚಾನಿ ಸಾಂಗ್‍ಲ್ಯಾಲ್ಯಾ ಸಗ್‍ಳ್ಯಾವ ಇಸ್ವಾಸ್ ಥಿವಿ ನಸ್‍ಲ್ಯಾಲ್ಯಾ ಮದ್ದಡ್ ಮಾನ್ಸಾನು.
26 ಕ್ರಿಸ್ತಾನಿ ಆಸ್ಲ ತರಾಸ್ ಗಿವುನ್ ಆಪ್ಲೆ ಮೊಟೆ ಪದ್ವಿತ್ ಜಾ಼ಯಾಚಿ಼ ನಡ್ ಹುತ್ತಿ ನವ್ಹ ಮನ್ಹುನ್ ಸಾಂಗುನ್
27 ಮೊಶೆಚ಼ ಆನಿ ಸಗ್‍ಳ್ಯಾ ಪ್ರವಾದಿಂಚಾ ಪುತಿಕಾತ್ನಿ ಆಪ್ಲೆ ಖಬರಿಚಾ ವಳಕಿ ತ್ಯನಾ ಫುಡುನ್ ಸಾಂಗ್‍ಲ್ಯಾ.
28 ತೆ ಜಾ಼ತ್ಯಾಲ್ಯಾ ಗಾವಾಚೆ ಜ಼ವಳ್ ಆಲ ತವಾ ತ್ಯೊ ಮೊರ‍್ಹ ಜಾ಼ತ್ಯಾಲ್ಯಾಚೆಗತ್ ದಿಸ್ಲಾ.
29 ಫನ್ ತ್ಯಂಚಾನಿ, “ಆಮ್ಚಿ ಸಂಗ ರ‍್ಹಾ ಶಾಂಜ಼್ ಜಾ಼ಲ್ಹೆ ದೀಸ್ ಮಾವ್ಳತ್ ಆಲಾ” ಮನ್ಹುನ್ ತ್ಯಲಾ ಸಾಂಗುನ್ ಬಳ್ಕೆಲ ತವಾ ತ್ಯೊ ತ್ಯಂಚಿ ಸಂಗ ರಾಹ್ಯಾ ಗಾವಾತ್ ಗೆಲಾ.
30 ಯೇಸು ತ್ಯಂಚಿ ಸಂಗ ಖಾಯಾ ಬಸ್ಲಾ ತವಾ ಬಾಕ್ರಿ ಗಿಹುನ್ ದೇವಾಲಾ ಉಪ್ಕಾರ್ ಕರುನ್ ಮುಡುನ್ ತ್ಯನಾ ದಿಲಿ,
31 ತವಾ ತ್ಯಂಚ಼ ಡೊಳ ಉಗಾಡ್ಲ. ಆನಿ ತ್ಯಂಚಾನಿ ತ್ಯಲಾ ವಳಕ್ಲಾ; ತ್ಯೊ ತ್ಯಂಚಾ ಡೊಳ್ಯಾನಾ ಆಡಶಾ ಜಾ಼ಲಾ.
32 ತವಾ ತೇ ಯಕಾಮಕಾಲಾ, “ತ್ಯೊ ವಾಟವ ಆಮ್ಚೆ ಸಂಗ ಬೊಲ್ಲಾ ತವಾ ಪ್ರವಾದಿಂಚಾ ಪುತೀಕಾಚ಼ ಅರ್ಥ ಆಮಾನಾ ಫುಡುನ್ ಸಾಂಗ್ಲ. ತವಾ ಆಮ್‌ಚ಼ ಮನ್ ಆತ್ಲೆ ಆತ್ ಉಖ್ಳತ ನವ್ಹ? ಮನ್ಲ.
33 ತವಾಸ್ ತೇ ದೊಗ ಉಠುನ್ ಯೆರುಸಲೇಮಿತ್ ಮಾಗಾರ ಪರ್ತುನ್ ಗೆಲ. ತಿಥ ಆಕ್ರಾಜಾ಼ನ್ ಶಿಶಾ ತ್ಯಂಚಿ ಸಂಗ ಆಸ್‍ಲ್ಯಾಲ ಯಕಿಕ್ಡ ಜ಼ಮ್ಲ
34 “ಪ್ರಭು ಮೆಲ್ಯಾಲ್ಯಾತ್ನಿ ಉಟ್‍ಲ್ಯಾಲಾ ಖರ; ತ್ಯೊ ಸಿಮೊನಾಲಾ ದಿಸ್ಲಾ ಮನ್ಹುನ್ ಸಾಂಗಿತ್ ಹುತ್ತ.
35 ತ್ಯ ಬಗುನ್ ತ್ಯಂಚಾನಿ ವಾಟವ ಚಾ಼ಲ್ಯಾಲಿ ಖನ್ಕತ್ ಆನಿ ಬಾಕ್ರಿ ಮ್ಯೊಡ್ತಾನಾ ಆಪ್ನು ತ್ಯಲಾ ವಳಕ್‍ಲ್ಯಾಲ ಫುಡುನ್ ಸಾಂಗ್ಲ.
ಯೇಸು ಆಪಲ್ಯಾ ಶಿಶಾನಾ ದಿಸಲ್ಯಾಲಾ
(ಮತ್ತಾಯ್ 28:16-20; ಮಾರ್ಕ್ 16:14-18; ಯೊಹಾನ್ 20:19-23; ಅಪೊಸ್ತಲ್ 1:6-8)
36 ತೇ ಹಿ ಖನ್ಕತ್ ಬೊಲ್ತಾನಾ ತ್ಯಂಚೆ ಮದ್ದಿ ಯೇಸು ಪಾಕ್ಕನ್ ಉಬಾರಾಹುನ್ “ತುಮಾನಾ ಸಮಾದಾನ್ ವ್ಹವುನಿ” ಮನ್ಹುನ್ ತ್ಯನಾ ಸಾಂಗ್ಲ.
37 ತೇ ಬಿಹುನ್ ಆಪ್ನು ಬಗ್‍ತ್ಯಾಲ ಭುತ್ ಮನ್ಹುನ್ ಸಮಜು಼ನ್ ಗೆತ್ಲ.
38 ಯೇಸುನಿ ತ್ಯನಾ, “ಕಾ ಬಿಹ್ಯಾಲಾಸಾ? ತುಮ್ಚಾ ಮನಾತ್ನಿ ಅನ್ಮಾನ್ ಕಾ ಯತೊ?
39 ಮಾಜ಼ ಹಾತ್ ಪ್ಯಾ ಬಗಾ, ಮಿಸ್ ನವ್ಹ. ಮನಾ ಹಾತ್ ಲಾವುನ್ ಬಗಾ, ತುಮಾನಾ ದಿಸತ್ಯಾ ಶಾರ್ಕ ಮನಾ ಹಾಡ್ ಮಾಸ್ ಹಾತ್ತ; ತ್ಯ ಭುಥಾಲಾ ನಾಹಿ ಮನ್ಹುನ್ ಸಾಂಗ್ಲ.
40 ತ್ಯ ಸಾಂಗ್‍ಲ್ಯಾ ನಂತರ್ ತ್ಯನಿ ತ್ಯನಾ ಆಪ್ಲ ಹಾತ್ ಪ್ಯಾ ದ್ಯಾವ್ಲ.
41 ಫನ್ ತೇ ಆನಂದ್ ಜಾ಼ಲ್ಯಾಲ್ಯಾಸ್ ಲಾಗುನ್ ತ್ಯನಾ ಖರ ದರ್ಲ ನಾಹಿ ಮನ್ಹುನ್ ತ್ಯನಿ ಖಾತ್ಯಾಲಾ ಜಿನೊಸ್ ಕಾಯ್ ತರಿ ಹಿತ್ತ ತುಮ್ಚಿಪ ಹಾ ಕ್ಯಾ ಮನ್ಹುನ್ ತ್ಯನಾ ಇಚಾರ್ಲ.
42 ತವಾ ತ್ಯಂಚಾನಿ ಬ್ಯಾಜ಼ಲ್ಯಾಲ್ಯಾ ಬಾಂಗ್‍ಡ್ಯಾಚಾ಼ ಯೊಕ್ ತುಕ್ಡಾ ತ್ಯಲಾ ದಿಲಾ.
43 ತ್ಯನಿ ಗಿಹುನ್ ತ್ಯಂಚೆ ಮೊರ‍್ಹ ಖಾಲಾ
44 ಮಂಗ್ ತ್ಯೊ, “ಮಿ ತುಮ್ಚೆ ಸಂಗ ಆಸ್ಥಾನಾ ಹ್ಯ ಸಗ್ಳ ತುಮಾನಾ ಸಾಂಗ್ಲ ನವ್ತ ಕ್ಯಾ? ಮಾಜಿ ಖಬರ್ ಮೊಶೆಚಾ ಕ್ಯಾಯ್‌ದ್ಯಾತ್ ಪ್ರವಾದಿಂಚಾ ಗ್ರಂಥಾತ್ ಕಿರ್ತಾನಾತ್ನಿ ಲಿವ್‍ಲ್ಯಾಲ ಸಗ್ಳ ವ್ಹಯಾಚಿ ನಡ್ ಹಾ ಮನ್ಹುನ್ ತುಮಾನಾ ಸಾಂಗ್ಲ ನವ್ಥ” ಮನ್ಲಾ.
45 ತ್ಯಾ ನಂತರ್ ತ್ಯಂಚಾನಿ ಧರ್ಮ ಶಾಸ್ತಾರಾತ್ಲ ಸಬಾತ್ ಸಮಜ಼ ಜೊ಼ಗ ತ್ಯನಿ ತ್ಯಂಚ಼ ಗಿನ್ಯಾನ್ ಉಗ್ಡುನ್.
46 ತ್ಯನಾ, “ಕ್ರಿಸ್ತ ತರಾಸ್ ಗಿವುನ್ ಮರುನ್ ತಿನ್ವೆ ದಿಸಿ ಜಿತ್ತಾ ವ್ಹವುನ್ ಉಠುನ್ ಯನಾರ್ ಮನ್ಹುನ್.
47 ಪಾಪ್‍ ಮಾಪ್ ಕರಾಯಾ ಪಶ್ಚಾತಾಪಾನಿ ದೇವಾಕ್ಡ ಪರ್ತಾಹ್ವಯಿ ಆನಿ ತ್ಯಚಿ ಬರಿ ಖಬರ್ ಹೆ ಸಬಾತ್ ಯೆರುಸಲೇಮಿ ದರ‍್ನಿ ಸಗ್‍ಳ್ಯಾ ಪರಪಂಚಾತ್ ತ್ಯಚಾ ನಾವಾನಿ ತ್ಯಚಿ ಖಬರ್ ಸಾಂಗ್ನಾರ್ ಮನ್ಹುನ್ ಲಿವ್ಲ್ಯಾ.
48 ಹೆ ಗುಶ್ಟಿನಾ ತುಮಿಸ್ ಸಾಕ್ಶಿ ವ್ಹನಾರ್.
49 ಆನಿ ಆತಾ ಮಾಜಾ ಬಾನಿ ತುಮಾನಾ ಯೊಕ್ ಸಬ್ದ ದಿಲ್ಯಾ ತ್ಯೊ ತುಮಾನಾ ಲಾವುನ್ ದೇತೊ. ದೇವ್ ಪರಲೊಕಾತ್ನಿ ತುಮಾನಾ ಬಳ್ ದಿಯಿ ಪರ‍್ಯಾತ್ ಹೆ ಯೇರುಲೇಮಿತುಸ್ ರಾಖಿತ್ ರಾವ್ಹಾ ಮನ್ಹುನ್ ಸಾಂಗ್ಲ.
ಯೇಸುಚ಼ ಪರಲೊಕಾತ್ ಜಾ಼ನ
(ಮಾರ್ಕ್ 16:19-20; ಅಪೊಸ್ತಲ್ 1:9-11)
50 ಆನಿ ಯೇಸುನಿ ತೆ ಪೆಠ್ಹತ್ನಿ ಬಾಹಿರ್ ತ್ಯನಾ ಬೆತಾನ್ಯಾ ಯವ್‌ಡ್ಯಾತ್ ತ್ಯನಾ ಗಿಹುನ್ ಜಾ಼ವುನ್ ಆಪ್ಲ ಹಾತ್ ಉಚ್ಲು಼ನ್ ತ್ಯನಾ ಆಶಿರ್ವಾದ್ ಕೆಲಾ.
51 ಆಶಿರ್ವಾದ್ ಕರ್ತಾನಾ ತ್ಯೊ ತ್ಯನಾ ಸುಡುನ್ ಪರಲೊಕಾತ್ ಗೆಲಾ.
52 ತ್ಯಂಚಾನಿ ತ್ಯಲಾ ಆರಾದನ್ ಕರುನ್ ಮೊಟ್ಯಾ ಹೌಸನಿ ಯೆರುಸಲೇಮಿತ್ ಪರತ್ ಗೆಲ.
53 ಆನಿ ತೇ ದೇವ್ಳಾತ್ ದೇವಾಲಾ ಖಾಯಿಮ್ ವವ್ಯಾಳಿತ್ ರಾಯ್ಲ.