15
Malayka’gɨ kɨ siri kɨ nya tujɨ lo’gɨ kɨ dɔboy’tɨ ji’de’tɨ
1 M’oo nyakɔjɨ madɨ kɨ rangɨ kibo, to ətɨ ɓol dɔran’tɨ. Malayka’gɨ siri uwəi nya tujɨ lo’gɨ siri ji’de’tɨ tɔ. In dɔboy nya tujɨ lo’gɨ, tadɔ in ingɨ ə wongɨ lə Luwə a tɔl’n ta’ne.
2 Go’tɨ, m’oo mann ba kɨ to to nya kɨ ɓari’ə kirisital be, pole nan kɨ por. Ningə dɔ mann’tɨ kakin, nje tətɨ rɔ da, kɨ kagɨ yo li’ə, kɨ kɔr nya kɨ tɔjɨ tɔ’a, uwəi kende lə Luwə ji’de’tɨ.
3 Osi pa lə *Mojɨ kɨ njekuləɓər lə Luwə, kɨ pa lə Ngonn batɨ eyina:
«Burəɓe Luwə kɨ nje tɔgɨ pətɨ,
Kulə ra’a’gɨ bo ngayn, ətɨ ɓol kɨ dum!
In Ngar dɔ ginn ɓe’gɨ’tɨ pətɨ,
Nyara’gɨ lə’i in nyara kɨ dana, kɨ kɨ rɔta’tɨ.
4 In Burəɓe, nan ə asɨ kadɨ ɓol ndil’i el wa?
Nan ə a mbətɨ kulə tɔjɨ dɔ’i’tɨ wa?
Tadɔ in kɨ kar’i ba ə in de kɨ ar njay,
Ginn ɓe’gɨ pətɨ a rei kadɨ ɔsi məkəsɨ’de nanga non’i’tɨ.
Tadɔ kulə ra’i’gɨ kɨ dana toi kɨ taga takum’de’tɨ.»
5 Go’tɨ, m’oo ta Kəy lə Luwə kɨ *kəyku kulə nojɨ lə Luwə in me’tɨ, te ta’ne dɔran’tɨ.
6 Malayka’gɨ kɨ siri kɨ uwəi nya tujɨ lo’gɨ kɨ siri ji’de’tɨ tei, me Kəy’tɨ lə Luwə kɨ taga. Ɔyi ku len kɨ nda kɨ sigɨ ba, nda kɨ ətɨ ɓol, ningə dɔi rɔ’de kɨ ndar ɔr.
7 Kɨ kare dann nya’gɨ’tɨ kɨ nje kisɨ kumngayira kɨ sɔ adɨ malayka’gɨ kɨ siri kɔpɨ’gɨ kɨ rai’de kɨ ɔr siri, to kɔpɨ’gɨ kɨ wongɨ lə Luwə kɨ nje kisɨ dɔkagilo’gɨ kɨ dɔkagilo’gɨ, rosɨ.
8 Sa rosɨ Kəy lə Luwə to nya kɨ tɔjɨ tɔɓar kɨ tɔgɨ lə Luwə. De asɨ kadɨ ur me Kəy’tɨ lə Luwə el bitɨ kadɨ nya tujɨ lo’gɨ kɨ siri kɨ malayka’gɨ kɨ siri uwəi ji’de’tɨ kin tɔlita kulə lə’de ɓay taa.