Η Καινή Διαθήκη 1 Timothy 5

Relationships

1 Πρεσβυτέρῳ μὴ ἐπιπλήξῃς, ἀλλὰ παρακάλει ὡς πατέρα, νεωτέρους ὡς ἀδελφούς, 2 πρεσβυτέρας ὡς μητέρας, νεωτέρας ὡς ἀδελφάς, ἐν πάσῃ ἁγνείᾳ.

Honor true widows

3 Χήρας τίμα τὰς ὄντως χήρας. 4 Εἰ δέ τις χήρα τέκνα ἢ ἔκγονα* ἔχει, μανθανέτωσαν πρῶτον τὸν ἴδιον οἶκον εὐσεβεῖν καὶ ἀμοιβὰς ἀποδιδόναι τοῖς προγόνοις, τοῦτο γάρ ἐστιν† ἀπόδεκτον ἐνώπιον τοῦ Θεοῦ. 5 Ἡ δὲ ὄντως χήρα καὶ μεμονωμένη ἤλπικεν ἐπὶ τὸν‡ Θεόν, καὶ προσμένει ταῖς δεήσεσιν καὶ ταῖς προσευχαῖς νυκτὸς καὶ ἡμέρας. 6 Ἡ δὲ σπαταλῶσα ζῶσα τέθνηκεν.

7 Καὶ ταῦτα παράγγελλε, ἵνα ἀνεπίληπτοι§ ὦσιν. 8 Εἰ δέ τις τῶν ἰδίων, καὶ μάλιστα τῶν* οἰκείων, οὐ προνοεῖ, τὴν πίστιν ἤρνηται καὶ ἔστιν ἀπίστου χείρων.

9 Χήρα καταλεγέσθω μὴ ἔλαττον ἐτῶν ἑξήκοντα γεγονυῖα, ἑνὸς ἀνδρὸς γυνή, 10 ἐν ἔργοις καλοῖς μαρτυρουμένη—εἰ ἐτεκνοτρόφησεν, εἰ† ἐξενοδόχησεν, εἰ ἁγίων πόδας ἔνιψεν, εἰ θλιβομένοις ἐπήρκεσεν, εἰ παντὶ ἔργῳ ἀγαθῷ ἐπηκολούθησεν.

About younger widows

11 Νεωτέρας δὲ‡ χήρας παραιτοῦ· ὅταν γὰρ καταστρηνιάσωσιν τοῦ Χριστοῦ, γαμεῖν θέλουσιν, 12 ἔχουσαι κρῖμα ὅτι τὴν πρώτην πίστιν ἠθέτησαν. 13 Ἅμα δὲ καί, ἀργαὶ μανθάνουσιν, περιερχόμεναι τὰς οἰκίας· οὐ μόνον δὲ ἀργαί, ἀλλὰ καὶ φλύαροι καὶ περίεργοι, λαλοῦσαι τὰ μὴ δέοντα. 14 Βούλομαι οὖν νεωτέρας§ γαμεῖν, τεκνογονεῖν, οἰκοδεσποτεῖν, μηδεμίαν ἀφορμὴν διδόναι τῷ ἀντικειμένῳ λοιδορίας χάριν. 15 (Ἤδη γάρ τινες ἐξετράπησαν ὀπίσω τοῦ Σατανᾶ.)

16 Εἴ τις πιστὸς ἢ * πιστὴ ἔχει χήρας, ἐπαρκείτω αὐταῖς καὶ μὴ βαρείσθω ἡ ἐκκλησία, ἵνα ταῖς ὄντως χήραις ἐπαρκέσῃ.

Honor elders

17 Οἱ καλῶς προεστῶτες πρεσβύτεροι διπλῆς τιμῆς ἀξιούσθωσαν, μάλιστα οἱ κοπιῶντες ἐν λόγῳ καὶ διδασκαλίᾳ. 18 Λέγει γὰρ ἡ Γραφή· «Βοῦν ἁλοῶντα† οὐ φιμώσεις,» καὶ «Ἄξιος ὁ ἐργάτης τοῦ μισθοῦ αὐτοῦ.»

19 Κατὰ πρεσβυτέρου κατηγορίαν μὴ παραδέχου ἐκτὸς εἰ μὴ ἐπὶ δύο ἢ τριῶν μαρτύρων. 20 Τοὺς ἁμαρτάνοντας ἐνώπιον πάντων ἔλεγχε, ἵνα καὶ οἱ λοιποὶ φόβον ἔχωσιν.

Watch your step

21 Διαμαρτύρομαι ἐνώπιον τοῦ Θεοῦ καὶ Κυρίου Ἰησοῦ Χριστοῦ‡ καὶ τῶν ἐκλεκτῶν ἀγγέλων ἵνα ταῦτα φυλάξῃς χωρὶς προκρίματος, μηδὲν ποιῶν κατὰ πρόσκλισιν.§ 22 Χεῖρας ταχέως μηδενὶ ἐπιτίθει, μηδὲ κοινώνει ἁμαρτίαις ἀλλοτρίαις. Σεαυτὸν ἁγνὸν τήρει.

23 Μηκέτι ὑδροπότει, ἀλλ᾿* οἴνῳ ὀλίγῳ χρῶ διὰ τὸν στόμαχόν σου† καὶ τὰς πυκνάς σου ἀσθενείας.

24 Τινῶν ἀνθρώπων αἱ ἁμαρτίαι πρόδηλοί εἰσιν, προάγουσαι εἰς κρίσιν, τισὶν δὲ καὶ ἐπακολουθοῦσιν. 25 Ὡσαύτως καὶ τὰ καλὰ ἔργα‡ πρόδηλά ἐστιν·§ καὶ τὰ ἄλλως ἔχοντα κρυβῆναι οὐ δύνανται.*

* 5:4 εκγονα rell ¦ εγγονα [10%] † 5:4 εστιν f35 ℵA,C [85%] RP,HF,NU ¦ 1 καλον και [5%] OC,TR,CP ¦ καλον και 1 [10%] ‡ 5:5 τον f35 A [97%] RP,HF,OC,TR,CP ¦ — ℵC [3%] NU § 5:7 ανεπιληπτοι f35 [97%] RP,HF,OC,TR,CP ¦ ανεπιλημπτοι ℵA,C [3%] NU * 5:8 των f35 C [97%] RP,HF,OC,TR,CP ¦ — ℵA,I,048 [3%] NU † 5:10 ει rell ¦ η [2%] CP ‡ 5:11 δε rell ¦ — [10%] § 5:14 νεωτερας f35 ℵA,C [85%] RP,HF,OC,TR,NU ¦ 1 χηρας [15%] CP * 5:16 πιστος η f35 (97.6%) RP,HF,OC,TR,CP ¦ — ℵA,C,048 (2.2%) NU ¦ one other variant (0.2%) (Might the ‘Alexandrian’ variant be the result of homoioarcton?) † 5:18 ἁλοωντα f35 [30%] ¦ ἀλοωντα rell ¦ αλοουντα [5%] (The noun equivalent is everywhere spelled with rough breathing; since collators have generally not registered aspiration, it is hard to know what the witness of the mass of minuscules may be.) ‡ 5:21 κυριου ιησου χριστου f35 [95%] RP,HF,OC,TR,CP ¦ 23 [2%] ¦ ~ 32 ℵA [3%] NU (Is not the full form more appropriate for a solemn charge?) § 5:21 προσκλισιν f35 ℵ [25%] TR,CP,NU ¦ προσκλησιν f35pt A [75%] RP,HF,OC * 5:23 αλλ f35 [97%] RP,HF,OC,TR,CP ¦ αλλα ℵA [3%] NU † 5:23 σου f35 [96%] RP,HF,OC,TR,CP ¦ — ℵA [4%] NU ‡ 5:25 καλα εργα f35 [95%] RP,HF,OC,TR,CP ¦ ~ 2 τα 1 ℵA [5%] NU § 5:25 εστιν f35 [80%] RP,HF,OC,TR,CP ¦ εισιν [10%] ¦ — ℵA [10%] NU * 5:25 δυνανται f35 A [70%] RP,HF,OC,NU ¦ δυναται ℵ [30%] TR,CP