14
A Hosea e Nongigira na Israel Kara Visutugua i Konina God
1 Igamu na tinoni ni Israel kamu visumaitugua i konina na Taovia nimui God. Nimui sasi segeni nogo e naua mamu gini tubulagi mamu puka.
2 Kamu visumai i konina na Taovia, ma kamu tsaria na nonginongi iani ngiti sausau vania: “Kiki Taovia, ko padalegira sui nimami sasi, mo ko tabedoua nimami nonginongi, migami sauba kami tsonikaego vaga ami veke vanigo nogo i sau.
3 Asiria e utu saikesa ke maurisigami, migira na ose na vailabu e utu kara isutugumami. Migami e utu saikesa goto kami tsarivanigira nimami god peropero laka igira nogo nimami God. Migoe Taovia, ko galuvegami rongona igami ami vaga moa na baka tinamate me tagara goto kesa ke reitutugugami.”
Na Taovia e Vekea na Mauri Vaolu Vanigira na Israel
4 Ma na Taovia e tsaria,
“Inau sauba kau adivisumaigira tugua niqu tinoni i koniqu.
Sauba kau galuvegira tana tobaqu popono,
rongona au tau nogo kore vanigira.
5 Me sauba kau vaga na usa e tumu tana kao mamatsa vanigira na tinoni ni Israel.
Igira sauba kara tavuresi vaga moa na tsitsi,
ma kara lamuga kakai vaga moa na gai ni Lebanon.
6 Sauba igira kara dato vaolu ma kara mamauriga,
ma kara rereidou vaga na gai na olive.
Ma na vuruqira ke sigini dou vaga moa na gai na sida ni Lebanon.
7 Me sauba kara totudoutugua i vavana niqu reitutugu.
Me sauba ke danga dou na mutsa tana niqira uta,
ma na daleqira kara danga vaga moa na vuana uaeni tana itaina.
Sauba ke tangi gaqira rongo vaga moa na uaeni ni Lebanon.
8 Na tinoni ni Israel sauba kara tau goto ba samasama vanigira na god peropero.
Minau sauba kau rongomia niqira nonginongi ma kau reitutugugira.
Me sauba kau ravisigira vaga moa na gai tamumu,
rongona inau nogo na pukuna pipi sui na omea dou vanigira.”
Na Susuina Goko
9 Asei ti vaga ke sasaga, maia sauba ke padagadovia na omea ara totu tana papi iani, me ke puku kalavatavia i tobana. Nina omeomea na Taovia ara gotolaka sui, migira na tinoni e gotolaka niqira sasaga ara mauri murigira. Migira moa na tinoni sasi ara tubulagi mara puka rongona ara tau nogo gini boeginigira.