3
A Hosea e Padalea Nina Sasi na Tauna
1 Na Taovia e tsarivaniau inau, “A Hosea igoe, ko vano mo ko adivisutugua na taumu aia e kiboga kolua kesa mane segeni. Nimu aqo igoe ko galuvea vaga nogo inau au galuvegira moa na tinoni ni Israel, atsa moa ti igira ara pilo bâ i koniqira na god peropero, mara reingaoa na savoriana niqira vuana uaeni makede vaniaqira na titinonina niqira god peropero.”
2 Mi tana, minau au tû mau ba volivisuginia na tauqu e 15 tavina siliva me 150 kilo na barli.
3 Mau tsarivania, “Atsa moa ti igoe na tauqu manana ma nimu aqo nomoa ti ko totu lê oka mo ko pituau, mo ko tau goto naua na aqo mala rebi ma na kiboga. Minau sauba kau totu pitugo moa.”
4 Me vaga saikesa goto ia, igira na tinoni ni Israel niqira aqo nomoa kara totu lê oka, me ke tagara sa niqira taovia tsapakae, se sa niqira ida, me ke tagara goto na savori-kodoputsa, se na tuguru vatu tabu, tagara na titinonina se na nununa sa god peropero gana na gini aqo tana basutidao.
5 Me sauba ke labamai na tagu i tana igira na tinoni ni Israel kara pilovisutugua i konina na Taovia niqira God, mi konina kesa niqira taovia tsapakae aia na kukuana a David. Mi muri ti igira kara kukuni tania na Taovia, maia ke vangalaka vanigira tugua.