12
A Jeremia e Torogoko Konina na Taovia
1 “Taovia, e gotolaka saikesa pipi nimu pede,
me gini tau ulagaqu inau na vaimangabarigi kolugo.
Mau ngaoa nomoa kau torogoko i konimu tana rongona visana na omea inau au tau padagadovigira.
?Laka egua ti ara tamani omea danga igira na tinoni vanga tsutsukibo?
?Me laka egua ti igira na tinoni vanga tabaru ara tangomana tana omea sui ara naua?
2 Igoe nogo o tsukagira, mara lamuga dou;
ara dato magobu mara molo vuaqira.
Mara gini goko dou pipi kalina tana rongomu igoe,
eo, me atsa moa ara nauvaganana ia, ma na papadaqira ara totu ao tanigo.
3 Bâ, migoe Taovia o donaginiau nogo inau;
mo morosigira sui na omea inau au naugira,
mo donaginigotoa laka inau au galuvego.
Mi kalina ia inau au nongigo ko raqaligigira na tinoni vanga tsutsukibo girani
vaga na sipi ara raqavanogira tana nauna i tana kara matesigira;
ko tangoligira poi tsau ke laba na dani igoe o titinogoa vania na labumatesiaqira.
4 ?Laka ke oka koegua sagata ke makede nimami kao igami,
ma kara matsele na buruburu pipi tana poi?
Igira na omea tuavati ma na manu ara viri mate
tana rongona nogo niqira sasaga tabaruga igira nimami tinoni,
igira ara tsaria, ‘God e tau saikesa reigira na omea igita a naugira.’ ”
5 Ma na Taovia e tsaria,
“?A Jeremia, ti vaga igoe o gini kolae na ulo vaikerigi koluaqira na tinoni,
megua ti ko tangomana na ulo vaikerigi koluaqira goto na ose?
?Ti vaga igoe ko tau tangomana na tû dou tana kao mangasâ,
me sauba ko nau koegua tana goana atsi ligisana na Kô Jordan?
6 Me atsa moa igira na kulamu, ma na tinoni i laona nimu vungu,
migira goto ara sauligigo; mara sangâ na baginiamu igoe.
Ko laka saikesa na noruaqira, atsa moa ti igira ara goko lakalaka dou kolugo.”
Na Taovia e Melu Tana Rongoqira Nina Tinoni
7 Na Taovia e tsaria,
“Inau au tsonikidaqira nogo na Israel;
mau sove saikesa tania na puku na tinoni inau vilinogoa.
Inau au livugira nogo na tinoni au galuvegira tana limaqira gaqira gala.
8 Igira niqu tinoni vivili ara piloligi taniau inau;
mara kangamai i koniqu vaga saikesa moa na laeone tana legai atsi,
me vaga ia, minau au gini reisavi sosongoligira.
9 Igira niqu tinoni vivili ara vaga kesa na manu
igira na manuloki ara takuvipolia gana kara matesia.
!Ko bâ, mo ko soagira na omea tuavati atsi
kara mai sanga na kavomutsa ia!
10 Ara danga na tagaovera ni veratavosi ara mai toroutsania niqu uta na uaeni,
mara tsogorivela bamaigira niqu uta;
mara naua ma niqu kao laka dou e gini lia na kaomate.
11 E totu mangu lê i mataqu
me tagara goto sa tinoni ke totuvia.
Na butona kao popono e lia nogo na kaomate,
me tau goto gini boe ke kesa.
12 Me taligu popono tana tetena i laona na kaomate
ara alamai igira na tinoni vanga komi.
Ma niqu isi segeni nogo inau au toroutsaniginia na kao popono;
me gini tau tangomana ke kesa ke totu tana rago.
13 Igira niqu tinoni ara rasavaginia na vatuna uiti,
mara angunikolugira moa na buruburu seko.
Ara aqo kakai sosongo me tau goto pelugira niqira rota.
E tau saikesa vungu dou niqira uiti
tana rongona niqu momosatoba loki vanigira.”
Na Omea e Vekea na Taovia Vanigira Ara Totu Varangisigira na Israel
14 Na Taovia e tsaria, “Inau au ngaoa na tsariana kesa na omea tana rongoqira na tinoni ara totu varangisigira na Israel. Igira ara sekolia na butona kao inau au sauvanigira nogo niqu tinoni ni Israel. Eo, sauba kau vutiligigira na tinoni vanga tsutsukibo girani tania niqira kao, vaga saikesa moa kalina ara vutiligia na omea tsukatsuka, ma kau laumaurisia na Juda tanigira.
15 Bâ, mi murina kalina kau vutiligigira sui, me sauba kau galuvegira tugua. Sauba kau adivisugira pipi na puku tana niqira kao segeni, mi tana veraqira segeni.
16 Me ti vaga igira kara tabea tana tobaqira popono niqira lotu niqu tinoni, ma kara gini vatsa tana asaqu inau ma kara tsaria, ‘Vaga nogo e mauri na Taovia’, vaga ara sasaniginigira nogo niqu tinoni kara naua vania Baal, bâ, mi tana ti kau tamivanigira kara totudoutugua i laoqira niqu tinoni.
17 Me ti vaga sa puku tavosi ke sove na rongomangaqu, minau sauba kau vutiligi saikesalia, ma kau toroutsania. Inau nogo na Taovia au tsaria na omea iani.”