14
Na Uvirau Seko Sosongo
1 Na Taovia e tsaria na omea iani vaniau, inau a Jeremia, tana rongona na uvirau e gadovia na Juda.
2 Aia e tsaria,
“Na Juda e tangitangi,
migira nina verabau ara viri mate,
ma na tinonina ara viri tsaro lê tana kao tana melu loki,
maia na Jerusalem e ngangaidato vania na Taovia ke sangâ.
3 Igira na tinoni ara tamani omea danga
ara molovanogira niqira tinoni aqo kara ba sao kô;
migira ara vano tana tuvu mara tau goto ba reia sa kô;
mara adivisu lea moa niqira popovatu.
Ara vangamâ, me ponopala na tobaqira,
mara tsavupoia na mataqira.
4 Mi tana rongona e tau tumu na usa
me gini makede na kao,
e gini seko sosongo goto na tobaqira igira na tinoni aqo kao,
mara tsavupoigotoa na mataqira.
5 Mi laona na poi igira na dia vasusu
ara mololea na daleqira botsa vaolu
rongona e tagara goto sa buruburu i tana.
6 Migira na asi atsi ara tû i kelaqira na tetena
me datokesa na mamagoqira vaga moa na pai atsi,
ma na mataqira e tau nogo moro maka, rongona e tagara sa gaqira mutsa.
7 Migira niqu tinoni ara ngangaidato vaniau mara tsaria,
‘Atsa moa ti igira nimami sasi ara tai matamami,
ami nongigo moa Taovia ko sangagami moa vaga igoe o vekenogoa.
Igami ami piloligi tanigo nogo danga kalina,
mami sasi sosongo i matamu.
8 Migoe segeni moa nimami amesi igami na tinoni ni Israel.
Migoe segeni lelê moa tangomana ko maurisigami tania na omea seko loki.
?Me laka egua ti o vaga moa na tinoni labana tana veramami igami,
me vaga moa na tinoni tavetada e mai me maturu bongi kesa moa?
9 ?Megua goto ti o vaga moa na tinoni e ponopala tobana,
me vaga na mane vaumate e tau nogo susuliga na tuliusiaqira na gala?
!Igami ami tutunina nomoa laka igoe Taovia o totu moa kolugami!
Igami nimu tinoni nogo,
mami nongigo ko laka na tsonikidamami.’ ”
10 Ma na Taovia e tsarigotoa tana rongoqira na tinoni girani, “Igira ara ngaoa moa kara tsogo taniau inau, mara tau goto dona kara tagaovi segeniqira. Me vaga ia, minau au tau saikesa reingaogira. Me sauba e utu kau padalegira na omea seko ara naua, ma kau kedegira tana rongona niqira sasi.”
11 Mi muri, ma na Taovia e tsarivaniau, “Ko laka goto na nongiaqu kau sangagira na tinoni girani.
12 Me atsa moa ti kara tsoni vitoaqira segeni, minau sauba e utu goto kau rongomia niqira ngangaidato vaniau laka kau sangagira. Me atsa moa goto ti kara savorigira vaniau na savori-kodokodo, ma na sausau na uiti, minau e utu goto kau reingaogira. Tagara. Sauba moa kau matesigira tana vailabu, ma na liuna na vitoa, ma na lobogu.”
13 Mi tana, minau au tsarivania, “Taovia God igoe o donagininogoa laka igira na propete ara tsarivanigira na toga laka sauba ke tau goto laba na vailabu, se na liuna na vitoa, rongona igoe nogo o vekea laka sauba ke totu moa na rago i laona na veramami.”
14 Bâ, ma na Taovia e tsarivaniau, “Na propete girani, ara goko pero moa tana asaqu inau. Inau au tau saikesa molovanogira, mau tau goto moloketsa vanigira se kau tsarivanigira goto sa tsaqina goko. Ma na omea ara tsaria laka ara morosia tana bolebole ara tau saikesa talumai i koniqu inau. Niqira kategoko ara talu moa tana niqira papada segeni, mara tau saikesa tamanina sa rongona.
15 Inau nogo na Taovia au katevanigo igoe na omea sauba kau naua vanigira na propete girani, igira inau au tau molovanogira, mara ba gini goko pero tana asaqu inau, mara tsaria laka na vailabu ma na liuna na vitoa e utu goto ke gadovia na butona kao iani. Minau sauba nomoa kau matesigira tana vailabu ma na liuna na vitoa.
16 Migira sui na tinoni ara rongomia niqira kategoko peropero na propete girani, sauba kara mate goto tana vailabu ma na liuna na vitoa. Ma na koniqira sauba kara tsonigira bamai tana sautu loki ni Jerusalem, me ke tau goto kauvisu kesa ke qilugira. Ma na omea vaga iani sauba ke laba vanigira sui lakalaka, kolugira goto na tauqira, ma na daleqira mane, ma na daleqira daki. Inau kau nauvaganana ia vanigira, gana kara gini sese matena niqira tsutsukibo.”
17 Na Taovia e ketsaliau inau a Jeremia, laka kau goko vanigira na toga tana rongona niqu melu ma kau tsaria:
“Na kô na mataqu ke tave na dani ma na bongi,
ma kau tau goto mango na ngangai,
rongona igira na gala ara labu sekoligira niqu tinoni,
mara gini boka loki sosongo.
18 Kalina inau au liu tana poina,
mau morosia na koniqira na tinoni ara mate tana vailabu.
Mi kalina au liu i laona na vera,
mau reigira goto na tinoni ara gini mate na vitoa.
Migira na propete ma na manetabu ara aqosia moa niqira aqo,
mara tau saikesa moa donaginia na omea ara nanaua.”
Na Tinoni Ara Ngangaidato Vania na Taovia
19 ?Taovia, laka igoe o sove saikesa tanigira na Juda?
?Laka o reisavigira manana na tinoni ni Sion?
?Megua ti o bokaligami sosongo vaga ia,
me tau tangomana ke mavu visutugua na bokamami?
Igami ami lavea moa na rago, me tau goto laba vanigami sa omea dou.
Mami amesia laka kami totudoutugua,
mara mai molo matagu vanigami moa igira na gala.
20 Igami ami sasi sosongo i matamu igoe Taovia.
Ami koevulagigira vanigo nimami sasi segeni
ma niqira sasi goto igira na mumuamami.
21 Ko padatugua na omea igoe o vekenogoa vanigami,
mo ko laka kiki na reipeagami igami,
mo ko laka goto na paluvangamana na vera ni Jerusalem,
aia na nauna i tana e totu nimu sasana na totukae.
Ko padatugua na vaitasogi igoe o naua kolugami,
mo ko laka goto na kutsiana.
22 ?Laka e totu sa niqira god na puku tavosi tangomana ke molomaia na usa?
?Me laka na masaoka segenina moa e susuliga na nauana me ke tumu na usa?
?Me laka o tau nimami God igoe?
Igami ami vataraginia nimami amesi i konimu igoe, rongona igoe segeni moa o dona na nauaqira na omea sui girani.