22
Nina Goko a Jeremia Vania na Vungu Taovia Tsapakae tana Juda
1-2 Na Taovia e tsarivaniau inau, “Igoe a Jeremia ko vano tana valena na taovia tsapakae ni Juda, aia na kukuana a David, mi tana ko ba tsarivania na taovia tsapakae, migira nina mane sasanga, migira sui na tinoni ni Jerusalem, kara rongomia na omea inau na Taovia au tsaria:
3 ‘Inau nogo na Taovia au ketsaliginigamu kamu naua moa na omea e dou me goto. Me ti vaga kesa ke komia sa nina omea kesa tinoni tavosi me gini molorota vania, migamu nimui aqo kamu isutuguna na tinoni ara komivania nina omea. Kamu laka na rotasiaqira lê, se na bingi sekoliaqira na tinoni ni veratavosi ara totu i laomui, migira na baka ma na daki tinamate; ma kamu laka goto na matesiaqira tana nauna tabu iani na tinoni dou ara tau tsukia sa sasi.
4 Me ti vaga igamu kamu nau mananâ na omea inau au ketsaliginigamu kamu naua, mi tana ti igira na kukuana a David sauba kara tangolidato babâ na aqo taovia tsapakae. Migira, kolugira goto niqira mane sasanga, ma niqira toga popono, sauba kara tangomana na liusage baba moa tana matsapakapuna na valena na taovia tsapakae iani tana niqira terê ma niqira ose.
5 Bâ, me ti vaga igamu kamu tau muridougira niqu ketsa, mi tana inau au vatsa vanigamu laka na valena na taovia tsapakae iani sauba ke toroutsa sui saikesa. Inau nogo na Taovia au tsaria na omea iani.’
6 “I mataqu inau, na valena na taovia tsapakae tana Juda e rereidou sosongo, vaga saikesa nogo na kao ni Gilead ma na Vungavunga ni Lebanon. Eo, minau sauba nomoa kau naua me ke lia na nauna mangu lê, i tana e tau goto tangomana ke mauri sa tinoni.
7 Inau sauba kau molovanogira na tinoni kara ba toroutsani poponoa. Migira sauba kara adimaia niqira rarati ma kara kavitsunagira nina tuguru rereidou sosongo ara aqosiginia na gai na sida, ma kara tsoni tsavugira tana lake.
8 “Mi murina ia, migira danga na tinoni ni veratavosi sauba kara liuputsi ma kara vaiveisuagi, ‘?Laka na rongona gua ti na Taovia e naua na omea vaga ia vania na verabau loki tangirongo iani?’
9 Me sauba kara gokovisu vanigira ma kara tsaria, ‘Tana rongona nogo igira ara veoa niqira vaitasogi ara naua kolua na Taovia niqira God, mara ba samasama mara aqo vanigira na god peropero.’ ”
Nina Goko a Jeremia e Kalea a Joahas
10 Igamu na tinoni tana Juda,
kamu laka na ngangaisiana a Josia na taovia tsapakae;
ma kamu laka goto na tangisiana na mateana.
Kamu ngangaisi sosongolia moa a Joahas na dalena;
aia ara adivanonogoa
me utu goto ke visumai me ke reitugua na kao tana e botsa.
11 Na Taovia e tsarivaganana iani kalea a Joahas na dalena a Josia, aia e tugua tamana tana nina aqo taovia tsapakae tana Juda, “Aia e vanoligi tania ieni, me utu goto ke visumai.
12 Sauba ke mate tana vera i tana igira ara adivanoa, me utu goto ke morositugua na kao iani.”
Nina Goko a Jeremia e Kalea A Jehoiakim na Taovia Tsapakae
13 E seko vania nomoa aia na mane e logo valena tana pede taugoto,
me paboginigotoa nina peqo.
Aia e turuginigira gana verakolu kara aqo lê vania,
me tau goto voligira.
14 E seko vanigotoa na mane e tsaria,
“Inau sauba kau logovaniau segeni kesa na valequ loki
kolugira na voki loki mangasâ i gotu.”
Maia e mologira na ovaova na bisi tana valena,
me ponotiginia na pava damadama ara aqosiginia na gai na sida,
me pedaginia na peda tsitsi.
15 ?Me laka aia nogoria sauba ke naua migoe ko gini lia na taovia tsapakae dou bâ,
ti vaga ko logoginia na gai na sida na valemu,
me ke rereidou bâ liusigira na vale sui tavosi?
Na tamamu igoe e tamani omea e tugua na maurina.
Aia e nau sailaginia moa na omea e dou me gotolaka,
me gini tangomana pipi sui tana omea aia e naugira.
16 E isutuguqira igira ara tau tamani omea migira ara kili sasanga,
me vaga ia, me dou vania moa pipi sui na omea.
Iani nogoria e vaga nina sasaga na tinoni aia e donaginia na Taovia.
17 Migoe o lavea moa na tamani omea levolevo vanigo segeni,
mo matesigira na tinoni dou ara tau tsukia sa sasi, mo bingi sekoligira sosongo igira nimu tinoni.
Aia nogo na Taovia e tsaria na omea iani.
18 Me vaga ia, ma na Taovia e tsaria na omea iani tana rongona a Jehoiakim na dalena a Josia na taovia tsapakae tana Juda,
“Sauba ke tagara goto ke kesa ke tangisia na mateana se ke tsaria,
‘!Are kiki kulaqu igoe! !Uvai kiki tasiqu igoe!’
Sauba ke tagara goto kesa ke tangisia me ke tsaria,
‘!Are kiki niqu taovia! !Uvai kiki niqu taovia tsapakae!’
19 Me sauba kara qilua aia vaga moa kalina ara qilua kesa na asi e mate.
Sauba kara raqaligia ma kara ba tsoniligia i tabana i tano na matsapakapuna na verabau ni Jerusalem.”
Nina Goko a Jeremia e Kalea Na Jerusalem
20 Jerusalem, igira na tinoni i laomu
kara vano tana Vungavunga Lebanon, mi tana kao ni Basan,
mi tana vungavunga ni Moab,
ma kara gudato ma kara tangitangi,
rongona ara viri mate nogo igira sui ara sai alaala kolugo.
21 Na Taovia e goko vanigo kalina igoe o totu dou mo tamani omea danga moa,
migoe o sove na rorongo.
Maia nogoria na omea igoe o naua tana maurimu popono,
mo tau ngaoa ko rongomangana na Taovia.
22 Sauba na guguri ke pualigigira nimu tinoni lokiloki,
migira ara sai alaala kolugo sauba kara raqa tsekagira,
mi tana, sauba ke ponopala tobamu me ke paluvangamamu lê,
tana rongona pipi sui na omea tabaruga igoe o naugira.
23 Igoe o totu dou i laona na valemu ara aqosiginia na gai na sida ni Lebanon,
me sauba nomoa ke livugaluvemu kalina ke gadovigo na rota loki,
vaga moa na rota e vatsangia na daki e parâ na vasusu.
Nina Pede God Vania a Jehoiatsin
24 Na Taovia e tsarivania a Jehoiatsin aia na dalena a Jehoiakim na taovia tsapakae tana Juda, “Au vatsa tana asaqu segeni nogo inau, laka atsa moa ti igoe o vaga na ringi tana limaqu madoa mau reingao sosongoligo, minau sauba kau raqaligigo nomoa,
25 ma kau sauligigo vanigira na tinoni igoe o matagunigira mara area na labumatesiamu. Eo, sauba kau sauligigo vania a Nebukadnesar na taovia tsapakae ni Babilonia, migira nina mane vaumate.
26 Inau sauba kau tsonitsekavanogo igoe kolua na tinamu kesa tana vera tavosi, i tana e tau botsa sa ka vidamui, mi kagamu sui sauba kamu ka ba mate i tana.
27 Me sauba ke silovikagamu na reiana tugua na kao iani, me utu moa kamu ka visumaitugua i konina.”
28 Minau a Jeremia au tsaria, “?Laka a Jehoiatsin na taovia tsapakae e lia vaga nogo na popovatu tapatapa aia ara tsoniliginogoa me tau nogo reingaoa ke kesa? ?Me laka aia nogoria na rongona ti aia, migira na dalena, ara aditsekagira bâ kesa tana kao i tana ara tau vati donaginia?”
29 !Are kiki igoe na kao, na kao, na kao!
Ko rongomia na omea e tsarinogoa na Taovia:
30 “Na mane iani, aia Jehoiatsin, au pedevaninogoa
laka sauba kara mate sui na dalena,
maia segenina nogo ke tau goto tangomana pipi tana omea ke naua.
Sauba ke tagara goto sa kukuana
ke tangolidatoa na aqotagao tana Juda,
vaga na tuguna a David.
Inau nogo na Taovia au tsaria na omea iani.”