NA AQO MANETABU
(LEVITIKUS)
Na Vuresi Makaliana Na Omea Ara Marea Tana Papi Iani
I laona na papi iani ara soaginia Na Aqo Manetabu ara totu na ketsa ma na vali ara kalea na samasama me pipi na aqo na lotu vaga ara muria i sau igira na tinoni ni Israel, migira goto na vovorona e kalegira na manetabu igira nogo niqira aqo na tagaoviana na aqona na lotu.
Na goko pukuga e totu i laona na papi iani aia nogoria laka God e doulaka saikesa; ma na sasaga e kilia niqira aqo nina tinoni kara muria tana aqona na samasama mi tana mauriqira pipi dani ti kara gini totugoto kalavata i matana “aia na God doulaka saviliu ni Israel.”
Ma na tsaqina goko tana papi iani ara donadouginia bâ igira na tinoni, ara totu tana lova 19 buto 18, i tana a Iesu e soaginia na rukanina ketsa loki putsikae: “Ko galuvea na kulamu vaga igoe o galuve segenimu.”
Na Omea Ara Totu Tana Papi Iani
Na ketsa tana rongona na sausau ma na kodoputsa 1:1–7:38
Na tabuaqira a Aaron mi tugira na dalena kara manetabu 8:1–10:20
Na ketsa e votamakalia na totu male ma na kaulinaqu tana vovorona na lotu 11:1–15:33
Na Dani Tabu na Sese 16:1-34
Na ketsa tana rongona na sasaga laka tana mauri mi tana aqona na samasama 17:1–27:34
1
Na Savori-Kodokodo
1 Na Taovia aia e totu i laona na Valepolo Tabu e soâ a Moses me tsarivania:
2 “Ko tsarivanigira na tinoni ni Israel laka niqira aqo kara muritaonia na ketsa girani kalina kara tû na savori-kodoputsa vaniana na Taovia.
“Kalina ti vaga ke kesa ke ngaoa na gini savori-kodoputsa kesa nina omea tuavati, ma nina aqo ke adimaia kesa nina buluka, se kesa nina sipi se kesa nina naniqoti.
3 “Me ti vaga aia ke ngaoa na gini savori-kodokodo kesa nina buluka ma nina aqo ke adimaia kesa na buluka mane me ke tau seko sa tabana konina. Me ke saua i matana na Valepolo i tana e totu na Taovia, rongona na Taovia ke tabea.
4 Ma nina aqo na mane ia ke moloa na limana i lovana nina buluka, maia God sauba ke tabea vaga na kodoputsa gana na mani veoligiana nina sasi.
5 Mi tana nogo aia ke labumatesia nina buluka, migira na manetabu tana duli konina a Aaron kara adia na gabuna ma kara sauvania na Taovia, mi muri ma kara qetu bâ pipi tana vati liligina na belatabu aia e totu i matana na Valepolo.
6 Mi muri, ma na mane ia ke paloligia na kokorana nina buluka me ke paria,
7 migira na manetabu kara vangaraua na lake i kelana na belatabu ma kara tungia.
8 Ma kara mologira na paparina na buluka tana lake kolu lovana ma na seregana.
9 Ma nina aqo goto na tamanina buluka ke vulimalegira na vangalevona mi kaira na aranimuri, me sui ia, maia na manetabu aia e tangolia na aqona na kodoputsa tana dani ia, ke kodo poponogira i kelana na belatabu. Ma na vuruna na omea ara savori vaganana ia e punâ na Taovia me gini laona sosongo.
10 “Me ti vaga na mane ia ke ngaoa na gini savori kesa nina sipi se kesa nina naniqoti, ma nina aqo ke vilia na manena me ke tau moa seko sa tabana konina.
11 Ke labumatesia i liligina na belatabu, tabana i vava, migira na manetabu kara qetu bâ na gabuna tana vati liligina na belatabu.
12 Mi kalina na mane ia ke parisuia, maia na manetabu aia e tangolia na aqona na kodoputsa tana dani ia ke mologira sui na paparina tana lake kolu lovana ma na seregana.
13 Ma nina aqo goto na tamanina ke vulimalegira na vangalevona mi kaira na aranimuri, maia na manetabu ke saugira vania na Taovia me ke kodo poponogira i kelana na belatabu. Ma na vuruna na omea ara savori vaganana ia e punâ na Taovia me gini laona sosongo.
14 “Me ti vaga na mane ia ke ngaoa na gini savori-kodoputsa kesa na manu, maia nina aqo ke adia na kulukulu se na kurau.
15 Ma na manetabu ke adi bâ na manu tana belatabu me ke birukutia na liona, me ke kodoa na lovana tana belatabu, ma na gabuna ke moloa ke roro tsuna tana liligina na belatabu.
16 Ke pariligia na todo tana liona kolua na vangana i laona, me ke tsonibagira tana tora ara totu ligisana na belatabu tabana i longa.
17 Mi muri maia ke tangolikaira na rapona me ke sasia na konina, me ke laka moa na tasasiligiana na rapona, mi muri me ke kodo poponoa tana belatabu. Ma na vuruna na omea ara savori vaganana ia e punâ na Taovia me gini laona sosongo.”