16
1 Migira ara adia na Bokisi na Taso mara ba moloa tana sasana i laona na valepolo i tana aia David e vangarau manogativaninogoa. Mi muri, mara savorigira vania God na savori-kodokodo ma na sausau tangomana na tinoni kara ganipatâ na turina.
2 Mi kalina a David e savorigira sui nogo na kodoputsa, maia e tû, me tabugira na tinoni tana asana na Taovia,
3 me tuvaria na mutsa vanigira sui. Pipi na mane ma na daki ni Israel ara tango kesa sivona bredi, me kesa na paparina na velesina buluka kodokodo, me visana na vuana uaeni makede.
4 Ma David e viligira visana na Levite kara totu sailagi i matana na Bokisi na Taso ma kara tau kuti na samasama vaniana na Taovia na God ni Israel, ma na soadouana ma na tsonikaeana.
5 Me vilia a Asap ke lia gaqira ida, ma Sekaria gana sasanga. Mi tugira a Jeiel, ma Semiramot, ma Jehiel, ma Matitia, ma Eliab, ma Benaia, ma Obed Edom ma Jeiel kara tu taigira na itai tatangi. Ma nina aqo a Asap ke rekesia na tsetsê,
6 mi kaira a Benaia ma Jahasiel na mane tabu kara ka uvisailaginia na tavuli i matana na Bokisi na Taso.
7 Mi tana dani nogo ia ma David e mologinia a Asap migira gana sasanga na Levite tavosi kara tagaovia na linge na tsonikaeana na Taovia.
Na Linge na Tsonikaeana na Taovia
(Linge 105:1-15; 96:1-13; 106:1, 47-48)
8 Soadoua na Taovia, katevulagia gana loki tsapakae;
tsarivanigira na puku tavosi sui na omea aia e naugira.
9 Linge na tsonikaeana na Taovia;
katevulagigira na omea dou sui aia e naugira nogo.
10 !Ka gini mage loki igita tana rongona igita nina tinoni nogo aia!
11 Igita ka ba laba i konina na Taovia rongona aia ke sangagita;
ma ka totu sailagi i matana.
12-13 Igamu na kukuana a Jakob aia nina maneaqo na Taovia,
migamu goto na kukuana a Israel na mane aia nogo God e vilia,
kamu padatugugira na valatsatasa loki God e aqosigira,
ma nina pedelaka aia e naua.
14 Na Taovia aia nogo nida God;
ma nina ketsa ara kalegira na tinoni sui tana barangengo popono.
15 Kamu laka na padaleana na vaitasogi God e naua kolugita,
maia e naua gana ke totu kalavata saviliu,
16 aia nogo na vaitasogi e naukolua a Abraham
ma nina veke e nauvania a Isaak.
17 Na Taovia e naua kesa na vaitasogi kolua a Jakob,
ma na vaitasogi ia sauba ke totu kalavata saviliu.
18 Maia e tsarivania, “Inau sauba kau sauvanigo na kao ni Kanaan,
maia sauba ke lia nimu tamani segeni.”
19 Igira nina tinoni God e tsaurae lê na dangaqira,
mara labavô i laona na kao ni Kanaan.
20 Ara liu bamai moa tû kesa tana vera mara ba kesa tana vera tavosi,
me tû tana verana kesa na taovia tsapakae, mara bâ i konina kesa segeni.
21 Mi tana tagu popono ia, ma God e tau tamivania ke kesa ke bingi sekoligira;
maia e parovatavigira na taovia tsapakae me tsarivanigira,
22 “Kamu laka na sekoliaqira igira niqu tinoni inau au viligira;
ma kamu laka saikesa goto na peleaqira igira niqu propete.”
23 !Linge vania na Taovia igamu na momoru taligu!
Pipi dani kamu katevulagia laka aia nogo e maurisigita.
24 Katevulagia gana loki tsapakae vanigira na puku sui pipi tana vera,
ma kamu turupatuna vanigira na toga sui na omea loki aia e naugira.
25 Na Taovia e loki tsapakae, me ulagana sosongo nomoa igita ka tsonikaea;
aia nogo igita ka kukuni loki tania liusigira bâ na god tavosi sui.
26 Ma niqira god igira na puku tavosi sui na nununa lê moa na gai ara katsua,
maia moa nida Taovia igita aia nogo e vusâ na baragata.
27 Na Taovia e loki tsapakae me tangiloki na rongona;
na susuligana aia ma na magemage e dangali poponoa nina Vale Tabu.
28 Tsonikaea na Taovia igamu na toga sui tana barangengo,
tsonikaea gana loki tsapakae ma na susuligana.
29 Soadatoa na asana tabu na Taovia;
adimaia nimui sausau ma kamu sage i laona nina Vale Tabu,
30 migamu sui tana barangengo popono kamu gariri i matana aia.
Aia nogo e vaturikakaia na barangengo, me utu goto ke ratsu bamai.
31 !Kara ka magemage kaira na barangengo ma na masaoka!
Katevulagi vanigira na puku tavosi sui laka God aia segeni moa e taovia tsapakae.
32 Kara viri leleo takuti na tasi loki me pipi sui lakalaka na omea ara mauri i laona;
ma kara magemage igira na uta ma na omea sui i laoqira.
33 Migira sui goto na gai i laona na legai atsi kara gudato tana magemage i matana na Taovia,
kalina aia ke mai na tagaoviana na barangengo.
34 Soadoua na Taovia rongona aia segeni e dou sosongo;
ma nina galuve e totu saviliu.
35 Kamu tsarivania, “God nimami vagamauri, ko maurisigami,
ko adisaigami mo ko adivisugami tania na totu i laoqira na puku tavosi,
rongona kami gini soadougo,
ma kami tsonikea na asamu tabu.”
36 !Tsonikaea na Taovia na God ni Israel!
!Tsonikaea kalina nogo ia mi tana dani ma na dani!
Mi tana migira na toga sui ni Israel ara tsaria, “Amen” mara tsonikaea na Taovia.
Na Samasama i Jerusalem mi Gibeon
37 Ma David e moloa a Asap kolugira gana sasanga igira na Levite tavosi kara ida kalavata tana aqona na samasama ara naua pipi dani i Jerusalem tana nauana i tana e totu na Bokisi na Taso.
38 Me mologotoa a Obed Edom na dalena a Jedutun kolugira ara ono sangavulu alu na mane tana nina duli segeni nogo ia kara sangagira. Mi kaira a Hosa ma Obed Edom ara ka tagaovia na aqona na mataliaqira na matsapakapu.
39 Maia Sadok na manetabu kolugira gana sasanga na manetabu tavosi ara totu moa i Gibeon, mara tagaovia na aqona na samasama vania na Taovia tana nauna na mani samasama i tana nogo.
40 Me pipi tana matsaraka ma na ngulavi niqira aqo nogo igira kara kodogira na savori-kodokodo i kelana na belatabu, taoninogoa na omea ara marea tana papi na Ketsa aia na Taovia e sauvanigira na Israel.
41 Mi kaira a Heman ma Jedutun ara ka totu kolugira goto i tana, kolugira goto visana ara viligira nogo gana kara lingena na tsonikaeana na Taovia rongona nina galuve vo oli.
42 Mi kaira nogo a Heman ma Jedutun ara ka tagaovigira igira ara uvi tavuli migira ara rekesi tsetsê, migira sui goto na omea tatangi tavosi ara gini sinagi kalina ara lingena na tsonikaeana God. Migira na mane tana duli konina a Jedutun igira nogo ara tagaovia na aqona na mataliaqira na matsapakapu.
43 Me sui ia, migira sui ara visutugua i veraqira, maia David goto e vano i valena me ba totu kolugira nina tamadale.