27
Igira Ara Tagao Vanigira na Mane Vaumate
1 Iani nogo na soaqira babâ igira ara ida pipi tana vungu ma na duli tana Israel, migira goto niqira mane sasanga ara sangagira na tagaoviana na vavanona na aqo vania na taovia tsapakae. Pipi vula i laona na ngalitupa ara vaioligi na alaala, mi laona pipi alaala ara rukapatu vati toga na mane ara aqo i vavana aia e taovia tagao vanigira tana vula ia.
2-15 Migirani nogo na soaqira na mane ara tagao pipi tana vula:
Tana kesanina vula: a Jasobeam na dalena a Sabdiel, aia nogo e kesa tana duli konina a Peres, na turina na puku konina a Juda.
Tana rukanina vula: a Dodai na kukuana a Ahohi, ma Milkot nogo gana sasanga aia.
Tana tolunina vula: a Benaia na dalena a Jehoiada na manetabu; aia nogo e ida vanigira “Na Tolu Sangavulu,” ma Amisabad na dalena e tugua tamana tana nina aqotagao tana alaala iani.
Tana vatinina vula: a Asahel na kulana a Joab, ma Sebadia na dalena a Asahel e tugua tamana tana nina aqo.
Tana tsegenina vula: a Samut na kukuana a Isar.
Tana ononina vula: a Ira na dalena a Ikes ni Tekoa.
Tana vitunina vula: a Heles aia kesa na Epraim ni Pelon.
Tana alunina vula: a Sibekai ni Husa, aia e kesa vidaqira i laona na duli konina a Sera, na turina na puku konina a Juda.
Tana siunina vula: a Abieser ni Anatot tana niqira butona kao na puku konina a Benjamin.
Tana savugavulunina vula: a Maharai ni Netopa, aia e kesa vidaqira i laona na duli konina a Sera.
Tana sangavulu kesanina vula: a Benaia ni Piraton tana niqira butona kao na puku konina a Epraim.
Mi tana sangavulu rukanina vula: a Heldai ni Netopa, aia nogo kesa na kukuana a Otoniel.
Igira Ara Ida Pipi tana Puku ni Israel
16-22 Igirani nogo na soaqira na mane ara tagaovigira pipi na puku tana Israel:
a Elieser na dalena a Sikri e tagao tana puku konina a Ruben;
a Sepatia na dalena a Maaka e tagao tana puku konina a Simeon;
a Hasabia na dalena a Kemuel e tagao tana puku konina a Levi;
a Sadok e tagao tana puku konina a Aaron;
a Elihu, aia e kesa na kulana a David na taovia tsapakae, e tagao tana puku konina a Juda;
a Omri na dalena a Mikael e tagao tana puku konina a Isakar;
a Ismaia na dalena a Obadia e tagao tana puku konina a Sebulun;
a Jeremot na dalena a Asriel e tagao tana puku konina a Naptali;
a Hosea na dalena a Asasia e tagao tana puku konina a Epraim;
a Joel na dalena a Pedaia e tagao tana puku konina a Manase i Tasi;
a Ido na dalena a Sekaria e tagao tana puku konina a Manase i Longa;
a Jaasiel na dalena a Abner e tagao tana puku konina a Benjamin;
a Asarel na dalena a Jeroham e tagao tana puku konina a Dan.
23 Mi kalina a David na taovia tsapakae e naua na tsoko tinoni, maia e tau adia na soaqira na tinoni tu tana rukapatu ngalitupaqira me tsuna, rongona na Taovia e vekenogoa laka aia ke naua migira na tinoni ni Israel kara danga vaga saikesa moa na veitugu tana masaoka.
24 Maia Joab aia na dalena ko Seruia, e tuturiga moa na tsoko tinoni, me tau moa suilavaginia. God e kedegira na Israel rongona ara naua na tsoko tinoni iani, me vaga ia mara tau maretsunagira na dangana popono na tinoni i laona nina papi na mamare soa a David na taovia tsapakae.
Igira Ara Reitutugua Nina Omea Levolevo na Taovia Tsapakae
25-31 Igirani nogo na soaqira igira niqira aqo na reitutuguana nina omea levo na taovia tsapakae:
A Asmavet na dalena a Adiel e reitutugugira nina voki na mololaka omea na taovia tsapakae;
a Jonatan na dalena a Usia e reitutugugira na voki na mololaka omea na vera;
a Esri na dalena a Kelub e reitutugugira na mane aqouta;
a Simei ni Rama e reitutugugira na uta na uaeni;
a Sabdi ni Sepam e reitutugugira na voki tana ara mololaka na uaeni;
a Baal Hana ni Geder e reitutugugira na gai na olive ma na gai mutsamutsa ara totu i tuana na vungavunga tabana i tasi;
a Joas e reitutugua na aqo na mololakaana na oela na olive;
a Sirtai ni Saron e reitutugugira na buluka ara totu tana kao dou i Saron;
a Sapat na dalena a Adlai e reitutugugira na buluka ara totu i laoqira na poi;
a Obil aia na Ismael e reitutugugira na kamelo;
a Jedeia ni Meronot e reitutugugira na asi;
ma Jasis aia na Hagar e reitutugugira na sipi ma na naniqoti.
Nina Mane Sauparovata a David
32 Maia Jonatan na niana a David na taovia tsapakae e dona dou sosongo na sauparovata me sasani loki. Maia kolugotoa a Jehiel na dalena a Hakmoni kaira ara ka tagaovia niqira sasani igira na dalena na taovia tsapakae.
33 Ma Ahitopel aia nina aqo na sauparovata vania na taovia tsapakae, ma Husai na Arka aia nogo na kulana dou sosongo na taovia tsapakae ma nina mane gana na parovataviana.
34 Mi murina na mateana a Ahitopel, mi kaira a Abiatar ma Jehoiada, aia na dalena a Benaia, ara ka lia nina mane na sauparovata. Ma Joab nogo e lia na taovia tagao vanigira nina mane vaumate na taovia tsapakae.