13
Uze'eg puruamutar haw rehe xe a'e kury
1 Aze akwaw wyzài teko waze'eg rupi heze'egaw ihe nehe,
te Tupàn heko haw pe har waze'eg rupi heze'egaw ihe nehe,
aze nazamutar katu kwaw teko ihe wà nehe,
a'e mehe na'ikatu kwaw heze'egaw nehe.
Heze'eg nuzawy kwaw zu'i ze'eg nehe.
2 Aze akwaw katu Tupàn ze'eg imume'u haw nehe,
aze akwaw katu Tupàn ze'eg ikwaw pyr 'ym nehe no,
aze hezeruzar haw ikàg nehe, aze apuner ywytyr imunyrykaw rehe
imono pà amo ywy rehe hezeruzar haw rupi nehe,
aze nazamutar katu kwaw teko ihe wà nehe,
naiko kwaw ikatu ma'e romo Tupàn huwa rupi ihe nehe.
3 Aze amono e hema'e paw amogwer wanupe nehe, ma'e hereko 'ymar wanupe nehe,
aze azemono hezezuka kar pà Zezuz rehe hezeruzar haw rehe nehe,
aze wapy heretekwer tata pupe wà nehe,
aze nazamutar katu kwaw teko ihe wà nehe,
a'e mehe Tupàn numur kwaw ma'e ihewe nehe.
4 Puramutar katu ma'e a'e, aze teko upuraraw kar ma'erahy izupe wà nehe,
na'ipuruzukaiw kwaw wanupe ipuraraw mehe nehe.
Nahewyrowyroahy kwaw.
— Aiko wera'u tuwe pewi ihe, ni'i kwaw amogwer wanupe.
— Aiko wera'u tuwe amogwer wanuwi, ni'i kwaw uzeupe.
5 Upuruamutar ma'e a'e, nuze'eg ahyahy kwaw amogwer wanupe a'e.
— Xo heremiapo putar haw xiapo nehe, ni'i kwaw amo pe nehe.
Nuikwahy kwaw tàrityka'i. — Kwa, kwez awa uzapo ikatu 'ym ma'e ihewe a'e, a'e rupi azepyk putar hehe hexak mehe ihe nehe, ni'i kwaw.
6 Aze amo uzapo ikatu 'ym ma'e nehe,
puruamutar katu ma'e uzemumikahy putar hexak mehe a'e nehe,
nahurywete kwaw ikatu 'ym ma'e hexak mehe a'e nehe.
Hurywete putar ze'eg azeharomoete har henu mehe nehe.
7 Puramutar katu ma'e a'e, aze upuraraw ma'erahy a'e nehe, nupytu'u kwaw uzeruzar ire a'e nehe.
Uzeruzar katu wiwi oho iko Zezuz rehe. Wàrogatu wiwi tur àwàm oho iko no. Nupytu'u kwaw uzeruzar ire.
8 Tuweharupi uzeruzar ma'e uzeamutamutar katu putar a'e wà nehe, upytu'u 'ym pà a'e wà nehe.
Ma'e uzeapo ma'e ràm imume'u har a'e wà nehe,
amo 'ar mehe upytu'u putar imume'u re a'e wà nehe.
Ze'eg ikwaw pyr 'ym rupi uze'eg ma'e a'e wà nehe no,
amo 'ar mehe upytu'u putar nezewe uze'eg ire a'e wà nehe no.
Tupàn ze'eg ikwaw pyr 'ym kwaw par a'e wà nehe no,
amo 'ar mehe upytu'u putar a'e ze'eg imume'u re a'e wà nehe no.
Uzeruzar ma'e a'e wà nehe, nupytu'u pixik kwaw puruamutar ire wà nehe.
9 Ma'e kwaw par a'e wà, nukwaw katu kwaw ma'e paw a'e wà.
Ze'eg imume'u har a'e wà, numume'u katu kwaw ze'eg paw a'e wà.
10 Ur putar ikatu 'ygwer iapo 'ymar a'e nehe, ikatuahy a'e.
Tur mehe zapytu'u putar agwer ma'e iapo re zane nehe.
Ta'e agwer ma'e nuhyk kwaw zanewe a'e wà xe.
Ta'e Zaneruwihawete uhyk putar zanewe a'e 'ar mehe nehe xe.
11 Hekwarer mehe aze'eg kwarer ài ihe,
hema'enukwaw ma'e rehe kwarer ài ihe, pixika'i heremigwaw ihe.
Kwarer ài aiko a'e mehe.
Ko 'ar rehe awa romo aiko kury.
A'e rupi nazapo kwaw ma'e hekwarer mehe arer zàwenugar ihe kury.
Naiko kwaw kwarer ài kury. (Nezewegatete naxikwaw katu kwaw ma'e ko 'ar rehe zane. Zezuz tur mehe xikwaw katu putar nehe.)
12 Aze zame'e waruwa izipiw ma'e rehe nehe,
nazazexak katu kwaw nehe.
Aze zame'e tuwe ma'e rehe nehe, xixak katu nehe.
Nezewegatete naxikwaw katu kwaw Zezuz ko 'ar rehe zane kury.
Tur mehe xikwaw katu putar nehe. Xo màràn ma'e akwaw kury.
Nakwaw katu kwaw ma'e tetea'u.
Tur mehe hexak mehe akwaw katu putar ma'e paw rupi nehe.
Tupàn hekwaw katu tuwe a'e. Heremigwaw ràm nuzawy kwaw a'e Tupàn hemigwaw ihe nehe.
13 Ko 'ar rehe xiapo na'iruz ma'e zaiko zane.
Zazeruzar wiwi Tupàn rehe zaiko. Xiàrogatu Zaneruwihawete tur àwàm zaiko no. Zazeamutamutar zaiko no.
Zanezeruzar haw ikatu Tupàn pe a'e. Hàrogatu haw ikatu izupe a'e no.
Zanezeamutar katu haw ikatuahy wera'u izupe zane, amogwer zaneremiapo kwer wi zane.