7
Israel misaameran 144.000-wan Tiuswein kui asamdiig kønrrai marcailø
Øyeeg chab puraiben, nabe pibgatø ángelesmera pørr kal-labgatømay køben, pørr kebibgatømay køben, kandarøgatømaysrøn køben, imaygatømaysrøn køben, pirau pib palø pønrrai ashibig kur, tru pib paløyugurri isig ichib webarrubigwan pirau lata, maryu lata, chi tusrmerandøgucha isig ichimønrrai katab. Inchen katøgan ángel, pørr kal-labgatøsrøngurri nebarri ashibig kur. Truibe Øsig Wab Tiuswei marcan sruaig tru pibgatø ángelesmera pirøwanba, marwanba mindishinrrab maramburab maramigwan utabelan mur trashib trenchibig køn: —Pirøwan lata, marwan lata, tusrmeran lata mindishimøtay cha, namui Tius tru marøb melabelan nuielø kui asamdiig kønrrai nømui kappalømerayu chab marcamnegatig.—
Inchen tru marcailø mam køn chitamørtrab na mørene, 144.000 mil køn, chibig køn, tru doce nusrkalø Israelweinukkurri nørrø karrab misaamera,
Judáweinukkurri karrab misaamera 12.000 køben,
Rubénweinukkurri karrab misaamera 12.000 køben,
Gadweinukkurri karrab misaamera 12.000 køben,
Aserweinukkurri karrab misaamera 12.000 køben,
Neftaliweinukkurri karrab misaamera 12.000 køben,
Manasésweinukkurri karrab misaamera 12.000 køben,
Simeónweinukkurri karrab misaamera 12.000 køben,
Levíweinukkurri karrab misaamera 12.000 køben,
Isacarweinukkurri karrab misaamera 12.000 køben,
Zabulónweinukkurri karrab misaamera 12.000 køben,
Joséweinukkurri karrab misaamera 12.000 køben,
Benjaminweinukkurri karrab misaamera 12.000 køn taig mørøbig kur.
Truba truba nu misag søtø puliig kewar
Øyeeg chab puraiben, na ashene, møimbe tru wamisra karub waigwei merrappa, tru Ubisha-unai merrappabe misag purø nu, muguen mundzamgaig pønrrabelø køn, misaamera nørrø pønrrabig chu pirausreelø køben, nørrø kanbalatø warabelø chi misaamera køben, peg peg misag søtømera køben, peg peg wam waminchib misaamera købengue. Truiløbe puløzheelø kewar, tasigube palma ishiimera sruar, 10 mayeeløba trenchib mur trashibelø køn:
“Kaigyugurri wesraibe namui Tius,
tru wamisra karub wainug wabigweinukkurrimba,
tru Ubisha-unainukkurrimba arrubig køn” chib.
11 Inchen maya ángelesmerabe tru karub wainuuba, kølli misaameraimba, tru pibgatø øsiguelaimba, truilaim pøtøgatan pønrrøwa, tru karub waigwei merrab piraugatig tømbønsrøb srala, Tiuswan køriibala tabig waminchib, 12 trenchibelø køn:
“¡Treeg kønrrun! cha.
Purø tabig wamindiiba,
tørguegwalmabiiba,
muguen nebua kusremgaiba,
maya nuguen ungwa, ungwa taiba,
tabig kui asha tab indiiba,
maramburab mariiba,
mugucha chindamgaiba,
iiløbe managatig namui Tiuswein kønrrain chibelø køn.
Treeg kønrrun.”
13 Inchene møikkøsrøn kan kølli misag nan payibig køn:
—¿I puløzhig kewarbe mumera køh? cha. ¿Chugurri amrruh?— cha.
14 Inchene nabe:
—Nai Señor, ñibe asha pasrainrrabguen— chibene, nøbe nan trenchibig køn:
—Iiløbe tru purø trømbøig isumdiigugurri purørruwar køn cha. Nømbe nømui keilan tsarar, Ubisha-unai anindøga puløzhig marar køn cha.
15 Treekkurri nømbe Tius tru wamisra karub wainug merrab pønrran cha.
Yem, kwaløm nui tab yau nuyasig marøb pønrran cha.
Inchen tru karub wainug wabiibe,
nømuim pala nø søtø pasraitøga
nømun chinchimønrrai ashchun cha.
16 Yandø nømbe parøgwai mørmøwei,
pimulgwai mørmøwei, pørr pati mørmøwei,
kabe katøgan pekkurri pachig kui mørmøwei inchun cha.
17 Kaguende tru wamisra karub wain tøbøtag Ubisha-unø pasrabiibe
nømune kan ubishameran lataig ashib pera pasrøwa,
tru øsig kømigwan tranøb pigabmerasrømay pera inrrun cha.
Inchen Tiusbe nømui kabmerayu kappiwan pinømørtrun— cha, trenchibig køn.