24
Mbovykue rei e'ỹ heko vai va'e kuery nombopagaaia rami Jó ijayvuague
1 — Mba'e re nda'u Ipo'akapa va'e noa'angai ri joe oikuaa pota aguã ára?
Mba'e re tu oikuaa va'e kuery ndoikuaai ha'e va'e ára?
2 Mba'eta ikuai yvy markaa oguerova rive va'e,
ha'e mymba re imonda vy guymba kuery reve ae omongaru va'e.
3 Ha'e kuery oipe'a 'rã tyre'ỹ rymba mburika,
imeve'ỹ va'e gui voi oipe'a 'rã hymba vaka.
4 Ojexavai va'e kuery pe ojavy uka 'rã tape.
Ha'e kuery gui iporiaukue'i yvy re ikuai va'e onhemimba 'rã okuapy,
5 Ha'e va'e kuery ma omba'eapo aguã katy oje'oi 'rã kavaju'i tekoa e'ỹa rupigua rami,
iporiaukue'i voi yvy joja reia rupi oeka 'rã oje'oivy ho'u va'erã.
Ha'e rami vy 'rãe ojou tembi'u ojeupe ha'e gua'y kuery pe.
6 Heko vai va'e mba'ety py omono'õ 'rã mba'emo aju,
ha'e omondoro 'rã uva.
7 Ipire rei reve oaxa 'rã pytũ ao oguereko e'ỹ vy.
Onheovã aguã ndoguerekoi vy yro'y oendu.
8 Yvyty rupi inhakỹmba 'rã oky gui.
Onhemi aguã oguereko e'ỹ vy itaova rupi rive 'rã onhemi okuapy.
9 Tyre'ỹ'i kuery omboia 'rã okambua gui,
ha'e iporiaukue'i gui oipe'a 'rã oguereko'i va'ekue.
10 Ha'e ramo ha'e va'e kuery ipire rei va'e ikuai ao oguereko e'ỹ vy.
Karuai oendu vy ogueraa 'rã mba'emo aju ojokua pyre.
11 Heko vai va'e kuery roka py onhami 'rã azeite-rã,
uva oumbiri avi teĩ oendu riae 'rã oy'uxea.
12 Tetã rupi voi avakue ipoaẽ 'rã okuapy, ojeaipy kuery ojapukai 'rã onhe'ẽ py.
Ha'e rami teĩ ha'e nunga re Nhanderuete ndoikuaa potai merami.
13 — Ha'e rã heko vai va'e ma hendy va'e rovaigua ikuai,
ndoikuaai 'rã guive tape hendya katy oo va'e,
ha'e va'e rupi ndooxei guive.
14 Ko'ẽ rai jave jojuka rive-rive va'e opu'ã vy
ojuka 'rã iporiaukue'i ha'e ojexavai va'e.
Ha'e gui pyávy ma oo ju 'rã imonda aguã katy.
15 Itavy rei va'e voi oarõ 'rã pytũ'i ta maa.
Ha'e vy aipoe'i ojeupe: “Avave rei ndaxerexa kuaai 'rã”, he'i vy omo'ã 'rã ovy ngova.
16 Pytũ jave avakue oike 'rã joo rupi,
ha'e gui ara py ma ngoo rupi ae 'rã ikuai.
Neĩ ndoexaxevei 'rã hendy va'e.
17 Mba'eta ha'e kuery ma ko'ẽa pe “Manoa pytũ guigua” he'i 'rã,
ha'e rã pyávy nhomongyje reia ma ha'e kuery oexa va'ety ae oiko.
18 — Peẽ aipopeje: “Heko vai va'e kuery ma ogueraapaa vyvoi 'rã yxyrya py.
Yvy re ha'e kuery pegua oĩ va'e ma ayvu vaipy anho.
Ndoovei 'rã tape uvaty katy oo va'e rupi omba'eapo aguã.
19 Ipirua ha'e haku ma yro'y omboyku-a rami avi
manoa voi omomba 'rã ojejavy va'e kuery.
20 Ha'e ramo ha'e kuery re ixy ae hexarai 'rã,
ho'okue re taxo ovy'a reve okaru 'rã okuapy.
Heko vai kuery re na'ima'endu'aavei ma 'rã.
Ha'e kuery omopẽmbaa 'rã yvyra rami,
21 imemby va'erã e'ỹ ha'e kuery omomba rire,
ha'e imeve'ỹ va'e pe ndojapo porãi rire”, peje.
22 — Any! Ha'e rami 'rãgue py Nhanderuete ombaraetea rupi ombopukuve 'rã ojerovia rei va'e kuery ára.
Ha'e kuery ndaekorãvei teĩ opu'ã ju nho 'rã.
23 Ha'e kuery pe ha'e ome'ẽ 'rã opytu'u aguã.
Ha'e ramo ikuai atã 'rã.
Nhanderuete oma'ẽ 'rã ha'e kuery ikuaia rupi.
24 Ha'e kuery ma xapy'a'i 'rã omboyvatea.
Ha'e rire oaxa ju xapy'a 'rã, amboae kuery rami oipe'apaa 'rã,
mba'emo ra'yĩgue rami avi ojayaa 'rã.
25 Ha'e rami e'ỹ rã mava'e 'rã tu oikuaa uka xeapua,
ha'e ombovaipa xeayvua? — he'i.