36
Eliú “Avakue ojexavaia py Nhanderuete oikuaa uka 'rã iporã va'e”, he'iague
1 Eliú ijayvuve tema. Ha'e vy aipoe'i:
2 — Ejapyxakave'i ranhe, ha'e rã amombe'u porãve 'rã ndevy
Nhanderuete amboeko porãa rupi xeayvu aguã arekove teri va'e.
3 Mombyry gui 'rã aru xe'arandurã
Xemoingoare amboeko porã aguã.
4 Mba'eta anhetẽ, xeayvu ma rive'ỹ.
Ndereve oĩ va'e ma mba'emo oikuaapa va'e.
5 — Ne'exa, Nhanderuete ma tuvixa ete va'e.
Ha'e rami teĩ nopena e'ỹi 'rã peteĩve re.
Oikuaa py avi tuvixa ete va'e oiko.
6 Ndogueraa jepei 'rã heko vai va'e rekove,
ha'e rã ojexavai va'e kuery ma ha'evea rami 'rã oguereko.
7 Ndopytu'ui 'rã heko porã va'e kuery re oma'ẽa gui.
Ha'e rami 'rãgue py omboyvate vy huvixave kuery reve
omboguapy 'rã henda openaaty py raka'e rã peve.
8 Xapy'a rei ha'e kuery corrente py ombo'aague py 'rã ikuai,
ixã imoingo axyarã py ojokuaa rire.
9 Ha'e rami ha'e ojapo 'rã ha'e kuery ha'eve'ỹa rami ojapoague oikuaa aguã,
ojejou porã reia rupi ikuai rire.
10 Ha'e kuery apyxa oipe'a 'rã ombo'e aguã.
Ha'e rami vy ha'e kuery pe ijayvu 'rã heko vaia gui ojeko rerova aguã.
11 Xapy'a rei ha'e kuery onhe'ẽ rendu ha'e ixupe ju ikuai ramo
opaa py oiko 'rã ha'e kuery ovy'a aguã ára,
ha'e ma'etỹ mba'emo re ovy'a rei okuapy aguã.
12 Ha'e rã ha'e kuery noendu potai ri ramo
hu'y guaxu py rami onhyvõa 'rã,
ha'e ramo omano 'rã hexa ogue reve.
13 Opy'a py heko vaia anho omoĩ va'e ma ojeupe guarã omboaty 'rã poxya.
Nhanderuete ombo'a uka teĩ ndojapukai 'rã okuapy heraa jepearã va'ekue pe.
14 Ha'e rami vy kunumi teri reve teĩ omokanhy 'rã guekove.
Omano 'rã avakue ta'angaa pegua itavy rei va'e mbyte py.
15 Ha'e rã ojexavai va'e kuery ma ha'e ogueraa jepe 'rã ojexavaia py ae oeko mbo'e vy,
mba'eta ombojexavaia rupi oipe'a 'rã ijapyxa.
16 — Ha'e rami ae ndee voi reiko axya gui Nhanderuete ndepe'axe avi
peteĩ henda tuvixaa py, reiko axy ve'ỹ aguã py,
ha'e rekaru aguã mesa áry tembi'u hee va'e anho oĩa py.
17 Ha'e rã ndee ma renhemonyẽ heko vai va'e kuery reve repaga aguã.
Ha'e nunga rupi nderupity 'rã ndejou vaia ha'e nembopagaa aguã anho.
18 Enheangu ke ha'vy ipoxya rendua py rejojai rei e'ỹ aguã,
ejepe'a uka eme guive “Xerekovia heta ome'ẽa” 're vy rive.
19 Rejae'o rei ha'e opa mba'e py renhea'ã ramo rive nda'u
nemboaxy 'rã rejexavaia gui reo jepe aguã?
20 Earõ eme eikovy pytũ pyguarã,
mba'eta heta ikuaiague gui oipe'apaa heravy aguã ae oĩ.
21 Enheangu ke teko vai re reo e'ỹ aguã,
ha'e va'e pe “Jexavai gui ha'eveve va'e” 're vy rive.
22 Ma'ẽ, Nhanderuete opo'akaa py yvate ete va'e ojekuaa!
Mava'e porombo'ea 'rã tu ha'e rami oiko?
23 Mava'e tu omboeko mbo'e ta,
ha'e'ỹ vy ixupe “Ha'eve'ỹa rami rejapo” he'i ta?
Nhanderuete yvate etea re Eliú ijayvuague
24 — Nema'endu'a porã Nhanderuete rembiapo
avakue pavẽ oguerovy'a va'e re.
25 Ha'e nunga re avakue ha'e javi oma'ẽ vy
mombyry gui ojou porã 'rã okuapy.
26 Ma'ẽ, Nhanderuete ma yvate ete va'e, jaikuaa aguã rami e'ỹ.
Oikoa ma'etỹ guive ndajaipapa kuaai 'rã.
27 Mba'eta ojea katy ogueru 'rã yy tykyrã,
yvyxĩ gui ombo'oky aguã.
28 Ha'e rami vy arai gui onhoẽ 'rã
avakue áry otyky reta va'erã.
29 Amongue nda'u oikuaa 'rã ri marã rami pa arai oipyo heravya,
yapu guive oĩa gui omonhendua?
30 Ma'ẽ, ha'e va'e áry rupi oexa uka 'rã imondovy nhemboxi,
ye'ẽ typyvea ha'e javi rupi peve omoexakã va'erã.
31 Ha'e nunga py oguereko 'rã yvy regua ikuai va'e,
ha'e vy ha'e kuery pe ome'ẽ 'rã tembi'u oata aguã rami e'ỹ.
32 Opo py overa va'e ojopy reta vy
omombo 'rã ngovaigua kuery re.
33 Ára vai revovo voi oikuaa uka 'rã heko,
mba'eta nda'evei etea oexa uka 'rã ha'eve'ỹa rami joguereko va'e rovai.