38
Jó ndoikuaai va'e re Senhor oporanduague
1 Ha'e va'e rire ma Senhor peteĩ yvytu jere mbyte gui ijayvu vy ombovai Jó. Ha'e vy aipoe'i:
2 — Mava'e tu ndee mba'eve reikuaa e'ỹ vy
xepy'aa ha'eve'ỹa rami remombe'u va'e?
3 Eiko katu ha'vy ava rami,
mba'eta xee aporandu 'rã ndevy.
Ha'e rã ndee ma xembovai 'rã.
4 — Mamo tu reĩ raka'e yvy ytarã anhono jave py?
Ndeayvu ke, anhetẽ ri ne'arandu va'e vy.
5 Mava'e tu oa'ã raka'e yvy, xapy'a rei reikuaa rã?
Mava'e tu ixã omoatã raka'e hi'áry rupi?
6 Mba'e nunga áry tu ijyta oĩ?
Ha'e mava'e tu omoĩ raka'e ita jypy guarã?
7 Ha'e va'e jave py ma jaxy-tata ko'ẽ rai'i javegua ovy'a ete reve oporaei okuapy,
ha'e Nhanderuete ra'y kuery ikuai va'e oguerovy'a okuapy.
8 — Ha'e mava'e tu okẽ py rami ojoko raka'e ye'ẽ
iguy gui ovu ouvy jave?
9 Mba'eta xee ae arai amoĩ ijaorã,
ha'e pytũ py anhovã ajukue py rami.
10 Xee ae amoĩ raka'e yy apyrã,
okẽ py rami ajoko vy.
11 Ha'e vy aipoa'e: “Apy peve'i 'rã reju, ndereaxavei 'rã.
Apy ae 'rã ndeguigua yai onhemboyvate reve ojeapi vy oxopa”, ha'e va'ekue.
12 — Ndee teve reikoa ára guive ndeayvu raka'e ko'ẽ rai ouvya va'e pe,
ko'ẽ va'e pe reikuaa uka vy hexakã aguã,
13 yvy apy re ovaẽ aguã,
heko vai va'e kuery omondyi heravy vy?
14 Yvy ojekuaa 'rã yapo omou'ũ mbyre
ha'e ao ixorĩmba va'e rami.
15 Heko vai va'e kuery gui amokanhy 'rã “Nhandevygua hexakã va'e” he'ia va'e,
ha'e amopẽ 'rã ijyva jojuka aguã oupi va'e.
16 — Ndee teve revaẽ ma ye'ẽ ryapy py,
e'ỹ vy reguata ma iguýry typyvea rupi?
17 Ndevy pe teve oexa ukaa omanogue ikuaia rokẽ?
Ndee rexa ma teve hokẽ pytũ anaa py oĩ va'e?
18 Reikuaa teve marã rami ete pa yvy ipya?
Ndeayvu ke, xapy'a rei reikuaa ri vy.
19 — Mamo rupi tu oĩ tape hendy va'e ro katy oo va'e?
Pytũa oĩaty voi mamo tu oĩ?
20 Erojevy ha'vy hekoa katy,
hoo via reikuaa ri vy.
21 Ndee nhi'ã reikuaa 'rã, ha'e va'e jave reiko ae ma rire,
ha'e reikoa ára mbovy rei e'ỹ!
22 — Ndee teve revaẽ ma yro'y apĩ amoĩ porãaty py,
ha'e rexa teve amandau amoĩ porãaty?
23 Mba'eta ha'e va'e ma xee amboyru imoiny anhombojexavai aguã,
joguero'a ha'e joe opu'ãa jave guarã.
24 — Mamo rupi tu oĩ tape hendy va'e oẽ ovy aguã katy,
ha'e yvytu kuaray oua katy gui yvy áry rupi oipeju ouvya katy?
25 Mava'e tu oipe'a 'rã oky xapy'a-py'a ou aguã,
ha'e tape hyapu ha'e overa va'e ou aguã?
26 Mba'eta ambo'oky 'rã yvy áry
avave rei oĩ e'ỹa py, tekoa e'ỹa rupi ae,
27 amoakỹ aguã yvy tekoa e'ỹa ipirupa va'e,
ajapo aguã jai roky yvate ovy aguã rami.
28 Oky nda'u tuu va'e oiko?
Mava'e tu ojapo 'rã yxapy otyky aguã rami?
29 Magui nda'u oiko yro'y hatã va'e?
Ha'e mava'e tu omoingo 'rã yro'y yva gui ho'a va'e?
30 Mba'eta yy hatã 'rã ita rami,
yy typy rei teĩ hi'áry rupi ma hatãmba 'rã.
31 — Tyrã ndee teve rejokua kuaa Eixu jaxy-tata,
e'ỹ vy rejora kuaa Hendy guaxu va'e ojokuaague?
32 Ndee teve reru kuaa 'rã jaxy-tata ijaty va'e,
e'ỹ vy reraa 'rã teve henoiny Ursa ta'y kuery reve?
33 Reikuaa teve yva re ikuai va'e rekorã oeja pyre?
Reikuaa teve marã rami pa yvy re ha'e kuery ipo'akaa?
34 — Tyrã ndee teve renhendu kuaa 'rã arai ikuaia peve,
oky vaipa aguã yy ndeao'i peve?
35 Tyrã overa va'e pe ndeayvu kuaa 'rã teve,
nembovai vy ha'e kuery “Apy ma roĩ” he'i okuapy aguã?
36 Mava'e tu omoĩ 'arandu arai ikuai va'e áry?
Ha'e mava'e tu omo'arandu jaxy-tata ova aguã re?
37 Mava'e nda'u o'arandu rupi oipapa kuaa 'rã arai ikuai va'e?
Ha'e rami e'ỹ vy mava'e nda'u onhoẽ kuaa 'rã yy yva re yryru ikuai va'e gui,
38 yvy ku'i oĩ va'e ojeapo aguã oja va'e,
ha'e yvy hakytã joe oje'apa aguã?
39 — Ndee teve rejuka 'rã guary kunha ho'u va'erã?
Ha'e guary ra'y kue'iry okaruxe rã remoevyatã kuaa 'rã teve
40 okua rupi ikuai jave,
e'ỹ vy onhemiaty gui oma'ẽ mbegue jave?
41 Mava'e tu uruvu kuery pe ojou uka 'rã ho'u va'erã,
ta'y kue'iry Nguuete pe ojapukai reve
ho'u va'erã rekaa rupi ikuai ramo?