36
Nawu Bininj Birriwarre Minj Bedda Kabirrimarneboddan Kore God.
1 Ngaye ngaburrbun kore kukangebeh ngardduk. Nawu ngahbenyolyolme bininj birriwarre, bu kunwarrekenh bedberre. Bedda minj kabirrimarnekele nungka God, dja mak minj kabirriwokmarrkmang.
2 Birrimekke bininj nawu birriwarre, wanjh bedda kabirrihdjalburlumerren. Kabirrimarneyimerren, “Ngad ngarrimak duninjh!” Minj kabirrihmulewarren, warridj minj kabirriwirrihmekenh manbu kunwarre bedberre.
3 Birrimekke bininj nawu birriwarre bu kabirriwokdi, wanjh kunwok kunwarre kabirriwokyiyime, dja mak kabirridjalkurren. Bedda djal birrimayali yak, dja birribawong kore kunmak birrikurduyimeninj.
4 Birrimekke bininj nawu birriwarre, bu kabirrikeyo kore balabala bedberre, minj kabirriwernkodjkeyo, kore kukangebeh bedberre kabirridjalkarremarnbun kunwarrekenh. Minj mak kabirribawon manbu kunmayali manwarre bedberre.
Yawey, Ngudda Nawu God Yiwernhmakkaykenh Duninjh.
5 Ngudda Yawey nawu kanwern marnedjare bulkkidj duninjh, yiman kayime kaddum duninjh kore heaven manwernhkimukkenh. Makka mandjalwernhkimuk yiman kaddum duninjh.
6 Ngudda nawu Yawey! Yidjalkudji yikurduyime kore kundjalmak duninjh bu munguyh munguyh, dja mak minj kunwarre yiyime. Manbu kunwok ngudda ke mandjalmak duninjh kadjaldi yiman kayime manwarddekimukkenh. Ngudda nawu kandjadme ngad bininj rowk, bu djal mandjad duninjh. Bu kanmarnewokdi kore kandjadmekenh wanjh manbu kunwok ngudda ke yiman kurrula kore manboburldjan duninjh. Ngudda Yawey, kannahnan ngad nawu bininj rowk dja mak yehyeng nawu karrarrkid, ngudda yinahnan rowk.
7 Ngudda kanmarnedjare ngad nawu bininj bulkkidj duninjh! Nawu ngarrimre kore ngudda ba bu kanmarnekukdjurruddi ngadberre.
8 Kumekke wanjh ngarringun dja mak ngarribongun mandjalwern kore ngudda kanwon, dja mak kanworrkmiwon bu kanwon manme manbu manmakmak ke. Mak kanwon kore kunmakkenh ngudda ke manbu manwern.
9 Ngudda yidjalkudji yimarnbun manbu kundarrkid ngarre, dja mak kandarrkidwon, manbu ngudda ke! Nawu ngudda kanmarnebolkwolkan ngadberre, ba bu ngad ngarribolknan mandjad.
10 Ngad ngundihburrbun, kore nguddah ngundimarnedjare bu ngad nawu kanmarnedjare munguyh munguyh. Ngad kore kunmakkenh bu ngudda kanburrbun ngadberre, wanjh ngarridjare ngudda kandjalmarnekurduyime kunmak bu munguyh.
11 Ngudda nawu kandjalnahnan ngaye, dja nawu bininj kabirriburlumerren bedda wardi ngandimelme, dja mak bininj nawu birriwarre wardi ngandibun bu ngaye ngakelerlobme.
12 Wanjh ngaye ngahbennan nawu bininj kabirrikurduyime kunwarre, nawu bedda kabirridjalyo kore yibenkukweng, minj mak kabirriyawoyhdolkkan.