41
Karridjawan God Bu Kankongibunkenh.
1 Bininj nawu nungka kabenyikarrme birridjalmarladj bininj, nakka wanjh kabenmarnenjilngmak. Nungan Yawey kabibingehke namekbe bininj bu kunrayek kabimarnewernmerren nuye.
2 Nungka Yawey kabinahnan dja mak kabimarnbun bu nungka karrarrkid bu minj karrowen. Nawu birribuyika bininj kabirrimarneyime bu Yawey kabimarnekurduyime namekke bininj. Minj Yawey kabibawon nawu bininj birriyidko bu kabirrimarnebebme nuye.
3 Yawey kabimarnbun namekke bininj bu darnkih karrowen wanjh kamakmen nungka bu kahdjalni kunmak rowk.
4 Ngaye nawu ngadjaldi yiwarrudj, bu marneyimeng, “Ngudda Yawey, kandjalkongibu! Ngaye ngabakkeng manbu mankarre ke, wanjh ngudda kandjalmarnbu!”
5 Nawu bininj ngarriyidko bedda wanjh kabirridjawarren bedmandeleng bu kunwarrekenh bedda ngandimarneyime, “Baleh kabolkyimerran bu nahni bininj karrowen, wanjh manbu kunngey nuye kangeyyakmen?”
6 Bu bininj bedda nawu ngarriyidko ngaye kabirrimre bu ngarriwokdi, wanjh kabirridjalkurren. Bedda kabirridjare bu ngandikowekenh, bu bedda ngandibawon wanjh kabirribalwohrewohre bu ngaye ngandiyolyolme kore kurobbe.
7 Birriwern bininj nawu ngandiwirrihme wanjh ngandiyolyolme ngaye. Bedda kabirridjare kunrayek duninjh nganmarnebebme.
8 Bedda kabirriyime, “Mah! Kaluk nakka karrowen. Mankimuk kundjak kabimang, minj kayawoyhdolkkan kore kahkeyo!”
9 Dja nawu nakudji bininj nganedabbolk duninjh ngardduk, nungka warridj ngandjalbawong. Bu ngakangekurrmeng nuye, mak nungka bu nganedjarrknguni manme. Bonj, nungka bolkkime wanjh ngandjalwirrihmeng.
10 Ngudda nawu Yawey kanwernkongibu! Kandolkkayhwemen ba bu ngabenbun bininj nawu ngandiwidnan.
11 Bu bedda minj ngandibun, wanjh kunu ngaye ngaburrbun bu ngudda yinjilngmak ngardduk.
12 Ngaye minj kunwarre ngayimeninj, dja ngudda kanbidyikarrmeng bu kankurrmeng ngahdi kore ngudda kumirrk ke bu djal munguyh.
13 Mah! Karridjalwernhburlumen God nawu Yahweh kadberre, ngad nawu bininj Israel kankebmawahmeng duninjh. Karridjalburlume bu munguyh munguyh. Bu djal woybukkih duninjh!