78
Bu Karrbenbukkabukkan Nawu Karrbenbornan Ba Bu Bedda Kabirriborlhme Nawu Kawohrnan Rowk.
Psalm 78:1-8
Kandibekka nawu ngardduk bininj rowk! Ngaye bengdayhke ngudberre, dja kandiwokbekkabekkan. Ngaye ngayolyolme kunwok manbu ngunmarnbun ngurrimayalimak. Dja mak ngayolyolme kunwok manbu warlkawarlkayindi bu kunkare duninjh.+ Mahni kunwok wanjh karribekkang dja karriborlhmeng. Nawu mawahmawah kadberre kandibukkabukkang bu kandibidnakenwong. Yuwn bu karrbenkaybun wurdwurd kadberre, dja karrbenbukkabukkan bu karriyolyolme Yawey nawu kundulkarrekimuk duninjh nuye kore nungka kurduyimi kunwern kunmak dorrengh ba bu karriburlume.
Nungka wanjh benwong nawu Jacob benkebmawahmeng mankarre nuye, dja mak benwokrayekwong nahni bininj nawu Israel benkebmawahmeng. Nungka benbengdayhkeng nawu kadberre mawahmawah ba bu bindibukkabukkang bedberre wurdwurd. Nungka kadjare nawu wurdwurd kabirriborlhme kore nungka benwokwong nawu kornkornkumo, dja wanjh bedmanwali bu kabirridjordmen, kabindibalbukkabukkan nawu wurdwurd bedberre bu kaluk yerrekah kabindikarrme. Bu kunmekbe kabirriborlhme nawu bininj rowk, wanjh kabirrikangewoybukwon nawu God, dja minj mak kabirribengmidjdan kore nungka kurdukurduyimi, dja kabirridjalwokmarrkmang nuye.
Bu kunmekbe wanjh minj kabindingunjdjikkan nawu mawahmawah bedberre bu birriwokweyi God dja minj birriwokmarrkmayi nuye. Minj birriwernhwoybukwoyi, dja birridjalbawong God kore kukange bedberre.
Bu Kunkareni God Nuye Bininj Minj Birriwokmarrkmayi.
Psalm 78:9-20
Bininj nawu Ephraim benkebmawahmeng wanjh birriwam bonarra dorrengh bu bindibuyi nawu birriyidko, dja bonj, birridjalkelerlobmeng dja birridjaldurnderrinj kured. 10 Bedda minj birrikurduyimeninj kore birriyingkihwokkurrmerrinj nuye God, dja minj birridjalwokweng nuye mankarre. 11 Birribengmidjdanj kore nungka kunwern benmarnekurduyimi kundulkarre nuye dorrengh kore bedda birrikurdunang. 12 God wanjh kurduyimi kundulkarre dorrengh kore mawahmawah bedberre birrikurdunang bu bedda birridi kore kabbalkimuk bolkngeyyoy Zoan kore kubolkkimuk Egypt.+ 13 Nawu Yawey boyarlarrkeng manbu kurrula dja benmarnedokmeng bu birridjowkkeng. Nungka marnbom manbu kurrula bu wernhbowayhmi yimerranj yiman warnamwarnamyonginj bokenh.+
14 Kaluk God benmarnekurrmi kunngolkudji nuye ba benbolhbukkani kunbarnangarra rowk kore balehbaleh birrireyi. Dja kunkak rowk wanjh benmarnekurrmi manbirlukimuk ba bolkwolkani bedberre.+ 15 Mak God benbowong kukku. Nungka warddebarrhkeng kore kubolkdarleh ba bu benbowong kukku manbowern duninjh kore kanjdjibeh duninjh wernhbobebmeng. 16 Nungka marnbom kukku borlobmirlobmi kore kunwarddekimuk yiman kayime mankabo duninjh.+
17 Dja bonj! Bedda wanjh birridjalbakkeyi nuye mankarre. Kore kubolkdarleh birrirey wanjh birridjalwokburriweyi kunwok nuye God nawu nakimuk duninjh. 18 Bedda birrikebdjarrkmeng God bu benwoyi manme manbuyika manbu birridjalmanjnguni. Kunu birridjareni bu birrirohrokmi nawu God. 19 Bedda wanjh kunwarre birrimarneyimeng nuye God bu birriyimerrinj, “Ngayh! Yiddok woybukkih God kanworrkmiwon manme manmak dorrengh kondah kore kubolkdarleh? 20 Ngad karrinang Moses bu warddedoy dja manbowern kukku borlobmeng dja yimerranj mankabo duninjh. Dja med, yiddok God woybukkih kanwon buriddi warridj? Yiddok God kanwon kunkanj ngad nawu bininj nuye?”
Nawu Yawey Bendungi Nuye Bininj Dja Benwong Manme.
Psalm 78:21-31
21 Bu nawu Yawey benbekkang, wanjh wernhyidduy dja benbom bedberre nawu Jacob benkebmawahmeng kunak dorrengh. Nungka wanjh yidwernni duninjh bedberre nawu mawahmawah nuye Israel. 22 Bedda minj birriwoybukwoyi God, dja minj mak birrikangekurrmerrimeninj kore kubid nuye ba kabenngehkekenh. 23 Dja bonj, nungka wanjh benwokmey. Nungka wokrayekwong kunngol kore kaddum, dja kunngol wanjh dangmarrhmey. 24 Dja benwong manme kore kaddumbeh yiman mandjewk mankang, dja maninjmanu manme wanjh birringeybom manna, dja wanjh birringuneng.+ 25 Bedda djal bininj birringuni maninjmanu manme bedberre nawu angels. God benmarnemunkeweng dja wanjh birriworrkmiworrinj. 26 Dja mak nungka munkeweng kunmayorrk kore koyekbeh, dja bebkeng kundulkarre dorrengh nuye kunmayorrk kore walembeh. 27 Bu kunmekbe kurduyimi wanjh God benwoni kunkanj kundjalwern duninjh. Dja benmarnemunkeweng mayhmayh nawu wernhmirndewernmerrinj duninjh bedberre dja wanjh birribuni birringuni. 28 God mirndemunkeweng ba mirndekolungi kore kubulkayh dabburlin bebbehbebbehdi bedberre. 29 Wanjh birringuninguni dja birriworrkminj rowk. God wanjh benwong kore manbu birridjareni.
30 Dja bedda birridjaldjareni birringuyi kunwern, wanjh birridjalnguninguni. 31 Kunmekbe wanjh God yawoyhyidduy bedberre, dja benbom nawu birringudjbangni bininj dja mak benwarrewong yawurrinj nawu Israel benkebmawahmeng.+
God Nuye Bininj Birridjalkurduyimi Kunwarre.
Psalm 78:32-37
32 Dja bonj, bedda wanjh birridjalkurduyimi kunwarre. Bedda birrikurdunang kore God benmarnekurduyimeng kundulkarre nuye dorrengh, dja birridjalkewkmi. 33 Kumekbekenh kunu God benkangewarrewong, dja bedda birridjalyakminj bu birridowerrinj kunkele dorrengh.
34 God benbuni yikahwi bedberre dja birridoweng, wanjh birribuyika birriwarnyakmulewarrinj. Birriborledkerrinj kore nungka, dja werrkwerrk birridanginj yiwarrudj. 35 Birriwohburrbom bu God bendjurruddi bedberre, nahni nawu Nawernhkimuk Duninjh benngehkeng. 36 Dja bonj, minj birriyimeninj kunwoybuk dorrengh. Birridjalkurrinj munguyh. 37 Minj birriwoybukwoyi kukange bedberre, dja birridjalbawoni kore birrimarnewokkurrmerrinj nuye.
God Benkongibom Nuye Bininj.
Psalm 78:38-39
38 Dja bonj, God wanjh bendjalkongibuni. Nungka benmarnebengmidjdanj kunwarre bedberre dja minj benbularrbuyi. Kunwernhkah nungka ngurdkerrinj bu yidwernminj dja minj yidduyi duninjh bedberre. 39 Nungka burrbuburrbuni bu bedda wanjh djal bininj nawu minj munguyh kabirridjaldarrkid, dja kabirridjalyakmen rowk.
God Nuye Bininj Birriwokburriweng.
Psalm 78:40-43
40 Bedda kunwernkah birriwokburriweyi bu birridi kore kubolkdarleh. Kunwernhkah birrinjingwarrewong nawu God. 41 Bedda nawu Israel benkebmawahmeng wanjh kunwernhkah birrirohrokmi dja birrinjilngwarrewong God nawu Nadjamun Duninjh bedberre nawu Israel benkebmawahmeng. 42 Birridjalbengmidjdanj kore nungka benbebkeng kundulkarre nuye dorrengh bu birriyidko bininj bindibongkarrmi. 43 Dja mak birribengmidjdanj kore God kurduyimeng kundulkarre nuye dorrengh dja benkangebarrhkeng bininj nawu birrikang kubolkkimuk Egpyt. Dja bu birrini kabbalwarlah bolkngeyyoy Zoan kore birrikurdunang warridj.
Bu God Benbom Bininj Nawu Bindibongkarrmi Nuye Bininj.
Psalm 78:44-51
44 Kumekbe wanjh God bomarnbom mankabo rowk bu mahni kukku boyimerranj kunkurlba, ba bu minj nangale birribonguyi.+ 45 Benmarnemunkeweng djoned nawern bu benmarnemirndewernmerrinj dja bennjilngwarrewong. Dja warridj kordbolbok benmarnemunkeweng nawern duninjh ba bu benmarnebolkwarrewong.+ 46 Nungka benmarnemunkeweng djaddedde nawern ba bu kangun manme bedberre kore kabbal djordmeni, dja mankolhde bedberre wanjh yakwong rowk.+ 47 Kaluk God benmarnemunkeweng mandulmuk mankurrk dja benmarneyakwong bedberre mandjoleng manbu barndibarndi kore manrakel rowk, dja mak bolkkedjelkwong ba bu mandjoleng manbu figs kore kundulk barndibarndi wanjh yakminj rowk. 48 Mahni mankurrk benbom bulikki, dja namarrkon nakimuk benbom mayh nawu birrimirndenahnani.+
49 Kuhni God yimerranj bu yidwernmerrinj bedberre. Nungka yiddungi dja bendjadmi bedberre, dja kuhni kurduyimeng ba bu benbengdayhkeyi kundowikenh bedberre. 50 Minj kangemarnburrimeninj bu yidyakmeninj, dja bendjalbom bedberre bininj nawu birrikang Egpyt. Nungka benwong kundjak kunkimuk dja wanjh birriwern birridoweng. 51 God wanjh benbom nawu nawewernhwarre rowk nawu birridanginj kore namud rowk bedberre nawu birrihni Egypt.+
God Benngehkeng Nuye Bininj.
Psalm 78:52-55
52 Kaluk wanjh God benkang nuye bininj yiman kayime shepherd kamirndekanakan mayh nuye. Benbolhbukkabukkani kore kubolkdarleh ba bu birrirey kamak rowk.+ 53 Benkang kamak rowk ba bu birridjalkeleyakni. Dja bininj nawu birriyidko wanjh kurrula bendjalbarrkbom.+ 54 God benkani dja birribolkmey nuye kunbolk. Benkang kore kuwarddekimuk nuye, manbu nungka bolkmey kubidkukun nuye dorrengh.+ 55 God wanjh benburriweng bininj rowk nawu birriyingkihdi kore kubolkbubuyika dja benbolkwong nuye bininj ba bu munguyh kabirrihni kumekbe. Benbebbehbolkwong nawu namudbubuyika bedberre bininj nawu Israel benkebmawahmeng.+
Bu God Nuye Bininj Birrimarnbom Nungka Wernhyidduy Bedberre.
Psalm 78:56-64
56 Dja bonj. Nahni bininj nawu Israel benkebmawahmeng birridjalrohrokmeng God nawu Nakimuk Duninjh, dja birriwarnyakminj kore nungka benwokrayekwong. Minj birrimarrkmayi nuye mankarre.+ 57 Bindingunjdjikkang nawu mawahmawah bedberre, dja birridjalbodmewoyi nawu God. Minj birriwernhwoybukwoyi dja birridjalkurrekurrinj. 58 Bedda birribolknameng kubolkwern kore birrimarneboddangeni nawu idols. Kuhni wanjh benmarnbom God bu kirnwernmerrinj dja wanjh yidduy duninjh bedberre. 59 Nungka benbekkang bu kuhni birrikurduyimi, wanjh wernhyidduy, dja benwarnyakminj rowk nawu bininj nuye nawu Israel benkebmawahmeng. 60 Wanjh nungka bolkbawong manbu yonginj kore kunred Shiloh, kore nungka kurrmerrinj nuye bu dingihdi darnkih kore bininj kondah kurorre.+ 61 Dja mak benbawong birribuyika bininj nawu birriwarre bu birridjirdmey manbu Ark nuye. Mahni Ark wanjh benbengdayhkeyi nuye bininj ba birriburrbuyi God nuye kundulkarre dja mak kunmakmak.+ 62 Dja benbawong nawu birriyidko bininj bu bindibuni mandjawakwi nawu djal nuyekih bininj! Nungka wanjh benmarneyidduy duninjh nuye bininj rowk. 63 Kaluk kunak benkukyakwong birriwern nawu yawurrinj nuye. Ngalbu yawkyawk birridowerrinj, minj birringalkemeninj bininj bu birrimarrimeninj. 64 God nuye bininj nawu birrimarnedurrkmirri nuye yiman priests, wanjh birriyidko bininj bindidjalbom mandjawak dorrengh. Dja mak bindidabkeng ngalbu birrikamarrdjukun bedberre bu bindimarnenalkbuyi.
Nawu Kawohrnan Rowk Benmarnedjarrngbom King Bedberre.
Psalm 78:65-72
65 Kuhni rowk kurduyimerranj bedberre nawu God nuye bininj. Dja nawu Kawohrnan Rowk wohdolkkang yiman kayime bininj nawu kodjkewarreni. Mak yiman kayime ngudjbang bininj nawu keyonginj bu mayahmi kunbangkenh bu karrolkkarren. 66 Wanjh bendurndiweng nawu birriyidkoni bininj dja birriyemengalmi munguyh munguyh.
67-68 Kaluk djarrngbom nakudji namud, bendjarrngbom bininj nawu Judah benkebmawahmeng. Bendjalwarnyakni bininj nawu Joseph benkebmawahmeng, dja minj mak bendjarrngbuyi mawahmawah nuye nawu Ephraim. Nungka bolkdjarrngbom kuwarddekimuk kabolkngeyyo Zion manbu kabolkmanjngun. 69 Kumekbe wanjh rurrkmarnbom kunrurrk mandjamun nuye. Rurrkmarnbom bu manrurrkkimuk kaddum ba bininj birriyimeng kare kore kaddum heaven. Dja mak wernhrurrkmarnbom dja minj karokayhme, dja kadjaldi munguyh yiman kurorre manbu nungka marnbom.
70-71 Kaluk yerrekah bidjarrngbom David nawu bimarnedurrkmirri. Biwayhkeng kore kurralk mirndenahnani mayh nawu sheep dja bikurrmeng bu yimerranj king nawu bennahnani bininj nawu Jacob benkebmawahmeng. Bennahnani God nuye bininj nawu Israel benkebmawahmeng, yiman shepherd kamirndenahnan nawu mayh.+ 72 Wanjh King David bennahnani kamak rowk. Minj kunwarre benmarnekurduyimeninj dja wanjh nungka kunmayalimak dorrengh bu bennahnani.
+ 78:2 Matthew 13:35 + 78:12 Exodus 7:812:32 + 78:13 Exodus 14:21-22 + 78:14 Exodus 13:21-22 + 78:16 Exodus 17:1-7; Numbers 20:2-13 + 78:24 John 6:31 + 78:31 Exodus 16:2-15; Numbers 11:4-23,31-35 + 78:44 Exodus 7:17-21 + 78:45 Exodus 8:1-6,20-24 + 78:46 Exodus 10:12-15 + 78:48 Exodus 9:22-25 + 78:51 Exodus 12:29 + 78:52 Exodus 13:17-22 + 78:53 Exodus 14:26-28 + 78:54 Exodus 15:17; Joshua 3:14-17 + 78:55 Joshua 11:16-23 + 78:56 Judges 2:11-15 + 78:60 Joshua 18:1; Jeremiah 7:12-14; 26:6 + 78:61 1 Samuel 4:4-22 + 78:70-71 1 Samuel 16:11-12; 2 Samuel 7:8; 1 Chronicles 17:7