93
Yawey Nawu God Wanjh King Duninjh.
Psalm 93
1 Nawu Yawey kawohrnan rowk! Nungka king duninjh dja kadjongbuyindi namakmak duninjh kunmadj nawu kingskenh. Nungka narrulkarrekimuk duninjh ba bu kabenbun rowk.
Nungka bolkmarnbom rowk kondah kurorre, dja minj nangale kabolkrokayhwe.
2 Ngudda Yawey wanjh yidjalwohrnawohrnang rowk bu kerrngehkenh duninjh, dja mak munguyh munguyh.
3 Kurrula yiman kawayini kore ngudda Yawey. Kurrula yiman kakayhme wernkih duninj bu kayolyolme ngudda ke. Manbu kunmayorrk kunkimuk kabobun kurrula, dja kabomurrngrayekworren kore ngudda.
4 Ngudda Yawey wanjh yidjalwernhkimuk duninjh dja yiyurrhkeng kurrula nawu kawernmerren. Nawu kurrula kabobidbun, dja ngudda wanjh yidjalkimuk duninjh, dja yidjalyurrhke rowk. Yawey, wanjh ngudda yidjalngudjkimuk duninjh, dja yibenyurrhke rowk nawu heaven kabirrihni.
5 Yawey, ngudda yikarremarnbom mankarre duninjh manbu kadjaldi munguyh. Kore ngudda yihdi, wanjh kubolkdjamun duninjh, dja kundjalmak kahdi munguyh munguyh kore manrurrkdjamun ke.