Luke
1
Andjel bim‑yikang Meri
26b Kod bi‑munkeweng namekke andjel [angel] Kabriyel [Gabriel] kure kubolk‑kimuk ka‑bolk‑ngeyyo Nadjared [Nazareth], kure kubolk‑warlah Kalili [Galilee].
27 Bi‑munkeweng bi‑marne‑bebmeng ngalyawk ngalu minj bininj bene‑yuwirrinj. Ngalekke ngalu mak birri‑berrebbom bininj minj bene‑marrimeninj nawu ngeyyoy Djodjib [Joseph], nawu King Deybid [David] bene‑mud. Ngalekke ngalyawk ngalu ngeyyoy Meri [Mary].
28 Namekke andjel kam‑wam bi‑marneyimeng, “Ngudda ngalu Kod ngun‑marneyimeng bu ngudda yi‑mak, wanjh nungka ngune‑djarrk‑re!”
29 Wanjh Meri bekkang manekke kunwok ngaleng njilng‑warreminj, mayahmeng, ngalengman bengkah‑bengkang yimarnek njale‑kenh kune bi‑marne‑wokdi.
30 Wanjh andjel bi‑ngeybom yimeng, “Meri, minj yi‑kele. Kod nungka namak ke.
31 Kan‑bekka, marneyime, kaluk ngudda yi‑kuk‑dulmuk wanjh yi‑yaw‑mang narangem, wanjh yi‑ngey‑kurrme nane wurdyaw Jesus.
32 Kaluk nungka nakuken, ka‑ngeyyo ‘Beywurd nuye Kod nawu na‑djal‑wernh‑kimuk’. Kod nawu Kaworhnan Rowk, wanjh kabi‑marnbun nungka nakimuk ka‑worhnan kure Deybid worhnang korroko.
33 Kaluk nungka ka‑djal‑worhnan munguyh‑munguyh kure nawu Djeykob [Jacob] ngurri‑mud, minj ka‑ngurdme nuye, munguyh ka‑djal‑worhnan.”
34 Meri bi‑wokmey andjel nawu kunwok kam‑kang, bi‑marneyimeng, “Kaluk baleh yimerranj? Ngayi minj bininj ngane‑yuwirrinj.”
35 Wanjh namekke andjel bi‑wokmey, bi‑marneyimeng, “Nawaralmakkaykenh kaluk ngun‑yikarrme, Kod nawu Kaworhnan Rowk, kaluk kunngudj nuye ngun‑barrkbun. Ba kune ka‑kurduyime, wanjh namekke nawu yi‑yawmang wanjh namekke nuye Kod. Kaluk ka‑ngeyyo ‘Beywurd nuye Kod’.
36 Kune mak marneyime. Yilidjabed [Elizabeth] ngalu ngudda ngone‑mud, ngaleng mak bolkkime ka‑yaw‑kan narangem, ngaleng ngalkohbanj. Dird 6 ka‑marnbun bu kah‑kan, ngalu birri‑marneyimeng ngaleng ngal‑walirrng‑warreni.
37 Minj njale ka‑rayek kure nungka Kod.”
38 Wanjh Meri yimeng, “Yoh. Ngayi nga‑djal‑marne‑durrkmirri nuye nawu Kaworhnan Rowk. Bonj, nga‑djare ngan‑djal‑marne‑kurduyime manekke kunwok bu ngudda kan‑marneyimeng.”
Namekke andjel bi‑bawong, wam.