Mark
1
Djon [John] bi-yingkih-marne-bolh-marnbom manbolh nuye Jesus.
1 Mane kunwok manmak. Kabi-yolyolme Jesus Christ[1], nawu beywurd nuye Kod. [1] “Christ” – mane kunngey kayime “Nawu Ngabbard Bi-munkeweng”
2 Kune wanjh yingkih-karremarnbom kure nakare Isaya [Isaiah] bimbom, bi-wok-mulewam bu kunyungki, bu yimeng, “Nungan Kod yimeng, “Kan-bekka! Ngayi nga-munkewe bininj nawu ngan-marne-wokdi ngayi ngardduk, ka‑yingkih‑bolh‑marnbun manbolh-kenh.
3 Kure kubolk-mudjmudj nane bininj kah-kayhme kah-yime, “Manbolh ngurri-marnbu nuye nawu Kaworhnan Rowk! Karri‑marnbu manbolh mandjad nuye!”
4 Nungka Djon [John] ben-kodj-djuhkeng bininj, bebmeng kure kubolk-mudjmudj, ben-marne-mulewam ben-marneyimeng kure bininj birriwern, “Ngurri-borledmen nuye nawu Kaworhnan. Ngurri-bawo kunwarre, Kod ngun-bengdubberranj ngudberre, bu ngurri‑kodj‑djuhmen.
5 Wanjh kure kunred ngalengarre Djerusalem [Jerusalem] mak kubolk-warlah Djudeya [Judea] birriwern bininj birrim-wam bu birri-yikang Djon. Wanjh kumekke birri‑warnyak‑mulewarrinj kunwarre bedberre, Djon ben‑kodj‑djuhkeng kure mankabo Djordan [Jordan].
6 Djon djongburrinj kunmadj nawu marnbom kure kunmarre mayh nuye nawu kamel [camel]. Mak nawu kunngardmokenh kulahno mayh marnbom dukkarrinj, mak nguneng djaddedde mak mankung.
7 Djon yolyolmeng bedberre yimeng mane kunwok, “Nakudji bininj kam-re nawu wernh-ngudj-kimuk duninjh ngan-yurrhke ngayi. Ngayi minj ngamak ba nga-boddan nga-rrenge-yerrkke nawu kah‑denge‑djongburren nuye.
8 Ngayi kodj-djuhke ngudberre kure kunronj, nungka ngun‑kodj‑djuhke ngudberre kure Nawaralmakkaykenh.”
Nawral Makkaykenh Kam-koluy kure Jesus
9 Wanjh kunekke rerrih Jesus bolk-bawong Nazared kure Kalilee wam kure Djon ningih-ni, wanjh kumekke Djon bi-djuhkeng Jesus kure mankabo kabo-ngeyyo Djordan.
10 Jesus bidbom kure kuronj-beh, worhnang kaddum nang dangmarrhmiwam, Nawaralmakkaykenh yiman marlum kamh‑koluy kure nungka dingih-di.
11 Wanjh kam-wokdi kure kaddum-beh, yimeng, “Ngudda beywurd nardduk. Ngayi wanjh nga-djurrkwon nguddangke.”
Nadarr Satan bi-djurrkkang Jesus
12 Kunekke rerrih Nawaralmakkaykenh bi-kang Jesus kure bi‑munkeweng kubolk-mudjmudj.
13 Kure kumekke kubolk-mudjmudj Jesus ni kunkodjdje kunwern 40, kumekke birrih-ni mayh nawu birribang. Kure kubolk-mudjmudj ningih‑ni Jesus, Naderr Satan wanjh bi‑djurrk-kang. Kumekke andjels birri‑marne-bebmeng birri‑bidyikarrmeng Jesus.
Jesus yolyolmeng kunwok bu bi-mulewam Ngabbard
14 Wanjh bininj birri-kang Djon kure kururrk birri‑dangbalhmeng. Wanjh Jesus wanahwam kure Kalilee mulewam manmak kunwok nuye Ngabbard.
15 Wanjh ben-marneyimeng, “Kune wanjh darnkih kah-yimerranj kamh-re Kod nawu Kaworhnan Rowk. Ngurri-borledmen, ngurri‑bawo kunwarre, ngurri-woybukwo manmak kunwok.”
Jesus ben-kayhmeng birri-buyika bininj nawu birrih-mey djenj.
16 Jesus wanah-wam kure manwern mankabo-kimuk kabo‑ngeyyo Kalili [Galilee], wanjh woh-nang ben-nang Saymon, Andru [Andrew] nawu bene-danginj. Beneh-weng warrkaridj kure kubuldjdjarn, djenj beneh-mey. Bedda bene-durrkmirri bu beneh‑mey djenj.
17 Wanjh bu Jesus ben-marneyimeng berrewoneng, “Ngunem‑ray ngayi kandi-kaydju, bu bukkan ngurrewoneng ngurrben-mang bininj.”
18 Wanjh kunekke rerrih Saymon, Andru bene‑bawong warrkaridj berrewoneng manbu djenj beneh-mey wanjh bene‑munkekadjuy Jesus.
19 Jesus wanah-wam minj djarreh-niwirrinj ben-yawoyh-nang bene‑buyika bininj, bene-ngeyyoy Djayms [James], Djon [John] nawu bebeywurd nuye Zebedi [Zebedee]. Bedda kure bene‑barndi kabbala bene-marnbom berrewoneng warrkaridj.
20 Mak kornkumo berrewoneng nawu Zebedi nawu birrih‑djarrk‑durrkmirri nuye kumekke birrih-barndi kure kabbala bebeywurd nuye Zebedi.
Kunekke rerrih Jesus ben‑kayhmeng benemekke nawu bene-danginj, wanjh rerre bindi-bawong birri‑buyika kornkumo dorrengh, wanjh bene‑munkekadjuy Jesus.
Jesus weng nawarre
21 Jesus birri-wam nuye bininj kure kabolk-ngeyyo Kabernayum [Capernaum]. Kunekke wanjh benbekad yimerranj Sabbad [Sabbath], Jesus wam ngimeng kure kururrk kure yiwarrudj birri-di Sinakok [Synagogue], kumekke durrkmirri ben-bukkang birrimekke bininj.
22 Birri-wern bininj birri-kangebarrhmeng birri-bekkang kunwok, ben‑bukkang kunmurrngrayek kunwok nuye Ngabbard, minj ka‑rohrok nawu bininj mankarre kure kabindi-bukkan.
23 Kumekke Jesus ningih-ni, nakudji bininj di kure kururrk yiwarrudj, nungka karrmeng nawarre. Wanjh namekke nawarre kayhmeng, yimeng,
24 “Jesus kure Nadared-beh [Nazareth-beh], yey! Ngudda njale yi-djare? Yiddok ngudda yim-wam kan-bun ngadberre? Ngayi bengkan ngudda, ngudda Kod nuye yi-kukdjamun.”
25 Wanjh Jesus bi-marneyimeng bi-wok-rayek-wong, “Yi‑ngurdmen. Yi-bebmen, yi-bawo nakkan bininj!”
26 Nawarre bi-marnbom namekke bininj deldelmeng kunkimuk duninjh. Kumekke rerre nawarre bi-kayhmeng wernkih, wanjh bebmeng, wam, bi-bawong bininj.
27 Kaluk birriwern bininj birri-nang birri-kange-barrhmeng. Wanjh birri-djawarrinj bu birri-marneyimerrinj, “Kaluk baleh kune kukyimerranj? Nane bininj kah-yolyolme mankarre‑kerrnge, mak kah‑yolyolme yiman ka-yime nawu ka‑worhnan duninjh. Nungka kaben-marneyime nawu na-warre kunwaral nawern, kaben-kundjibun.”
28 Manekke kunwok wernminj kure kubolk-warlah Galiliee Jesus nuye.
Jesus ben-marnbom birri-wern bininj
29 Jesus birri-wam nuye bininj benemekke Djaym [James], Djon [John] birri‑djarrk‑wam birri-bolkbawong kururrk ngalengarre kure yiwarrudj birri-di. Wanjh birri-wam kure Saymon [Simon], Andru [Andrew] berrewoneng kured.
30 Ngalu Saymon nuye ngal-binjbalak yoy doweh-doweng karrmeng kundjak. Wanjh bininj nawu kumekke birrih-ni birri‑marneyimeng Jesus ngaleng-kenh.
31 Wanjh Jesus bi-yikang kure ngaleng yongohyoy. Wanjh bi‑bidkarrmeng bi-rrolkkayhweng. Kumekke rerrih kundjak bi‑bawong, wanjh ngaleng makminj. Wanjh ngaleng wam kinjeng manme ben-wong birri-nguneng.
32 Bu ngokdanj-ngokdanj mununminj, birri-wern bininj bindim‑kang nawu kundjak birri-karrmeng, bindim-kang kure Jesus. Mak nawu wayarra birri-karrmeng, nakka mak bindim‑kang kure Jesus.
33 Wanjh kumekke kunred kure birrih-ni birri-kaberrk-raworrinj birrih-ni kure kurrambalk kure kururrk.
34 Wanjh kumekke Jesus ben-marnbom birri-wern nawu mankukbuyika kundjak birri-karrmeng. Mak ben-bebkeng wayarra nawu birrikukbuyika bindi-karrmeng birri-wern. Kaluk wayarra birrikuk-bengkang Jesus, wanjh kunekke-kenh Jesus ben-ngurdkeng birrimekke wayarra.
Jesus dingih-di yiwarrudj kure kubolk-mudjmudj
35 Bu kunkodjdje-buyika kamh-kabelni, Jesus dolkkang kukak rerrih, wanjh bolk-bawong kure yongohyoy. Wam bolk-ngalkeng kure minj bininj birri-niwirrinj, wanjh yiwarrudj di.
36 Wanjh rerre, Saymon bedda birri-wam birri‑yawam Jesus.
37 Kaluk bu birri-ngalkeng wanjh birri-marneyimeng, “Birri-wern bininj ngundih-yawan!”
38 Wanjh Jesus yimeng, “Ngad wanjh karri-re kubolk-bubuyika. Karri-re darnkih kure ka-rurrk-kaberrkdi ba nga-yolyolme bedberre bininj. Kunekke-kenh ngam-wam.”
39 Wanjh birri-djarrk-wam kure ku-yaw-bolkkimuk kunred ngalengarre Galilee. Nungka yolyolmeng kure kunrurrk nuye yiwarrudj-kenh, nungka ben-bebkeng bedberre nawu nawarre birri-karrmeng.
Jesus bi-marnbom bininj nawu kulah-warreni
40 Nakudji bininj kundjak karrmeng. Kaluk kulah-mokni, wanjh bim‑yikang Jesus, kam-wam bard-durrungkulhdanj, wanjh bi‑marne‑kongiburrinj Jesus bu yimeng, “Nga-djare kan‑marnbu kan-djirridjbu. Nga-bengkan ngudda yi-karrme kunngudj.”
41 Wanjh Jesus bi-kongibom namekke bininj. Bid‑yirriyoy Jesus, bi‑karrmeng bu yimeng, “Ngayi nga-djare marnbun. Wanjh yi‑makmen.”
42 Wanjh kun-djal-kudji rerrih manekke kundjak bi-bawong namekke bininj, wanjh kulah-makminj.
43 Wanjh Jesus bi-marneyimeng namekke bininj bu ka-re werrk, wanjh bi-wok-rayek-wong bi-marneyimeng,
44 “Minj nangale yi-marne-mulewan bu kune nga-rrurrkmirri ke. Yi-djalay yingan kure djungkay yi-kuk-bukkarren. Kod Ngabbard bi-wong Moses kure mankarre. Kaben-bukkan bininj kure ngayi belewo.”
45 Wanjh bonj, namekke bininj bolk-bawong kumekke, wanjh wam. Ben-marne-yolyolmeng birri-wern bininj bu Jesus bi‑marnbom. Jesus minj rayinj kure birri-kaberrkdi. Wanjh djalwah-djalwam kure kunred minj nangale niwirrinj. Birri-wern bininj birri‑yorrmeng birri-kang kubolk-bubuyika birri-bebmeng kure nungka ningih-ni.