Ⅲ
Ⅰ Inwe Abaisraeli, tegerera moigwe amang’ana ay’Omonene akwanire igoro yaino, ee, igoro y’egesaku eke gionsi arusetie korwa ase ense ya Misiri:
Ⅱ “Ninwe mweka namanyete na korenda ase chiamate chionsi chi’ense. Ase ayio nimbae egesusuro ase engencho y’ebibe biaino bionsi.”
Emeremo y’omobani
Ⅲ Inee! Abanto babere mbataarere amo onye tibabwataini?
Ⅳ Inee! Endo nerume ase rinani, onye teraita eke yare gotwara?
Gose endo ensae nkoruma ere, onye terabwata kende ekoria?
Ⅴ Inee! Enyoni nebwatwe ase egesugunia onye tebekeiri egekoyengusa?
Gose omoeto notegoke bosa onye tonyegeiri na gento?
Ⅵ Inee! Egetureri gi’eseegi nkebugigwe ase omochie, na abanto
tibaaba nobwoba?
Amang’ana amabe nabe ase omochie, Omonene atayatometi?
Ⅶ Ekeene, Omonene tagokora ring’ana rinde rionsi
ritang’ani ataramaanora obobisi bwaye ase abasomba baye ababani.
Ⅷ Endo koyarumire, monto ki otari kwoboa?
Omonene gakwanire, ning’o otari koraria obobani obwo?
Okogambigwa gwa Samaria
Ⅸ Raria amang’ana ayio ase chinyomba chinkong’u chi’Asidodi, na echi’ense ya Misiri, moteebie abanto bare aroro: “Inchuo, mosangererekane amo igoro ase ebitunwa bia Samaria, morore eburu‐buru ere aroro, na buna obobe bogendererete gokorwa aroro.”
Ⅹ Omonene nigo agoteeba iga: “Abanto abwo tibamanyeti gokora ayare amaya. Nigo bagachete ebinto bi’obouri na ebi’oboibi ase chinyomba chiabo chinkong’u.”
Ⅺ Ababisa mbanaarie ense eye, baiyerie chindwaki chiaino inse, ne chinyomba chiaino chinkong’u chisakorwe.
Ⅻ Aya naro Omonene agoteeba: “Buna koreng’ana omorisia agotoria korwa ase omonwa bw’endo amagoro abere, gose egetabo ki’ogoto kw’eng’ondi eyio konya endo yarire, naboigo bake barataborigwe, abwo bamenyete Samaria baikaransete ase ebirogo ebiororo na ase emeito etubire nebitambaa bi’ariri.”
ⅩⅢ Omonene, oyore Nyasae bw’Emeganda, nigo agoteeba iga: “Tegerera moigwe amang’ana aya, erio moyararie ase ororeria rwa Yakobo.
ⅩⅣ Ase rituko erio ndarue egesusuro ase Abaisraeli ase engencho y’ebibe biabo, ninsarie na gotagora ebisasimero bia Beteli; nintagore na koiyeria inse chinsinyo chionsi chi’ebisasibero bionsi.
ⅩⅤ Nintagore chinyomba ase mokobeera ekero ki’etoigo amo nechio mokobeera ekero ki’egurugura; boigo ninsarie chinyomba chichabeire amaino e chinchogu, ne chinyomba chinene nchisirigwe kegima.” Nabo Omonene ateebire.