RIRUUBE RI’ERITANG’ANI RIA PAULO OMOTOMWA ASE
ABAKORINTO
Ogochaakera
Riruube rieritang’ani ria Paulo gochia ase abakristo ba Korinto nigo riarigetu ase omwaka 54 magega ya Kristo. Paulo nigo ariigete riruube eri ekero arenge Efeso ase orogendo rwaye rwa gatato yokorandia amang’ana amaya igoro ya Yeso Kristo. Omochie o Korinto nigo orenge omochie bw’engencho mono ase ense yabagiriki ase chingaki echio. Nigo orenge omochie bwobonchorerania boigo nigo omanyekanete ase okobwatia chingencho chia kare. Abanto b’omochie oyo nigo barenge gosasiima chinyasae chinyinge. Buna ere engencho yemechie emenene, omochie o Korinto nigo obwate chingencho chimbe goika Abakristo ba Korinto bagachaaka kobwatia chingencho echio chimbe. Paulo nigo achagete ogosasiima gwekeene ase abwo barenge abatunyani ba Kristo ase omochie o Korinto ekero atarete aroro ase ogotara kwaye gwakabere na akamenya aroro ase omwaka oyomo nekeng’ese.
Riruube eri nigo riarigetwe erio korwa omoroberio ase amang’ana amange ayio konya Paulo aborigwe nabaKristo b’ekanisa eyio achagete aroro (7:1, 5:9). Konya Paulo orikire riruube rinde korende rigasira ase engencho ritarendire buya. Ase riruube eri Paulo nigo agokwanera igoro yamang’ana ayio achandete Abakristo ba Korinto boigo nakobaorokereria buna ebagwenerete komenya. Gati yamang’ana ayio Paulo agakwanera naria buna oboamate gati yabaKristo na baria bategeneti (1-6). Paulo boigo nigo agokwanera igoro yobogima obobe ase ekanisa; okobagekana gati yabaKristo boigo nogosoerana ase ebigambero bi’abwo bategeneti.
Egesieri gia (7-10) nigo bigokwanera igoro yabaKristo bonsi tari Abakristo ba Korinto boka. Nigo bigokwanera amang’ana buna okonyuoma, boigo na igoro yendagera.
Egesieri 11-14 Magega Paulo gakoorire gokwanera igoro yamang’ana ayio achandete Abakristo, bono ase ebisieri bikobwatia nigo agokwanera igoro yokoumerana amo buna Abakristo ase ogosanga ase Epasaka y’Omonene boigo nakonyora ebiegwa bi’omoika.
Egesieri 15-16 nigo bigokwanera igoro yokobokigwa kwa Yeso amo nabegeni. Ase ogokoorera Paulo nigo agokwanera igoro yomooroberio bw’ogosasiima ase abegeeni.
Okobagwa kw’egetabu eke
Ogochaakera 1:1-9
Ogwatananeka ase ekanisa ime 1:10—4:21
Okworokereria kw’ogweatanana korwa ase obotomani 5:1—7:40
Abakristo na abatari Abakristo 8:1—11:1
Obogima bw’ekanisa na ogosasiima koreo 11:2—14:40
Okobokigwa gwa Kristo na okw’abegeni 15:1-58
Ogosangererigwa kw’ebiegwa ase Abakristo ba Boyahudi 16:1-4
Emeroberio ya Paulo na ogokoorera 16:5-24
Ⅰ
Ogokwania na ogoaka ng’a mbuya mono
Ⅰ Inche Paulo narangeretigwe koba omotomwa o Kristo Yeso ase ogwancha kwa Nyasae.
Inche amo noyominto Sostene
Ⅱ nkobariikera tore inwe abekanisa ya Nyasae ere ase Korinto, inwe abamwachenirwe ase Kristo Yeso, abamwarangerigwe koba abachenu amo na bonsi abakorangeria erieta ri’Omonene oito Yeso Kristo kera aase, nere Omonene obo na oyoito.
Ⅲ Obuya na omorembe bibe ase more, ebio bikorwa ase Nyasae Tata oito, na ase Omonene Yeso Kristo.
Ogosesenigwa ase Kristo
Ⅳ Botambe nigo nkomoakera Nyasae ng’a mbuya mono ase engencho yaino, ase engencho y’obuya bwaye obwo mwaetwe ase Kristo Yeso.
Ⅴ Ase kera enchera mogatenenkigwa ime asare ase chinkwana chionsi, ne chisemi chionsi,
Ⅵ buna oborori bwa Kristo bwabekirwe chinguru ase egati yaino.
Ⅶ Na bono timoremeiri keegwa kende gionsi, komoganyete okoorokigwa kw’Omonene oito Yeso Kristo.
Ⅷ Nere orabakong’ie goika omoerio, erinde timocha koba nokomocha ase rituko riria ri’Omonene oito Yeso Kristo.
Ⅸ Nyasae nomwegenwa, oyobarangeirie mosoe ase obomo bw’Omwana oye, Yeso Kristo Omonene oito.
Ogwatananeka ime ase ekanisa
Ⅹ Nabasoroire inwe, baminto, ase erieta ri’Omonene oito Yeso Kristo, mokwane mwensi ayamo, erinde ogwatananeka tikoba ase more; korende mobe nokobwatana ase ebirengererio ebimo na okogamba okomo.
Ⅺ Naki baminto, nateebigwe nabaanto ba nyomba mwa Kiloe, ng’a eriomana ndire ase egati yaino.
Ⅻ Engencho yagera nakwana bo neye, ng’a oyomo ore ase egati yaino nigo agoteeba, “Inche noyo o Paulo,” na oyonde, “Inche noyo bw’Apolo,” na oyonde, “Inche noyo o Kefa,” na oyonde, “Inche noyo o Kristo.”
ⅩⅢ Inee! Kristo naatananekire? Gose Paulo nere obambetwe ase engencho yaino? Gose igo mwabatisetwe koba aborokigwa ba Paulo?
ⅩⅣ Namoakeire Nyasae ng’a mbuya mono, ase engencho ntabatisete monto onde, ase more otatiga Krispo na Gayo,
ⅩⅤ erinde onde tacha goteeba ng’a mwabatisetwe ase erieta riane.
ⅩⅥ (Naende nkabatisa abanto ba nyomba mwa Stefana. Kobua ase abwo, tinkomanya gose nabatisete monto onde.)
ⅩⅦ Naki Kristo tantomete ng’a mbatise, korende ndandie enchiri, tari ase obong’aini bw’amang’ana, erinde ogokwa kwa Yeso Kristo ase omosalaba tikourwa chinguru chiaye.
Kristo Chinguru nobong’aini bwa Nyasae
ⅩⅧ Naki ring’ana ri’ogokwa kwa Yeso ase omosalaba noboriri ase abwo bagosira, korende ase tore intwe abatwabeire togotoorigwa nigo rire chinguru chia Nyasae.
ⅩⅨ Naki neriikire,
“Ninsarie obong’aini bw’abang’aini,
na okomanya kw’abamanyi ninkwange.”
ⅩⅩ Ng’ai are omong’aini? Ng’ai are omworokia bw’amariiko? Ng’ai are oyokoamererania namang’ana ’ense eye? Inee! Nyasae takorete obong’aini bw’ense eye koba oboriri?
ⅩⅪ Ekiagera ase obong’aini bwaye Nyasae akaroberia, ng’a ense tekonyara komomanya ase enchera y’obong’aini, agancha kobatooria abamwegenete ase oboriri bw’ering’ana riria rikorandigwa.
ⅩⅫ Abayahudi nigo bakonakoboria barore ebikone, na Abagiriki bakorigia obong’aini,
ⅩⅩⅢ korende intwe nigo tokomorandia Kristo oyobambetwe, ase Abayahudi nekegocha, na ase abanto b’Ebisaku noboriri.
ⅩⅩⅣ Korende ase abwo barangeretigwe, Abayahudi na Abagiriki bonsi, Kristo nere chinguru chia Nyasae, na obong’aini bwa Nyasae.
ⅩⅩⅤ Ekiagera oboriri bwa Nyasae mbore nobong’aini kobua obongaini bwa Mwanyabaanto, na oboreu bwa Nyasae mbore ne chinguru kobua echia Mwanyabaanto.
ⅩⅩⅥ Naki baminto, rengereria nabaanto b’engencho ki more aba Nyasae arangeirie; tari abange ase more bare nobong’aini bwa Mwanyabaanto, tari abange bare ne chinguru, tari abange baiboretwe nobonene.
ⅩⅩⅦ Korende Nyasae agachora ayare amariri ase ense, erinde asookie abare nobong’aini; naende Nyasae agachora ayare amareu ase ense, erinde abasookie abare ne chinguru.
ⅩⅩⅧ Nyasae agachora ayare amasinini ase ense na ayachayire, nonya n’ebinto bire bosa, erinde akeyie biria bire nengencho, bibe bosa.
ⅩⅩⅨ Erio ase obosio bwa Nyasae onde tari ase Mwanyabaanto oretogie.
ⅩⅩⅩ Korende nogokora kwa Nyasae, ng’a inwe imore ime ase Kristo Yeso, oyo Nyasae akorete koba obong’aini bwaito na oboronge bwaito, naende ogochenwa gwaito na okoboorigwa gwaito.
ⅩⅩⅪ Ase igo buna eriikire, “Ere oyogwetogia, tiga etogie ase keria Omonene akorire.”