Abakoreri ba Nyasae
Ⅰ Na inche, baminto, tinare konyara gokwana nainwe buna nabaanto bare n’Omoika, korende buna abanto b’engencho ya kare, buna abana ebing’werere ase Kristo. Ⅱ +Nabasiibirie amabeere, timbaragereti endagera; ekiagera konya timoraisana; ee, nonya mbono timoraisana, Ⅲ ekiagera nonya mbono nigo more abanto b’engencho y’ebibe. Naki onye more ne ribero na eriomana ase egati yaino, Inee, timori abanto b’engencho y’ebibe, naende nigo mogendererete buna banto bande bonsi? Ⅳ +Ekiagera ekero omonto oyomo akobora, “Inche noyo o Paulo,” na oyonde, “Inche noyo bw’Apolo.” Inee, inwe timori Mwanyabaanto?
Ⅴ Gaki Apolo inki aisaine? Na Paulo inki aisaine? Intwe nabakori emeremo, ababorokereirie komwegena Omonene, kera oyomo buna Omonene amoeire. Ⅵ +Inche ngasimeka, Apolo akabeeka amaache, korende Nyasae nere ogokinia. Ⅶ Onye nabo, oyogosimeka tai gento, nonya noyokobeeka amaache, korende Nyasae bweka oyogokinia. Ⅷ Naboigo oyogosimeka, na oyokobeeka amaache nigo bareng’anetie; na kera omonto nanyore eng’eria yaye koreng’ana buna emeremo yaye ere. Ⅸ Naki intwe nabakori emeremo amo na Nyasae; inwe nomogondo o Nyasae, na oboagacho bwa Nyasae.
Ⅹ Koreng’ana nobuya bwa Nyasae naetwe inche, buna omonene bw’abaagachi, oyore ne chisemi, nabekire oboroso, na omonto onde nkoagacha are igoro yaye. Korende kera omonto tiga arigererie buna akoagacha igoro yaye. Ⅺ Naki boroso bonde tibori omonto aranyare kobeeka, otatiga boria bwaikire kobekwa, nabwo Yeso Kristo. Ⅻ Korende omonto karaagache igoro ase oboroso obwo netaabu, gose efeta, gose amagena e rigori rinene, gose emete, gose obonyansi, gose chinsiaga, ⅩⅢ emeremo ya kera omonto ing’a eorokigwe maiso marore. Naki Rituko erio inariyeorokie, ekiagera narioroke nomorero; na omorero oyio noteeme emeremo ya kera omonto ng’a naki ere. ⅩⅣ Emeremo y’omonto aagachete igoro ase oboroso kerabue, omonto oyio nanyore eng’eria. ⅩⅤ Emeremo y’omonto kerayie, takonyora eng’eria, korende ere omonyene natoorigwe, korende buna oyo ogotaborigwa korwa ase omorero.
ⅩⅥ +Timomanyeti ng’a inwe ne Hekalu ya Nyasae, na Omoika o Nyasae nigo amenyete ime yaino? ⅩⅦ Onye omonto ogosaria Hekalu ya Nyasae, Nyasae nasarie omonto oyio; naki Hekalu ya Nyasae nenchenu, nero ninwe.
ⅩⅧ Omonto tabaisa kweng’aina ere omonyene. Onye omonto ase egati yaino bwerorire ng’a nomonyasemi are ase ense eye, tiga ekore omoriri, erinde anyare koba omonyasemi. ⅩⅨ +Naki obong’aini bw’ense eye noboriri ase Nyasae, ekiagera neriikire, “Nyasae nigo akobwata abare nobong’aini ase obong’ainereria bwabo”, ⅩⅩ +naende, “Omonene nigo amanyete okorengereria kw’abare nobong’aini ng’a nokwa bosa.” ⅩⅪ Ase ayio omonto tetogia ase Mwanyabaanto. Naki bionsi nebiaino; ⅩⅫ onye Paulo, gose Apolo, gose Kefa, gose ense, gose obogima, gose amakweri, gose biria bire bono, gose ebio birache koba; bionsi nebiaino; ⅩⅩⅢ na inwe naba Kristo, na Kristo noyo o Nyasae.
+ Ⅲ:Ⅱ Abaibr 5:12,13 + Ⅲ:Ⅳ 1 Abakr 1:12 + Ⅲ:Ⅵ Ogok 18:4-11; Ogok 18:24-28 + Ⅲ:ⅩⅥ 1 Abakr 6:19; 2 Abakr 6:16 + Ⅲ:ⅩⅨ Ayubu 5:13 + Ⅲ:ⅩⅩ Zab 94:11