Ⅵ
Ⅰ Na intwe gatogokora emeremo amo nere, twabasoroire timonyora obuya bwa Nyasae bosa.
Ⅱ Naki igo agoteeba,
“Ase engaki yancheire nakoiraneretie ogosaba kwao,
rituko ri’ogotooreka nagokonyete.”
Rora, bono nario engaki y’ogwancherwa; rora, bono nario rituko ri’ogotooreka.
Ⅲ Titobeka ekegocha ase onde bwensi, erinde obosomba bwaito bobaise gokwanwa bobe,
Ⅳ korende ase kera ring’ana twenyorere ogotogigwa okuya buna abasomba ba Nyasae, ase okoganya okonge, ase emechando, ase obokong’u, ase ogochandwa,
Ⅴ ase ogoakwa, ase ogosibwa, ase ogokorerwa rirorooche, ase emeremo, ase okorenda, ase enchara,
Ⅵ ase obochenu, ase okomanya, ase oboremereria, ase obwororo, ase Omoika Omochenu, ase obwanchani botari nobong’ainereria,
Ⅶ ase amang’ana y’ekeene, ase chinguru chia Nyasae. Nigo tore nebirwanero bi’oboronge ase okoboko gw’okorio na ase okoboko gw’okobee.
Ⅷ Twanyorire ogosikwa na ogotasikwa; togokwanwa bobe na togokwanwa buya. Twakorirwe buna abanto abang’ainereria, korende nabaanto b’ekeene tore,
Ⅸ buna abatamanyekaneti, korende nigo tomanyekanete buya; buna abagokwa, na rora moyo tore. Twasusuirwe, korende titoitiri;
Ⅹ twaichanigwe, korende amatuko onsi nigo tore nomogooko; tore abataka, korende twabatenenkirie abange, titori na gento, nonya nabo ntore n’ebinto bionsi.
Okorigia obwanchani bw’abaonchogete
Ⅺ Twakwanire maiso marore nainwe, Abakorinto; twaigoire chinkoro chiaito ase more.
Ⅻ Titosiegeti chinkoro chiaito ase more, korende inwe nigo mosiegete echiaino ase tore.
ⅩⅢ Bono nigo ngokwana nainwe buna nabana baane more. Buna twabakoreire, nainwe motokorere bo, mogareyie chinkoro chiaino.
Ogokuurerwa kw’ogotasanga nabategeneti
ⅩⅣ Timosiberanigwa rikorogoto amo nabategeneti. Naki nkobwatana ki kore ase egati y’oboronge na ogosaria? Gose ngosanga ki kore ase egati y’omobaso na omosunte?
ⅩⅤ Naende nkobwatana ki kore ase egati ya Kristo na Beliali? Gose oyobwegenete, insemo ki abwate amo noyotegeneti?
ⅩⅥ Naende ngosanga ki kore ase egati ye Hekalu ya Nyasae na emegwekano y’ogosasiimwa? Naki intwe ne Hekalu ya Nyasae ore moyo, buna Nyasae ateebete,
“Nimenye ime yabo, na ase egati yabo nintaare,
na inche nimbe Nyasae obo,
na barabwo nababe abanto baane.
ⅩⅦ Ase ayio, buna Omonene agoteeba:
Soka korwa ase bare, mweatanane,
gose timokuna egento getachenegeti,
na inche nimbaroisie.
ⅩⅧ Nimbe Iso oino,
na inwe mobe abana baane, abamura na abaiseke.
Nab’Omonene Omobui oteebire.”