RIRUUBE RIA PAULO OMOTOMWA ASE
ABAKOLOSAI
Ogochaakera
Riruube ria Paulo gochia ase abakolosai, nigo riarigetwe gochia ase ekanisa ya Kolosai omochie orenge ime yorogongo rwa Esia enke moocha ya Efeso. Ekanisa eye ya Kolosai tiyachagetwe na Paulo korende nigo yarenge ase orogongo orio omotomwa Paulo arenge gokora emeremo yoborandia, ekero atomete abakori emeremo korwa Efeso omochie omonene bw’orogongo rwa Rumi ya Asia. Paulo konya omanyire ng’a aboorokia b’oborimo basoire ase ekanisa aria Korosai abwo bare koamereria ng’a ase okomomanya Nyasae naboigo konyora ogotoreka gwonsi omonto goika asasime abarai nababui gete b’omoika, komenta nayio, aborokia bwo nigo batebete buna goika omonto erwe ase chinyangi gete, buna okwaroka, nainde boigo goika abwatie amachiiko ase chindagera naboigo n’amang’ana ande.
Paulo nigo akorika ase okwamereria amaorokererio ayio goetera ase amegerio y’ekeene y’egekristo. Gati yamairanerio ayio naria ng’a Yeso Kristo nare nechinguru chi’okorwa ogotoreka gwonsi naende ng’a amang’ana ayio ande y’okwegena nogokora nigo akorusia omonto korwa ase are ere Kristo. Goetera ase Kristo Nyasae nigo atongete ense, naende goetera ase are ere nkoyeirania are gochia ase are ere omonyene. Ase okobwatana na Kristo noo ogosemeria kore kwogotoreka ase ense. Paulo boigo nigo agochunchuga nakoenekia obobe aria amorokererio ayio amanene akorete ase obogima bw’abegeni.
Tiga emanyekane buna Tychycus ayio obogoretie riruube eri ase ribaga ria Paulo nigo barenge na Onesimo omosomba oyio goetera ase are Paulo ariigete riruube riaye gochia ase Filemoni.
Okobagwa kw’egetabu eke
Ogochaakera 1:1-8
Buna Kristo omonyene are, na emeremo yaye 1:9—2:19
Obogima oboyia bw’okoba ime ya Kristo 2:20—4:6
Ogokoorera 4:7-18
Ⅰ
Ⅰ Korwa ase Paulo oyio goetera ase obuya bwa Nyasae ore omotomwa o Kristo Yeso, na korwa ase oyominto Timotheo —
Ⅱ gochia ase abanto ba Nyasae abwo bamenyete Kolosai abwo bare abaminto abageni ase Kristo.
Obuya bobe ase more na omorembe bikorwa ase Nyasae Tata oito.
Ogosaba kw’ogwaka mbuya mono
Ⅲ Botambe nigo togoakera Nyasae, Ise Omonene oito Yeso Kristo, ng’a mbuya mono, ekero tokobasabera inwe,
Ⅳ ekiagera twaigure buna momwegenete Kristo Yeso, naende buna mwanchete abachenu bonsi,
Ⅴ Ekero ring’ana ri’ekeene, amang’ana amaya achete ase more ritang’ani, nigo mwaigwete igoro y’ogosemeria kwarenge oo. Ase igo okwegena n’obwanchani bwaino nigo bire ase keria mosemeretie, ekio kegachire buya ase engencho yaino aria igoro.
Ⅵ Echili nigo ekorenta ogosesenigwa na nigo agendererete koranda ense yonsi, buna koreng’ana yabeire ase more korwa rituko riria inwe mwaigwete igoro yobuya bwa Nyasae na mokabwenekia buna bore.
Ⅶ Nigo mwaorokereretigwe igoro yobuya bwa Nyasae na Epafara, omosomba omogisangio oito omwanchwa, oyore omosomba omwegenwa ase Kristo ase engencho yaino.
Ⅷ Ere nigo atworogetie obwanchani bwaino ase Omoika.
Ⅸ Ase ayio, korwa rituko riria twaigwete amang’ana ayio, titwatigete kobasabera inwe. Igo twasabete ng’a moichorwe ne chisemi chi’ogwancha kwaye ase obong’aini bwonsi na okomanya gwonsi kw’omoika.
Ⅹ Mogenderere buna ebagwenerete ase Omonene, momogwenere kegima. Amagima aino ame okwama okuya, momenteke ase okomomanya Nyasae.
Ⅺ Na inwe mobekwe chinguru ase okobua gwonsi, koreng’ana ne chinguru chi’obonene bwaye ase okoganya na oboremereria bwonsi amo nomogooko,
Ⅻ mokomoakera Tata ng’a mbuya mono, oyobaikeranetie mobe ababwatani b’omwando bw’abachenu ase omobaso.
ⅩⅢ Nere otosiborete korwa ase okobua kw’omosunte na agatong’anyia na gotosoyia ase oborwoti bw’Omwana oye omwanchwa.
ⅩⅣ Goetera ase are twasiboirwe, engencho yaye ebibe biaito biabeirwe.
Omonto n’emeremo ya Kristo
ⅩⅤ Kristo nomogwekano o Nyasae oyotari kororekana, omoiborwa bw’eritang’ani bw’ebitongwa bionsi.
ⅩⅥ Ime yaye ebinto bionsi bigatongwa, ebire igoro na ebire ase ense, ebikororekana na ebitakororekana, onye nebirogo bi’obogambi, gose amarwoti, gose abagaambi, gose abare nokobua; Nyasae agatonga ense yonsi goetera asare na ase engencho yaye.
ⅩⅦ Kristo nao arenge ritang’ani ri’ebinto bionsi, na ebinto bionsi biabwatanigwe ime asare.
ⅩⅧ Ere nomotwe bw’omobere, engencho yaye ekanisa; naende ere nomochakano na omoiborwa bw’eritang’ani korwa ase abakuure, erinde ere bweka abe omotang’ani ase bonsi.
ⅩⅨ Naki Nyasae agancha ng’a oboikeranu bwaye bwonsi bomenye ime asare.
ⅩⅩ Goetera asare Nyasae agancha kobwatania ebinto bionsi amo nere omonyene, ebinto ebire ase ense na ebire igoro, gakorire omorembe ase amanyinga ayaitegete ase omosalaba oye.
ⅩⅪ Na inwe agwo ritang’ani nigo mwarenge mwatananire korwa ase Nyasae, mwarenge nobobisa ase ebirengererio biaino ase ogokora kwaino okobe.
ⅩⅫ Korende bono Nyasae obabwatanirie inwe amo nere omonyene ase ogokwa kw’omwana oye ase omobere oye bw’echinyama, Nyasae obakorire abasani baye erio abarente ase obosio bwaye, more abachenu, motari na komocha gose na bobe bonde,
ⅩⅩⅢ goika mogenderere ase okwegena, mwabekirwe ase oboroso obokong’u, nainde timwancha inwe konyegerigwa korwa ase ogosemeria koria mwanyorete ekero mwaigwete enchiri eye. Ngoetera ase enchiri eye inche Paulo nkabekwa nkaba omosomba oye-Echili eye eyio yarandigwe ase ebitongwa bionsi ase ense.
Emeremo ya Paulo buna omosomba ase ekanisa
ⅩⅩⅣ Bono nagokeire ogochandwa kwane inde nakorokwo ase engencho yaino; naende ase omobere one nkoyaikerania nde aria aremete ase ogochandwa gwa Kristo ase engencho y’omobere oye, engencho yaye ekanisa.
ⅩⅩⅤ Inche nabeire omosomba bw’ekanisa yaye ase oborendi obo naetwe na Nyasae ase engencho yaino ase okobaranderia inwe ring’ana rionsi ria Nyasae.
ⅩⅩⅥ Obobisi boria bwabisetwe korwa kare ase ebigori ebinge, korende bono bwaorokigwe ase abachenu baye.
ⅩⅩⅦ Nyasae agancha koorokia ase bare obobisi boria bore obonene na obw’obonda ase egati y’abanto b’ebisaku. Obobisi boria nabwo obo, ng’a Kristo nigo are ime yaino, ayio naro ogosemeria kw’obonene.
ⅩⅩⅧ Ase engencho eyio nigo tokorandia Kristo ase abanto bonsi; nigo tokobakurera na kobaorokereria bonsi ase obong’aini bwonsi, erio tonyare korenta kera oyomo ase obosio bwa Nyasae abe oikeranire ase okobwatana na Kristo.
ⅩⅩⅨ Ase engencho eyio inche nigo ngokora emeremo na ngokora omokia ase chinguru chiaye chinene, echigokora emeremo ime ase ’nde.