AMARORO AMANENE
Ⅹ
CHINGAKI CHI’EMECHANDO
Amaroro y’omonto obegete chianga chire monyinga
Ⅰ Ase omwaka o gatato bw’okogaamba gwa Koresi, omorwoti bw’Abaayemi, Danieli oria orogetwe Beli‐Tesasari akamaanorerwa komanya ring’ana, ne ring’ana erio nigo riarenge eri’ekeene, rikararia ng’a emechando emenene neche. Danieli akamanya engencho ye ring’ana riria, na okorora koria.
Ⅱ Ase engaki eria inche Danieli nigo narenge nkona‐kweumia ase engaki ye chichuma isato.
Ⅲ Tinarenge koria endagera engiya, gose koria enyama, gose konywa edivai. Tinarenge kweaka amaguta nonya ng’ake ase chichuma chiria isato.
Ⅳ Ase rituko ri’emerongo ebere na kane ri’omotienyi bw’eritang’ani, ekero nateneine ase engegu y’orooche roria oronene rwa Tigirisi,
Ⅴ nkarigereria, nkarora omonto obegete eanga y’egatani,
bweboeretie kenama kiaye n’orokini roroisirie korwa ase etaabu engiya ekorwa Ufasi.
Ⅵ Omobere oye nigo orenge komeka‐meka buna berulo,
rigena rie rigori rinene;
obosio bwaye nigo bwarenge kororekana buna okomesa kw’embura,
na amaiso aye nigo arenge gwoka buna ebieri bi’omorero.
Amaboko na amagoro aye nigo arenge komeka‐meka buna etai yasenigwe.
Eriogi ri’amang’ana aye nigo riarenge kwoga buna eri’emoganda y’ abanto abange.
Ⅶ Ninche bweka Danieli narooche okorora koria abanto baria barenge amo nainche tibakorooche, korende obwoba obonene bokabasoa, erio bagatama bakebisa.
Ⅷ Ngatigara inche bweka ndigereretie okorora koria, ne chinguru chikang’erera, ekieni kiane gekaonchoka gekarachoka, ne chinguru chionsi chikarua asende.
Ⅸ Erio nkaigwa eriogi ri’amang’ana aye; ekero nariigwete, nkaba ne chitoro chinene, nkagwa inse ’nkaumama.
Ⅹ Nkarora okoboko kogonkuna, gokanyimokia, ngatung’ama n’amaru, ngasigamera inse nebisanyi bi’amaboko nkoiguswa.
Ⅺ Omonto oria aganteebia, “Aye Danieli, omonto bwanchire mono, tegerera oigwe amang’ana aya ngokwana naye, imoka otenene boronge, ekiagera bono natomirwe as’ore.” Ekero agendererete gokwana ring’ana erio nainche, ngatenena boronge nkoiguswa.
Ⅻ Erio aganteebia, “Aye Danieli, tibwoboa, ekiagera korwa rituko rie ritang’ani kwaruete enkoro yao ase okomanya, naende ogekeyia ase obosio bwa Nyasae oo, amang’ana ao nigo aigwetwe, na bono inche nachire ase engencho y’amang’ana aria ao.
ⅩⅢ Omogambi bw’oborwoti bw’Abaayemi akaamererania nainche ase engaki y’amatuko emerongo ebere, na rimo, korende Mikaeli, oyomo bw’abagaambi baria abanene, agacha gonkonya, ekiagera konya nabeire nteneine inche bweka koamererania nabarwoti b’Abaayemi.
ⅩⅣ Bono inche nachire gokworokia aya agochia konyora abanto bao ase amatuko agochia‐gocha, ekiagera okorora okwo nigo gokworokia amang’ana y’amatuko akare bosio.”
ⅩⅤ Ekero akoorete gokwana nainche amang’ana aya, ngetureka gochia inse, nkaba rimansu.
ⅩⅥ Erio oria ogwekaine Mwanyabaanto agakuna ebikoba biane, na inche nkamaanora omonwa one ngakwana. Ngateebia oria oteneine ase obosio bwane, “Aye Omonene Nyasae one, okorora oko kwandeteire omoichano, ne chinguru chiarure asende.
ⅩⅦ Inaki inche omosomba oo ndanyare gokwana naye, Omonene one? Chinguru chionsi chiarure asende, na tindi n’Omoika ime y’ane.”
ⅩⅧ Naende oria ogwekaine Mwanyabaanto agankuna, na akambeka chinguru,
ⅩⅨ aganteebia, “Aye omonto bwanchire mono, tibwoboa, omorembe obe amo naye! Tenena bokong’u, naende obe omoremu!”
Ekero arenge gokwana nainche, nkanyora chinguru, nkamotebia, “Aye Omonene one, kwana, ekiagera kwambekeire chinguru!”
ⅩⅩ Erio akamboria, Inee, kwamanyire ekiagera nacha aa as’ore? Bono nkoirana inde ngende korwania omogambi bw’Abaayemi, na ekero ndabe namobuire, erio agwo omogambi bw’Abagiriki nachiche.
ⅩⅪ Nonya nabo ninkworokie aya ariikire ase Egetabu gi’Ekeene. Onde tari oranyare gonkonya otatiga Mikaeli, omogambi oino.