OGOSASIIMWA KW’OMOGWEKANO BW’ETAABU
Ⅲ
Nebukadinesaro ogotenenia omogwekano oroisetigwe korwa ase etaabu
Ⅰ Nebukadinesaro omorwoti akaroisia omogwekano korwa ase etaabu; obotambe bw’omogwekano oria nigo bwarenge obw’amaboko emerongo etano nomo, na obogare bwaye obw’amaboko atano na rimo; akayotenenia ase ense omweya ya Dura, agwo ase orogongo rwa Babiloni.
Ⅱ Erio omorwoti Nebukadinesaro agatoma abanto basangererie amo abagaambi abanene b’oborwoti bwaye, na abagaambi be chingongo chiaye, na abagabana, na abasemia, na abagachi be chikungo, na abagaambi ebiina, na abamanyi b’amachiiko, na abanene bande bonsi b’oborwoti bwaye. Abwo bonsi nigo barangereretigwe ase ogwatanana na gosesenia omogwekano oria Nebukadinesaro omorwoti konya atenenirie.
Ⅲ Erio abagaambi baria abanene, na abagaambi be chingongo, na abagabana, na abasemia, na abagachi be chikungo, na abagaambi ebiina, na abamanyi b’amachiiko, na abanene bande bonsi b’ense eria, bagaacha gwatanana na gosesenia omogwekano oria omorwoti Nebukadinesaro konya atenenirie. Ekero bateneine bosio bw’omogwekano oria,
Ⅳ Omoraria agaaka eriogi rinene, akabora, “Inwe abanto b’ebisaku bionsi, na ab’emenwa yonsi, mwachiikirwe
Ⅴ ng’a ekero moraigwe eriogi ri’ebitureri, na ebiroria, na amakano ao ao, na amarandi, na amariogi a kera egento ki’amatera, goika motung’ame inse, mosasiime omogwekano bw’etaabu, oria Nebukadinesaro omorwoti atenenirie.
Ⅵ Omonto onde bwensi otatung’ameti na koumama ase okoyosasiima, erio agwo kegima oyio narutwe ase eriko ri’omorero ekebemberi.”
Ⅶ Ase ayio ekero abanto b’ebisaku bionsi na ab’emenwa yonsi baigwete eriogi ri’ebitureri, na ebiroria, na amakano ao ao, na amariogi a kera egento ki’amatera, bonsi bakaba bagatung’ama na gosasiima omogwekano bw’etaabu, oria omorwoti konya atenenetie.
Abasani baria batato ba Danieli bagosoerwa ase ogotaigwera
Ⅷ Bono abanto bande b’Abakalidayo bakagenda bagasoera Abayahudi.
Ⅸ Bagakwana, bagateebia Nebukadinesaro omorwoti, “Aye omorwoti, ochie kare!
Ⅹ Aye omorwoti nigo kwarua ogochika ng’a kera omonto okoigwa eriogi ri’ebitureri, na ebiroria, na amakano ao ao, na amarandi, na amariogi a kera egento ki’amatera, goika atung’ame inse na gosasiima omogwekano oria bw’etaabu,
Ⅺ naende ng’a omonto onde bwensi otatung’ameti inse na koumama ase okoyosasiima, oyio goika arutwe ase eriko ri’omorero ekebemberi.
Ⅻ Bono mbare aa abanto bande b’Abayahudi abwo gwachorete gotenenera amang’ana ’orogongo oro rwa Babiloni: Sadaraka, na Meshaka, na Abedi‐Nego. Aye omorwoti, abanto aba bachaayire amachiiko ao; barabwo tibari gokorera chinyasae chiao gose gotung’ama na koumama ase ogosasiima omogwekano oria bw’etaabu aye gwatenenetie.”
ⅩⅢ Erio omorwoti Nebukadinesaro akaba nekeririanda egetindi, agachiika ng’a Sadaraka, na Meshaka, na Abedi‐Nego, barentwe ase are, na abamura baria batato bakarentwa ase obosio bwaye.
ⅩⅣ Nebukadinesaro akababoria, “Inwe Sadaraka, na Meshaka, na Abedi‐Nego, Inee, nekeene ng’a inwe timori gokorera chinyasae chiane, gose timori gosasiima omogwekano oria bw’etaabu ntenenetie?
ⅩⅤ Bono mobe ang’e, ekero moraigwe eriogi ri’ebitureri, na ebiroria, na amakano ao ao, na amarandi, na amariogi a kera egento ki’amatera motung’ame inse moumame ase ogosasiima omogwekano oria naroisirie, ayio naro arabe buya ase more; korende onye timokoyosasiima, rirorio agwo kegima goika morutwe ase eriko ri’omorero ekebemberi. Inee! Nenyasae ereri eranyare kobatooria korwa ase amaboko a’ne?”
ⅩⅥ Erio Sadaraka, na Meshaka, na Abedi‐Nego, bakairaneria omorwoti oria, bakamoteebia, “Aye Nebukadinesaro, titoganeti gokoiraneria igoro y’amang’ana aya.
ⅩⅦ Aye omorwoti, Nyasae oito, oria togokorera, nanyare gototooria korwa ase eriko ri’omorero ekebemberi, na korwa ase amaboko ao.
ⅩⅧ Korende nonya tagochia gototooria korwa as’ore aye omorwoti, goika omanye ng’a intwe titogwancha gokorera chinyasae chiao, gose gosasiima omogwekano bw’etaabu, oyio gwatenenetie.”
Abasani baria batato ba Danieli bakonacherwa ekiina ki’ogokwa
ⅩⅨ Erio Nebukadinesaro agaichorwa nekeririanda, na obosio bwaye bokaonchoka igoro ya Sadaraka, na Meshaka, na Abedi‐Nego. Agachiika ng’a omorero bw’eriko riria omentwe obe omonene ara gatano na kabere kobua oyo o botambe.
ⅩⅩ Agachiika abarwani esegi barenge ne chinguru basibe Sadaraka, na Meshaka, na Abedi‐Nego, baabarute ime ase eriko riria ri’omorero ekebemberi.
ⅩⅪ Ase ayio abamura baria batato bagasibwa bare ne chisirwari chiabo, ne chiganchwa chiabo, na emiambaro yabo, ne chianga chinde, bakarutwa ase eriko riria ri’omorero ekebemberi.
ⅩⅫ Bono ekiagera ogochika kw’omorwoti kwarenge ogotindi, na ase ayio omorero bw’eriko riria konya omentirwe obeire omonene mono, chimeme chi’omorero oria chigasamba na goita abanto baria barutete Sadaraka, na Meshaka, na Abedi‐Nego, ase omorero oria.
ⅩⅩⅢ Abanto baria batato: Sadaraka, na Meshaka, na Abedi‐Nego, bakagwa ase eriko riria ri’omorero ekebemberi basibire.
Ogoteera gw’Asaria ime y’omorero ekebemberi
ⅩⅩⅣ Abasae baria batato Hanania, Mishaeli na Asaria bagachaka gotara tara ime y’omorero, bagoteera na komotogia Omonene Nyasae.
ⅩⅩⅤ Erio Asaria agatenena gati gati y’omorero agasaba n’eriogi ogoteeba:
ⅩⅩⅥ Aye Omonene, Nyasae bw’echisokoro chiaito,
erieta riao ritogigwe kare na kare.
ⅩⅩⅦ Gwatokoreire buna etogwenerete,
Kera ekemo gwatokoreire aye kwabeire kogokorera ekeene,
na ekero ogotoreta ase ekiina aye nigo ogokorera ekeene.
ⅩⅩⅧ Nigo gwakorete eri riarenge rironge ekeene kwaretete emechando
ase Yerusalemu, omochie omochenu bw’echisokoro chiaito.
Egesusuro ekio nigo giatobwenerete ase engencho y’ebibe biaito.
ⅩⅩⅨ Intwe nigo twagotigete aye, togakora ebibe, ee twasaririe amachiiko ao.
Ase amang’ana onsi intwe twakomocheire mono kobua
ase ogotarenda amachiiko ao.
ⅩⅩⅩ Titwakorete ebinto gwatochigete tokore,
Onye ndiria toigwera amachiiko ao, anga ntwasesenetigwe.
ⅩⅩⅪ Korende bono intwe ntogwenerete egesusuro ekio gwatoreteire,
Gwatobekire ase amaboko y’ababisa baito,
abanto abwo batari korora buna richiiko neriengencho,
abanto abwo batatageti koigwa kende gionsi igoro ya Nyasae;
gwatobekire ase okoboko kw’omorwoti omobe,
omobe ase abarwoti bonsi b’ense engima.
ⅩⅩⅫ Na bono intwe baria tokogosasiima aye twachayirwe,
twasokire nonya nokoigora emenwa yaito rero.
ⅩⅩⅩⅢ Obosooku n’gochaywa biabeire egetari giaito
intwe baria tokogokorera na kogosasiima.
ⅩⅩⅩⅣ Ase engencho y’erieta riao, aye tototuguta,
tosaria okobwatana koria gwakorete naitwe.
Tobaisa koonchora okobwatana kwao,
torusia ogwanchereria kwao ase tore,
ⅩⅩⅩⅤ ase engencho ya Aburaamu omwanchwa oo, tororere amaabera,
ase engencho ya Isaka omosomba oo,
boigo na Yakobo ise bw’Egesaku kiao egechenu kia Israeli.
ⅩⅩⅩⅥ Inyora nigo kwabarierete eira buna egesaku kiabo kebe ekenge buna
ching’enang’eni chia igoro gose buna omokenye o nyancha.
ⅩⅩⅩⅦ Korende bono aye Omonene, intwe nigo tore abake goetania ebisaku binde bionsi;
ase engencho y’ebibe biaito intwe twachayirwe ense yonsi goika rero iga.
ⅩⅩⅩⅧ Twatigirwe totari n’omorwoti gose mobani onde, gose morai onde.
Hekalu teiyo ase intwe toragende gokoruera ebingwanso, gose ubani, gose biegwa binde,
ase taiyo toraruere ebingwanso bi’ogosamba gocha ase ore erio tonyore amabera ao.
ⅩⅩⅩⅨ Korende twachire ase ore n’echinkoro chiogweitia n’emioyo emekanyeku,
tokogosorora otwanchere toche ase ore buna baria bacha n’ebingwanso
bi’ogosambwa bi’chimanwa n’echieri boigo n’echilibu chi’eching’ondi,
ⅩⅬ Ancha okwangama gwaito buna ekengwanso gocha ase ore rero,
erio otoe ogwancherwa intwe tokoigwere n’echinkoro chiaito chionsi,
ekiagera onde bwensi ogosemeretie tagosookigwa.
ⅩⅬⅠ Bono intwe twarire eira kogotunyana n’echinkoro chiaito chionsi,
erio toche asore ase okoiroka na korigia obosio bwao naende.
ⅩⅬⅡ Tibwancha intwe tobekwe ase obosoku
korende aye otokorere buya ase oboitongo,
kobwatekana n’obonene bw’amabera ao
ⅩⅬⅢ Totorie kobwatekana n’makumia y’ebikone biao;
erio naende oiranerie erieta riao esiko, aye Omonene.
ⅩⅬⅣ Tiga obotantanu bobaachere bonsi baria bagochaanda abasoomba bao;
inaki yarenge ng’a baria bagotochecheria basookigwe.
Rusia obobui bwabo na gosenyenta chinguru chiabo.
ⅩⅬⅤ Tiga bamanye buna aye bweka naye Omonene na Nyasae oyio okogamba n’obobui ense yonsi.
ⅩⅬⅥ Abasomba b’omorwoti abwo barutete abasae baria batato ase omorero ekebemberia bakagenderera komenta omorero oria obe omonge bono ase okomenta amabuta, erami, n’echinko.
ⅩⅬⅦ Chinsase chi’omorero oria chikaimoka gochia igoro ang’e obware bw’echimita emerongo ebere (20).
ⅩⅬⅧ Omorero oria okabucha mono goika ogasiria Abakalidayo abwo bateneine ange noro.
ⅩⅬⅨ Korende omomalaika Omonene agacha ase omorero oria ase Asaria barenge, erio agasukia omorero oria gochia chinsemo
Ⅼ erio ekarorekana buna n’embeo enkendu yagusa, ase igo omorero oria tokuna abasae baria nonya ng’ake.
Ogoteera kw’Abasae batato
ⅬⅠ Erio abwo bonsi batato bagachaaka goteera bakomotogia Nyasae bagoteeba:
ⅬⅡ “Osesenigwe aye Omonene Nyasae, Nyasae bw’echisokoro chiaito,
otogigwe na koimokererigwa igoro kare na kare,
Tiga erieta riao riichenu na ri’ogokumia ritogigwe kare na kare.
ⅬⅢ Aye n’ogwenerete gosesenigwa ime ase Hekalu ase obonene n’obotagatibu,
kobua bionsi ebireo, tiga oimokererigwe igoro ase obobui bwao kare na kare:
ⅬⅣ osesenigwe ase ekerogo kiao kioborwoti,
oimokererigwe igoro ya bionsi ebireo oegwe obonene kare na kare
ⅬⅤ Osesenigwe aye okomogaania oboiko bwonsi, aye oinkaransete igoro
ase ekerogo kiao kiobonene igoro ase ebitongwa ebio bire n’echimbaba
na korigereria gocha inse ase ense y’amakweri,
ⅬⅥ otogigwe na koimokererigwa igoro kare na kare,
osesenigwe ase oboiko bwonsi bwa igoro
obakwe na koegwa obonene kare na kare.
ⅬⅦ Mosesenie Nyasae Omonene inwe ebitongwa bi’Omonene:
motogie na komoa obonene bwao kare na kare.
ⅬⅧ Sesenia Nyasae Omonene inwe abamalaika b’Omonene Nyasae
ⅬⅨ Motogie na moe obonene kare na kare!
Sesenia Nyasae Omonene inwe abare igoro,
Motogie na moe obonene kare na kare!
ⅬⅩ Sesenia Nyasae Omonene inwe amaache onsi are igoro goetania igoro
Motogie na moe obonene kare na kare!
ⅬⅪ Mosesenie Nyasae Omonene inwe chinguru chia Nyasae Omonene,
Motogie na moe obonene kare na kare!
ⅬⅫ Mosesenie omonene inwe omobaso n’omotienyi
Motogie na moe obonene kare na kare!
ⅬⅩⅢ Mosesenie Nyasae Omobui inwe ching’enang’eni chia igoro;
Motogie na moe obonene kare na kare!
ⅬⅩⅣ “Mosesenie Nyasae Omobui inwe embura n’erimi;
Motogie na moe obonene kare na kare!
ⅬⅩⅤ Mosesenie Nyasae Omobui inwe chimbeo chionsi;
Motogie na moe obonene kare na kare!
ⅬⅩⅥ Mosesenie Nyasae Omobui inwe omorero n’eriberera rigwoka,
Motogie na moe obonene kare na kare!
ⅬⅩⅦ Togia Omonene inwe obokendu n’eriberera,
ⅬⅩⅧ Motogie na moe obonene kare na kare!
Mosesenie Nyasae Omobui inwe rimi n’ekerambauti kiobokendu bw’ebarafu,
Motogie na moe obonene kare na kare!
ⅬⅩⅨ Mosesenie Nyasae Omobui inwe obokeng’entu n’obokendu
Motogie na moe obonene kare na kare!
ⅬⅩⅩ Mosesenie Nyasae Omobui inwe obokendu bw’amagena n’obokendu bokwaroroka
Motogie na moe obonene kare na kare!
ⅬⅩⅪ Mosesenie Nyasae Omobui inwe omobaso n’obotuko
Motogie na moe obonene kare na kare
ⅬⅩⅫ Mosesenie Nyasae Omobui inwe oborabu n’omosunte
Motogie na moe obonene kare na kare!
ⅬⅩⅩⅢ Mosesenie Nyasae Omobui inwe chinkoba n’amare;
Motogie na moe obonene kare na kare!
ⅬⅩⅩⅣ Tiga ense esesenie Omonene,
Motogie na moe obonene kare na kare!
ⅬⅩⅩⅤ Mosesenie Omonene inwe ebitunwa n’ebigoro
Motogie na moe obonene kare na kare!
ⅬⅩⅩⅥ Mosesenie Nyasae Omobui, kera omote okomera na gokiina
Motogie na moe obonene kare na kare!
ⅬⅩⅩⅦ Mosesenie Nyasae Omobui, inwe chinsoko chi’amaache,
Motogie na moe obonene kare na kare!
ⅬⅩⅩⅧ Mosesenie Nyasae Omobui, inwe chinyancha n’echindooche,
Motogie na moe obonene kare na kare!
ⅬⅩⅩⅨ Mosesenie Nyasae Omobui, inwe chinyanguumi na bionsi ebigotaara ime y’amaache
Motogie na moe obonene kare na kare!
ⅬⅩⅩⅩ Mosesenie Nyasae Omobui, kera egesaku g’echinyoni
Motogie na moe obonene kare na kare!
ⅬⅩⅩⅪ Mosesenie Nyasae Omobui, inwe n’eching’iti chitugire n’echiorosana;
Motogie na moe obonene kare na kare!
ⅬⅩⅩⅫ Mosesenie Nyasae Omobui, inwe egesaku gionsi kia mwanyabaanto ime y’ense
Motogie na moe obonene kare na kare!
ⅬⅩⅩⅩⅢ Mosesenie Nyasae Omobui, aye Israeli,
Motogie na moe obonene kare na kare!
ⅬⅩⅩⅩⅣ Mosesenie Nyasae Omobui, inwe abakuani b’Omonene;
Motogie na moe obonene kare na kare!
ⅬⅩⅩⅩⅤ Mosesenie Nyasae Omobui, inwe abasomba baye,
Motogie na moe obonene kare na kare!
ⅬⅩⅩⅩⅥ Emeika n’emioyo y’abanto abaronge,
Motogie na moe obonene kare na kare!
ⅬⅩⅩⅩⅦ Mosesenie Nyasae Omobui, inwe abegeenwana na abanto abaitongo ase chinkoro,
Motogie na moe obonene kare na kare!
ⅬⅩⅩⅩⅧ Hanania, Asaria na Mishaeri, sesenia Omonene,
Motogie na moe obonene kare na kare!
Inwe Hananiah, Asaria na Mishael, Mosesenie Nyasae Omobui,
Motogie na moe obonene kare na kare!
Egekogera ere ototooririe korwa inse y’ense,
Ototoririe korwa ase okoboko kw’amakweri,
Ere ototabuuririe intwe korwa ase ogsambwa korwa ase omorero ekebemberi,
ⅬⅩⅩⅩⅨ Otorusirie intwe korwa ase endiba y’echimeme chiomorero!
Aaka ng’a mbuya mono ase Nyasae Omobui,
Ekiagera obwanchani bwaye tibori koera.
ⅩⅭ Mosesenie Nyasae Omobui, Nyasae bw’e chinyasae, inwe mwensi baria momoirogete,
Motogie na komwakera ng’a mbuya mono,
Ekiagera obwanchani bwaye tibokoera goika kare na kare,
amatuko onsi n’amaabera aye nigo are aroro goika kare na kare.”
Omorwoti ogwancherana egekone keria
ⅩⅭⅠ Erio Nebukadinesaro omorwoti agakumia na goichana, agatenena ase obwango, akaboria abasemia baye, “Inee! Titwarutete abanto batato boka ase omorero basibire?” Bakamoiraneria, “Ee, aye omorwoti, ayio n’amaene.”
ⅩⅭⅡ Omorwoti akabairaneria, akabateebia, “Na bono nindoche abanto bane basiboire, bagotaara ime ase omorero, na barabwo tibayieti aande nonya ng’ake; omonto oria o kane nigo akororekana buna omwana bw’enyasae.”
ⅩⅭⅢ Ase ayio Nebukadinesaro akagenda ang’e nomonwa bw’eriko riria ri’omorero ekebemberi, agaaka eriogi, akarangeria, “Sadaraka, na Meshaka, na Abedi‐Nego, inwe abasomba ba Nyasae Ore Igoro Mono, soka korwa ime agwo, moche aiga!” Erio Sadaraka, na Meshaka, na Abedi‐Nego, bagasoka korwa ase omorero oria.
ⅩⅭⅣ Abagaambi abanene b’oborwoti, na abagaambi be chingongo, na abagabana, na abaseemia b’omorwoti bagasangererekana amo, bakarora ng’a omorero oria torenge nokobua konde gwonsi igoro ase emebere y’ abanto baria; chitukia chi’emetwe yabo tichiarurogete, ne chianga chiabo tichiayiete, gose tibatiogete rimisu ri’omorero.
ⅩⅭⅤ Erio Nebukadinesaro agaaka eriogi, agateeba, “Atogigwe Nyasae o Sadaraka, na o Meshaka, na bw’Abedi‐Nego, oyio otomire omomalaika oye gotooria abasomba baye abwo bamosemeretie na bangete koigwera ogochika kwane inche omorwoti, bakarua emebere yabo esire kobua gokorera na gosasiima enyasae ende yonsi, otatiga Nyasae obo bweka.
ⅩⅭⅥ Bono inche naruure ogochika ng’a omonto onde bwensi bw’egesaku kende gionsi, gose bw’omonwa onde bwensi, orakwane mamincha ya Nyasae o Sadaraka, na o Meshaka, na bw’Abedi‐Nego, oyio nabutoranwe ekiimo ase ekiimo, na enyomba yaye netagorwe ebe rituuri, ekiagera enyasae ende teri eranyare gotooria ase enchera buna eye.”
ⅩⅭⅦ Omorwoti akabeeka Sadaraka, na Meshaka, na Abedi‐Nego, bakaba abanene ase orogongo rwa Babiloni.
EKEROTO KI’OGOKUURERWA NA OKOBA EBARIMO KWA NEBUKADINAZARO
Okoraria kwa Nebukadinesaro
ⅩⅭⅧ Omorwoti Nebukadinesaro agatoma amang’ana gochia ase abanto b’ebisaku bionsi, na ab’emenwa yonsi, baria bamenyete ase ense yonsi, akabateebia: Omorembe omentekane ase more!
ⅩⅭⅨ Inche narorire ng’a mbuya ing’orokie ebimanyererio na amakumia Nyasae Ore Igoro Mono ankoreire.
Ⅽ “Inaki ebimanyererio biaye bire ebinene,
na amakumia aye are nokobua okonene!
Oborwoti bwaye nigo bore obwa kare na kare,
na obogambi bwaye nigo bogendererete ekiaare ase ekiaare.”