ⅩⅣ
Ogokanigwa gw’okwenaria gete ase ebirero
Ⅰ “Inwe n’abana ba Omonene Nyasae oino. Timwesaraga emebere yaino gose gwekigita chitukia chia bosio ase emetwe yaino ekero mokoreera abakuure,
Ⅱ ekiagera inwe n’abanto abachenu ase Omonene Nyasae oino. Ere obachoorire mobe abanto baye, mwaatananegete korwa ase abanto b’ebisaku binde bionsi bire ase ense.
Ching’iti chichenegete na echitachenegeti
(Abal 11:1-47)
Ⅲ “Timobaisa koria ng’iti ende yonsi y’okogeechia.
Ⅳ Echi nachio ching’iti moraabe mokoria: chiombe, ne’ching’ondi, ne’chimbori,
Ⅴ ne’chinsune, ne’chingabi, ne’ebisia, ne’chimbori chi’orosana, ne’chiburo, ne’chitobe, ne’ching’ondi chi’orosana.
Ⅵ Kera eng’iti ebwate ebitaago biatananegete gati ase chinsemo ibere, naende chikoria eng’ang’ura, echio nachio morarie.
Ⅶ Ase ching’iti echio chikoria eng’ang’ura gose chibwate ebitaago biatananegete, timoria echio: engamia, na egesusu, na egesengi. Echio nigo chikoria eng’ang’ura, korende tichibwati ebitaago biatananegete, ase ayio tichichenegeti.
Ⅷ Timoria embeche; nebwate ebitaago biatananegete, korende teri koria eng’ang’ura. Ase ayio n’ebe ase more ey’etachenegeti. Timoria chinyama chie ching’iti echio gose timokuna emebere yabo ekero chi akuure.
Ⅸ “Ase echio chionsi chire ase amaache ime ’monyaare koria chinswe chibwate chingondo chinga buna chimbaaba, na amagoocho.
Ⅹ Chinde chionsi chitabwati chingondo chinga buna chimbaaba, na amagoocho, timochiria; echio ’nchibe echitachenegeti ase more.
Ⅺ “Chinyoni chionsi chichenegete ’namochirie.
Ⅻ Timoria chinyoni echi: ekeongo, na ensoti, na obotere;
ⅩⅢ amakoru na ebisaku biamwabo;
ⅩⅣ ebigonkoru na ebisaku biamwabo bionsi;
ⅩⅤ esagero na omoyaaye, na enyakooboke, na enyautuutu, na ebisaku biamwabo;
ⅩⅥ enyakweumia enke na enene, na etibibi;
ⅩⅦ etekere, na ekeongo kende, na omoneke,
ⅩⅧ na amaagonga na ebisaku biamwabo, na enteema bobe, na egetabora mato.
ⅩⅨ “Ebisaku bionsi bi’ebitongwa ebisinini bikoiruruka ne’chimbaaba tibichenegeti ase more, timobiria.
ⅩⅩ Ebitongwa bichenegete naende bibwate chimbaaba nabo moranyaare kobiria.
ⅩⅪ “Eng’iti ekwete yoka enyene timoyeria. Monyaare koyea omomenyi omenyete amo nainwe ase omochie oino, ayerie, gose moyeoonerie omonto bw’egesaku ekeao, korende inwe n’abanto abachenu, mwatananire ase Omonene Nyasae oino.
“Timobaisa koiyekera emanwa y’embori ime y’amabeere y’eng’ina.
Ogochika gw’okorua ensemo ya ikomi
ⅩⅫ “Goika morue ensemo ya ikomi ye chindagera chi’emegondo yaino echio chikwama kera omwaka.
ⅩⅩⅢ Agwo ase obosio bw’Omonene Nyasae oino, aase arachore abe obomenyo bw’erieta riaye, nao morariere ensemo ya ikomi ye’chindagera chiaino, n’edivai, n’amaguta, ne’chintangi chi’echiombe, ne’ching’ondi, ne’chimbori; erinde monyaare kweorokereria komoiroka Omonene Nyasae oino, botambe.
ⅩⅩⅣ Onye aase agwo Omonene achoorire abe obomenyo bw’erieta riaye are aare mono, motanyaare kobogoria ensemo ya ikomi y’eri’Omonene Nyasae oino, abasesenirie n’ero,
ⅩⅩⅤ rirorio moonchorerie ebinto ebio ase chitaabu, erinde mochiire aase agwo Omonene oino achoorire.
ⅩⅩⅥ Chibesa echio mogore chiombe, gose ching’ondi, gose edivai, gose ebinyugwa ebiroro, kende gionsi moganetie. Mobiriere agwo ase obosio bw’Omonene Nyasae oino, erinde mogooke amo n’abanto b’echinka chiaino.
ⅩⅩⅦ “Timotiga gookonya Abalawi bamenyete ase emechie yaino, ekiagera barabwo tibabwati emegondo gose omwando amo nainwe.
ⅩⅩⅧ Ase omoerio o kera emiaka etato morente ensemo ya ikomi ye’chindagera chi’emegondo chi’omwaka oria, moyegache ase emechie yaino.
ⅩⅩⅨ Endagera eyio ney’Abalawi, ekiagera barabwo tibabwati omwando bw’oboremo, na ey’abamenyi ne chintakana, na ababoraka bare ase emechie yaino. Abwo mbachiche barie endagera eyio baisaneke. Erio nario Omonene Nyasae oino, arabasesenie ase emeremo yaino yonsi mogokora.