ⅩⅧ
Egetari ki’abakuani
Ⅰ “Abakuani Abalawi n’egesaku gionsi ki’Abalawi tibakonyoora egetari gose omwando amo n’Abaisraeli baande. Nigo barabe bakoria ebing’wanso bigosambwa n’omorero ase Omonene na okoruegwa konde gokorentwa asaare.
Ⅱ Ase ayio tibakonyoora omwando amo n’abanto bamwabo, ekiagera Omonene omonyene nere omwando obo, buna abarierete eira.
Ⅲ “Ekero abanto barabe bakorua eng’ombe, gose eng’ondi, gose embori, koba ekeng’wanso, bae abakuani rireko, ne chinsea ibere, n’enda; ebio nabio ebitari abanto barae abakuani.
Ⅳ Moe abakuani ogotongora kwaino kw’endagera, na edivai, na amaguta, na amarionya amatang’ani mokonacha korwa ase ching’ondi chiaino.
Ⅴ Omonene Nyasae oino, ochoorire Lawi n’ororeeria rw’aye ase egati y’ebisaku biaino bionsi, babe bagokora emeremo ase erieta riaye, korwa ekiaare ekemo gochia ekende ase amatuko onsi.
Ⅵ “Omolawi onde bwensi oraabe omenyete ase emechie ende yonsi y’Abaisraeli karaganie koruao, nabo aranyare goocha ase agwo Omonene arachoore.
Ⅶ Ere na’be ogokora emeremo ase erieta ri’Omonene, Nyasae oye, buna Abalawi bande bamwabo bagotenena gokora emeremo ase obosio bw’Omonene.
Ⅷ Nere oyio naatananerwe egetari kiaye ki’endagera kereng’aine n’eki’Abalawi bande, nonya okonyora egento ase okoonia omwando atigeretwe n’abaibori baye.
Ogokuurerwa kw’ogotenaria chingeencho chi’ abanto batamomanyeti Nyasae
Ⅸ “Ekero moraike ase ense eri’Omonene Nyasae oino, agochia kobaa, timobaisa kweorokereria kobwatia chingencho chi’okogechia okwo ebisaku biria bimenyeteo binarete gokora.
Ⅹ Monto onde oino tabaisa korua omwana oye, omomura gose omoiseke, asambwe ase omorero ime abe ekeng’wanso. Onde taba ase egati yaino oyogokora oboringooria, gose oborogi, gose koruta chinche, gose oyogokora oboragori,
Ⅺ gose oyokorangeria ebirecha, gose okorigia ogosemigwa korwa ase emeika y’abakuure, gose oborogi bonde bwonsi.
Ⅻ Onde bwensi orakore ebinto ebi nigo arabe okogeechia ase Omonene Nyasae, n’a ase engencho y’okogeechia buna okwo, Omonene oino naseerie abanto abwo konya bamenyete ase ense eria, barue ase amasio aino.
ⅩⅢ Inwe goika mobe abaikeranu ase obosio bw’Omonene Nyasae oino.”
Eira y’ogotoma omobani
ⅩⅣ Naende Musa agateeba, “Abanto b’ebisaku ebio mogochia goseeria nigo bakoigwera abarogi na abariori, korende inwe Omonene Nyasae oino, obakaanirie ng’a timobaisa gokora ebinto ebio.
ⅩⅤ Korende ase egati y’abamino, Omonene Nyasae oino, nabaimokerie omobani onga buna inche. Oyio nere moraigwere.
ⅩⅥ “Nigo er’abe buna mwaboretie Omonene Nyasae oino, ase rituko riria mwasangererekanete agwo Horebu, mogakwana: Tototiga toigwe eriogi ri’Omonene Nyasae oito, kagokwana, gose titogenderera korora omorero oyio omonene. Toise koriigwa na koyorora, nigo torakwe.
ⅩⅦ Omonene aganteebia: Amang’ana ayio bakwanire nayekeene.
ⅩⅧ Korwa ase egati y’abaamwabo nimbaimokerie omobani onga buna aye, nimbeeke amang’ana ane as’omonwa oye, nere n’abateebie ayio onsi ndamochiike.
ⅩⅨ Omonto onde bwensi oraange koigwera amang’ana ane ayio ndachiike omobani oyio ayakwane ase erieta riane, inche bweka omonyene ning’ee omonto oyio egesusuro.
ⅩⅩ Korende omobani oraenene, na gokwana ase erieta riane aya ’ntamochigeti akwane, gose oyio orakwane ase amarieta ye’chinyasae ching’ao, omobani oyio nigo araitwe akwe.
ⅩⅪ “Na komoreborie ase chinkoro chiaino ime: ’Naki torakore tomanye gose ring’ana riria rigokwanwa n’eri’Omonene?
ⅩⅫ Rirorio momanye ng’a, ekero omobani arakwane ring’ana ase erieta ri’Omonene, korende ring’ana erio tiriikeranigwa, gose koba ekeene, erio n’ering’ana Omonene atakwanete. Omobani oyio nigo arikwana ase obomwenu bwaye, inwe timobaisa komoiroka.