ⅩⅩⅦ
Amachiiko a Nyasae ariikire ase chibao chi’amagena
Ⅰ Ekero Musa arenge n’abagaaka b’Abaisraeli, agachiika abanto erio akabateebia, “Mobwate amachiiko aya onsi nabachiikire ase rituko ria reero.
Ⅱ Ase rituko riria moramboke gochia ng’umbu ya Yorodani, na ekero moraike ase ense eri’Omonene Nyasae oino, agochia kobaa, motenenie amagena amanene, moyaoomeranie.
Ⅲ Erio moriike ase amagena ayio amang’ana onsi y’ogochika oko. Ekero moraabe mwambokire gochia ng’umbu na gosoa ense eri’Omonene Nyasae oino, agochia kobaa, ense eria entenenku ere n’amabeere na amooke, buna Omonene, Nyasae bw’echisokoro chiaino, abarierete eira ng’a n’abayee,
Ⅳ na komwambokire ng’umbu, buna nabachiikire rituko ria reero, motenenie amagena aria ase egetunwa kia Ebali, erio moyaoomeranie amo n’ekebuuse giechooka.
Ⅴ Aroro agwo moaagachere Omonene Nyasae oino, egesasiimero ki’amagena. Timobaisa gokorera emeremo na gekorero kende gionsi gi’ekioma.
Ⅵ Egesasiimero keria ki’Omonene Nyasae oino, mokeagachere amagena atabaachiri; na igoro yaye momoruere ebing’wanso bi’ogosambwa,
Ⅶ morue na ebing’wanso bi’omorembe, mobiriereo na mogooke ase obosio bw’Omonene Nyasae oino.
Ⅷ Ase amagena ayio moriike amang’ana onsi y’ogochika oko, arorekane buya kegima.”
Ⅸ Musa na abakuani Abalawi bagakwana n’Abaisraeli bonsi, bakabateebia, “Inwe Abaisraeli, tegerera, moigwe! Rituko ria reero inwe mwabeire abanto b’Omonene Nyasae oino.
Ⅹ Ase ayio moigwere Omonene Nyasae oino, n’emeroberio yaye echiikire, na mobwate amachiiko aye, ayio inche ’nkobaa rituko ria reero.”
Okoragererigwa kw’abatakoigwera
Ⅺ Musa agachiika abanto ase rituko erio erio, agakwana,
Ⅻ “Ekero moraabe mwambokire gochia ng’umbu ya Yorodani, Abasimeoni, na Abalawi, na Abayuda, na Abaisakaru, na Abayusufu, na Ababenjamini, batenene igoro ase egetunwa kia Gerisimu, basesenie abanto.
ⅩⅢ Na Abareubeni n’Abagadi, n’Abaaseri, n’Abasabuloni, n’Abadani, n’Abanafutali batenene igoro ase egetunwa kia Ebali baragererie abanto.
ⅩⅣ Na Abalawi bakwane amang’ana aya n’eriogi rinene, erinde Abaisraeli bonsi bayaigwe.
ⅩⅤ “Aragererigwe omonto oyoraroisie omogwekano bw’ogosasiimwa, koyotenenia na koyosasiima bobisi, koraabe omogwekano obaachire, gose oyo bw’ebioma binyititoire na kobombwa, eyere emeremo y’omooroisia omong’aini. Okwo n’okogeechia ase Omonene.
“Abanto bonsi bairanerie, bateebe: Amina.
ⅩⅥ “Aragererigwe omonto ogochaaya ise gose ng’ina.
“Abanto bonsi bairanerie, bateebe: Amina.
ⅩⅦ “Aragererigwe omonto ogotumana orobebe rw’omogisangio oye.
“Abanto bonsi bairanerie, bateebe: Amina.
ⅩⅧ “Aragererigwe omonto ogotantania omonto omouko na komosiria enchera.
“Abanto bonsi bairanerie, bateebe: Amina.
ⅩⅨ “Aragererigwe omonto okorina omomenyi, gose entakaana, gose omotakaanwa, oboronge bwaye.
“Abanto bonsi bairanerie, bateebe: Amina.
ⅩⅩ “Aragererigwe omonto oraraare na moga ise, ekiagera ayio nokorentera ise obosooku.
“Abanto bonsi bairanerie, bateebe: Amina.
ⅩⅪ “Aragererigwe omonto oraraare n’eng’iti ende yonsi.
“Abanto bonsi bairanerie, bateebe: Amina.
ⅩⅫ “Aragererigwe omonto oraraare n’omoiseke omwabo, omoiseke o ise, gose oyo o ng’ina.
“Abanto bonsi bairanerie, bateebe: Amina.
ⅩⅩⅢ “Aragererigwe omonto oraraare na ng’ina biara.
“Abanto bonsi bairanerie, bateebe: Amina.
ⅩⅩⅣ “Aragererigwe omonto oraite omonto onde bobisi.
“Abanto bonsi bairanerie, bateebe: Amina.
ⅩⅩⅤ “Aragererigwe omonto oraegwe riaaki, erinde agende goita omonto otari na komocha.
“Abanto bonsi bairanerie, bateebe: Amina.
ⅩⅩⅥ “Aragererigwe omonto otari kobwata amang’ana onsi ay’ogochika oko, na koyakora.
“Abanto bonsi bairanerie, bateebe: Amina.