ⅩⅩⅫ
Ⅰ “Inwe igoro, ntegerera moigwe, nkwane,
naye ense, igwa amang’ana akorwa ase omonwa one.
Ⅱ Amorokererio ane tiga atwe buna embura,
na enkwana yane etoore buna riime ri’embura,
buna omonyirira okonyirira igoro ase obonyansi obobese,
na buna embura engiya egotwa igoro ase ebimeri ebirere.
Ⅲ Inche nindarie erieta ri’Omonene.
Inwe motogie Nyasae oito!
Ⅳ “Omonene nere Egetare giaito,
emeremo yaye nemeikeranu,
ekiagera chinchera chiaye chionsi nechindonge.
Nyasae nomwegenwa otari nobobe;
ere nigo are omonyene ekeene na oboronge.
Ⅴ Barabwo basaririe ase Omonene,
na bono tibagenderereti korokwa abana baye;
nigo bare abanto b’obosooku,
ekegori egesareku, naende egesiru.
Ⅵ Inwe abanto abariri motari nobong’aini,
Inee, eye nero enchera mogoakanera Omonene?
Inee, ere tari iso, oria obatongete,
na obakorire mwabeire ne chinguru?
Ⅶ “Inyora amatuko a kare,
rengereria igoro y’emiaka y’ebiaare biaetire.
Boria iso, nere nakworokererie amang’ana ayio,
boria abagaaka baino, nabarabwo mbakoyateebie.
Ⅷ Ekero Oyore Igoro Mono aete abanto b’ebisaku emiando yabo,
na ekero aatananete Mwanyabaanto.
Akababeekera chimbebe ase baramenye,
kobwatekana n’omobaro bw’Abaisraeli,
Ⅸ Omonene bwechooreire abanto baye babe egetari kiaye,
abanto ba Yakobo nabwo barurwe babe omwando oye.
Ⅹ “Omonene nigo abanyorete ase erooro etamenyiri n’abanto,
eyarenge kogosa nokwoga gwe ching’iti chi’orosana,
erio akabaraa aroro, akabarenda na kobarageria,
akabarenda buna arendete endorero y’eriso riaye.
Ⅺ Buna ekeongo gekorangeria amage aye na kiayorokereria koiruruka,
kiarambora chimbaaba chiaye keyabogoria,
naboigo Omonene akobogoria abanto baye ase chimbaaba chiaye ime.
Ⅻ Omonene bweka omonyene nere obaraaete,
na enyasae engeni tiyarenge amo nere.
ⅩⅢ “Akabakiinia na kobatiiria ase ebitunwa igoro,
akabarageria n’okwama kw’emegondo,
na obooke korwa ase egetare ime,
n’amaguta y’emazeituni korwa ase egetare egekong’u.
ⅩⅣ Akabaa amanooga ye chiombe,
na amabeere ye chimbori,
ne chinyama chinoru chie chimanwa chi’eching’ondi,
na echie chimingichi,
amo ne ching’ondi ne chimbori chingiya chikorwa Basani.
Mokaria engano yarenge engiya mono,
na mokanywa edivai korwa ase amasabibu amonyinga.
ⅩⅤ “Korende Yesuruni akanora, akaenena.
Akanora na koneta, akagirigenta;
erio akaanga Nyasae oria omotongete;
agachecheria Egetare keria kiarenge ogotooreka kwaye.
ⅩⅥ Barabwo bakagera Omonene akaba ne risemi,
ekiagera basasiimete chinyasae chingeni,
bakagera akaba n’endamwamu enene, ekiagera akorete okogeechia.
ⅩⅦ Bakarua ebing’wanso ase ebirecha bitari Nyasae:
bagasasiima chinyasae batamanyete agwo ritang’ani,
chinyasae chinyia chiasoete magega,
echio chisokoro chiaino chitairogete.
ⅩⅧ Mogatiga Egetare keria kiabaiborete,
mokeeba Nyasae oria obaete obogima.
ⅩⅨ “Ekero Omonene arooche amang’ana ayio, akabaanga,
akaba n’endamwamu ase abana baye, abamura na abaiseke.
ⅩⅩ Akabora: Nimbise obosio bwane korwa ase bare,
erio ndore omoerio obo buna ogochia koba,
ekiagera barabwo nekegori egesisikanu,
abanto batari abeegenwa.
ⅩⅪ Bagerire nabeire ne risemi ase engencho y’egetari Nyasae,
nagechiigwe ase emegwekano yabo ere bosa, eyio bagosasiima.
Ase ayio inche ninseegete abanto abachorochombu, erinde babageechie
nimbatige bageechigwe ase okobarentera egesaku ekeriri.
ⅩⅫ Endamwamu yane yokire buna omorero,
n’oro nosambe goika aase abakuure,
nosambe ense na okwama koreo,
nosambe na amaroso y’ebitunwa.
ⅩⅩⅢ “Nimbeeke amabe onsi igoro ase bare,
nimbarase n’chinsara chiane.
ⅩⅩⅣ ’Nabakwe ase engencho y’enchara ne riberera rikorura,
’nabariegwe namarwaire amabe agoita.
Nimbatomere ching’iti chi’orosana chire n’amaino amooge
chibarwanie, ne ching’iti chingeenda inse chire n’obosongo, chibarome.
ⅩⅩⅤ Ekero abana babo bare isiko mbaitwe n’emioro,
ekero bare ime ase chinyomba obwoba mbobaite;
ebio mbiite abamura, na abaiseke,
na abana bakogonka, amo n’abanto abagotu.
ⅩⅩⅥ Ngateeba: Nigo nareenge gochia kobasiarera gochia aare, erio mbasirie kegima, tibaabaisa koinyorwa ase egati ya Mwanyabaanto.
ⅩⅩⅦ Onye ’noboete ng’a ababisa baabo ’mbaabaise gochia gwetogia
na bangeechie, ’mbaabaise gochia goteeba: Nintwe twababua,
gose tari Omonene okorire ayio onsi.
ⅩⅩⅧ Abaisraeli n’abanto batancheti ogosemigwa,
na tibari n’obong’aini bonde bwonsi.
ⅩⅩⅨ Onye nabang’aini barenge nanga ’mbamanya amang’ana aya,
na korengereria igoro y’omoerio obo.
ⅩⅩⅩ Naki omonto oyomo arakore aseerie abanto elifu eyemo,
na abanto babere baseerie abanto chilifu ikomi,
onye oria ore egetare kiabo atabaoonetie na kobarua,
naende onye Omonene tabatigete?
ⅩⅩⅪ Egetare kiabo tikeri buna Egetare giaito,
nonya n’ababisa baito ’mbamanyete amang’ana ayio.
ⅩⅩⅫ Emesabibu yabo nigo ekorwa ase emesabibu ya Sodomu,
na korwa ase emegondo ya Gomora;
na amasabibu abo nigo are n’obosongo,
ebisago biabo nigo bire ebiroro.
ⅩⅩⅩⅢ Edivai yabo nigo enga buna obosongo bwe ching’iti,
na obotindi bwabo buna obosongo obotindi bw’amarubi.
ⅩⅩⅩⅣ “Omonene nigo akoboria: Inee!
Amang’ana aya tagachiri ase ’nde?
Tabeekiri ekemanyererio ase ekungo yane?
ⅩⅩⅩⅤ Egesiomba n’ekiane, ninche ’ndaakane,
kegachire goika amagoro abo atererigwe,
ekiagera rituko ri’emechando yabo riaikire ang’e,
na ogosirigwa kwabo nigo kogoocha bwango.
ⅩⅩⅩⅥ Omonene nanachere abanto baye ekiina kia boronge,
na arorere abasomba baye amaabera,
ekero ararore ng’a chinguru chiabo chiaerire,
naende onde tatigareti, omosomba gose omobiare.
ⅩⅩⅩⅦ Erio naborie: Ng’ai chinyasae chiabo chire?
Egetare ekio basemeretie na kogetamera, ng’ai kere?
ⅩⅩⅩⅧ Chinyasae echio chiariete ebitinya bi’ebing’wanso biabo,
na konywa okoruegwa kw’ebinyugwa bi’edivai, ng’ai chire?
Tiga chichiche erio chibakonye na kobarenda.
ⅩⅩⅩⅨ “Rora bono, inche ninche bweka Nyasae,
onde tari otatiga inche bweka.
Ninche ’ngoita, naende nairania obogima,
ninche ’ngoaka, naende nagwenia.
Onde tari oranyaare kwerwanerera ekonye korwa ase okoboko kwane.
ⅩⅬ Inche ninche ’nkoimokia amaboko ane gochia igoro,
natiana na goteeba: Buna inche inde moyo kare na kare.
ⅩⅬⅠ Nigo ’ngotieria omoro one okomesa,
n’okoboko kwane kwanacha ekiina.
Nindusie egesiomba igoro ase ababisa bane,
ning’akane baria bonsi bangeechete.
ⅩⅬⅡ Nintindie chinsara chiane n’amanyinga, omoro one oite abanto,
oigote chinyama chi’abwo baitirwe,
na amanyinga yabooswa
na emetwe y’abatang’ani b’ababisa.
ⅩⅬⅢ “Inwe abanto b’ebisaku, goka amo n’abanto b’Omonene;
ekiagera orusirie egesiomba ki’amanyinga y’abasomba baye;
orusirie egesiomba igoro ase ababisa baye,
okorire okobwatania ase ense yaye na ase abanto baye.”
ⅩⅬⅣ Musa ekero arenge na Yoshua,
mosinto o Nuni, agacha agakwana amang’ana onsi y’ogoteera okwo, ekero abanto bategererete.
Amorokererio y’omoerio a Musa
ⅩⅬⅤ Ekero Musa akoorire gokwana amang’ana ayio ase Abaisraeli bonsi,
ⅩⅬⅥ akabateebia, “Renda na koigwera amang’ana onsi aya nabeekire abe kirori ase more ase rituko ria reero, mochiike abana baino babwate na gokora amang’ana onsi y’amachiiko ayio.
ⅩⅬⅦ Ayio tari amang’ana abosa ase more, naro obogima bwaino; na ase okoigwera amang’ana aya ’namogenderere komenya engaki entambe ase ense eyio mogochia koira ng’umbu ya Yorodani.”
ⅩⅬⅧ Ase rituko erio eri’Omonene agateebia Musa,
ⅩⅬⅨ “Tiira gochia ase ebitunwa bi’Abarimu, ase egetunwa kia Nebo, kere ase ense ya Moabu, kororia Yeriko, erio origererie ense ya Kaanani eyio ingochia koa Abaisraeli ebe eyabo.
Ⅼ Aye nokwere ase egetunwa ekio ase ogotiira gochia, osangererekane amo n’abanto bao, buna Aroni momura omino akwerete ase egetunwa kia Hori, akabwatia abanto baye,
ⅬⅠ ekiagera timwabeete abeegenwa ase ’nde ase egati y’Abaisraeli agwo ase amaache a Meriba‐Kadeshi, ase erooro ya Sini. Timwansigete na kworokia Abaisraeli ng’a inche nigo inde omochenu.
ⅬⅡ Ase ayio nonyare korora ense eria ere bosio bwao, korende tokonyaara kogeenda aroro na gosoa ase ense eria ’ngochia koa Abaisraeli.”